მოუხსნა თუ არა რუსეთმა სანქციები საქართველოს? რძის ექსპორტი და მორიგი საყვედური უკრაინისგან
რძის პროდუქტების ექსპორტი რუსეთში
რუსეთმა, მოლაპარაკების შედეგად, ქართულ საწარმოებს რძის პროდუქტების ექსპორტის ნება დართო. ამ ინფორმაციამ რუსეთ-უკრაინის ომის და რუსეთის წინააღმდეგ დაწესებული სანქციების კონტექსტში ოპოზიციის და საზოგადოების აღშფოთება გამოიწვია. თბილისმა საყვედური კიევისგანაც მიიღო, სადაც საქართველო-რუსეთის ეკონომიკური ურთიერთობის ამგვარ განვითარებას “ზურგში დანა” უწოდეს.
რუსეთის ვეტერინარული და ფიტოსანიტარიული ზედამხედველობის სამსახურმა (“როსსელხოზნადზორმა”) რუსეთში რძის ნაწარმის შეტანის უფლება 15 ქართულ საწარმოს დართო. ეს ინფორმაცია რუსულ სახელმწიფო მედიაში 6 მარტს გავრცელდა.
“როსსელხოზნადზორის” განმარტებით, გადაწყვეტილება 5 მარტის მოლაპარაკებების შედეგად მიიღეს, რომელიც უწყების ხელმძღვანელს სერგეი დანკვერტსა და საქართველოს სოფლის მეურნეობის სამინისტროს სურსათის ეროვნული სააგენტოს ხელმძღვანელს ზურაბ ჩეკურიშვილს შორის გაიმართა.
მოგვიანებით ამ ცნობას სურსათის ეროვნული სააგენტო გამოეხმაურა და აღნიშნა, რომ ამ საკითხზე რუსეთთან მოლაპარაკებას 2020 წლიდან აწარმოებს.
“სურსათის ეროვნული სააგენტო მოლაპარაკებებს აწარმოებს არაერთ ქვეყანასთან, მათ შორის, ერთი კვირის წინ წარმატებით დასრულდა მოლაპარაკებები საუდის არაბეთთან. 2020 წლიდან მოლაპარაკებები მიმდინარეობდა რუსეთის ფედერაციის მხარესთანაც, რომლის საფუძველზე მიღებულ იქნა გადაწყვეტილება ქართული ცხოველური წარმოშობის პროდუქციის ექსპორტის დაშვებასთან დაკავშირებით რუსეთის ფედერაციაში და სხვა ქვეყნებში”, – ნათქვამია სურსათის ეროვნული სააგენტოს განცხადებაში.
სააგენტო დეტალურად არ საუბრობს 5 მარტის შეხვედრზე და არც იმ 15 კომპანიას ასახელებს, ვისაც რუსეთი რძის პროდუქტების ექსპორტის ნებართვას აძლევს. თუმცა, იმასაც აღნიშნავს, რომ სხვადასხვა ბაზარზე, მათ შორის, ევროკავშირის ბაზარზე ცხოველური წარმოშობის პროდუქციის ექსპორტზე წარმატებით მუშოაბს.
რამდენიმე დღის წინ საქრათველოს პრემიერმინისტრმა ირაკლი ღარიბაშვილმა განაცხადა, რომ საქართველო უკრაინის წინააღმდეგ აგრესიის გამო რუსეთის მიმართ შემოღებულ სანქციებს არ შეუერთდება.
`ოპოზიციის პროტესტი
აღშფოთება საქართველოს ხელისუფლების რუსეთთან “დახურულ კარს მიღმა” მოლაპარაკებების გამო ოპოზიციურმა პარტია “დროა”-მ გამოთქვა.
“ნაცვლად იმისა, რომ საქართველო იყოს მოწინავე ომში მყოფი უკრაინის მხარდაჭერაში, “ქართული ოცნება” არა მხოლოდ დამაზიანებელ განცხადებებს აკეთებს, თავს ესხმის ვოლოდიმირ ზელენსკის ხელისუფლებას, არამედ მოსახლეობისგან მალულად აწარმოებს მოლაპარაკებას კაცობრიობის წინაშე არაერთი დანაშაულის ჩამდენ პუტინის ხელისუფლებასთან. მიგვაჩნია, რომ ეკონომიკურ იზოლაციაში მოქცეულ რუსეთთან მსგავსი მოლაპარაკება ხელისუფლების მორიგი მოღალატეობრივი ნაბიჯია”, – ნათქვამია პარტიის განცხადებაში.
“დროა” მოუწოდებს კერძო ბიზნესს გამოიჩინონ სამოქალაქო პასუხისმგებლობა და უარი თქვან “ხელისუფლების მოღალატეობრივ პოლიტიკაში მონაწილეობაზე”.
პარტია “დროას” ლიდერები ელენე ხოშტარია, შუშანა მაცაბერიძე და გიგა ლემონჯავა მთავრობის კანცელარიასთან დააკავეს, სადაც ისინი ხელისუფლების ქმედებების გასაპროტესტებლად მივიდნენ და კიბეზე კეტჩუპი დაასხეს.
“უკრაინელები საკუთარ სიცოცხლეს წირავენ, მათ შორის, ჩვენს სახელმწიფოს, ჩვენს თავისუფლებას, ჩვენს უსაფრთხოებას. აი, ამ მთავრობაში არალეგიტიმურად მჯდომი ხალხი, ბიძინა ივანიშვილი მოლაპარაკებებს აწარმოებს რუსეთთან, იმისთვის, რომ სანქციების ხვრელი გახდეს საქართველო.
ნაცვლად იმისა, რომ ჩვენ ყველა, მთელ ცივილიზებულ სამყაროსთან ერთად ახლა ვზრუნავდეთ, რომ მოიხრჩოს რუსული ეკონომიკა, აქ აწარმოებენ მოლაპარაკებებს იმაზე, რომ კომფორტი შეუქმნან რუსულ ეკონომიკას. თურმე საქართველოს პროდუქცია უნდა გავიდეს რუსულ ბაზარზე. […]ჩვენ ყველამ უნდა გავაპროტესტოთ, რომ ჩვენ გვყავს ასეთი მთავრობა. მთავრობა არის უღირსი, ჩვენ არ ვართ უღირსები”, – განაცხადა ელენე ხოშტარიამ.
“დროა”-მ 6 მარტს 19:00 საქართველოს მთავრობის ადმინისტრაციასთან საპროტესტო აქცია დაანონსა.
“ზურგში დანა”
ცნობას რძის პროდუქტების ექსპორტზე რუსეთ-საქართველოს მოლაპარაკებების შესახებ რეაქცია უკრაინაში მოჰყვა.
“რუსეთი საქართველოს სანქციებს უხსნის იმის ფონზე, რომ თბილისს უკრაინის მხარდაჭერა არ სურს” – ასე დაასათაურა გამოცემა “უკრაინსკაია პრავდამ” ცნობა ამ გარიგების შესახებ.
უკრაინის უმაღლესი რადას ფრაქცია „ხალხის მსახურის” ლიდერმა დავით არახამიამ საგანგებო გაცხადება გააკეთა.
„მინდა მივმართო ქართველ ხალხს და პირველ რიგში საქართველოს ხელისუფლებას. დღეს გახდა ცნობილი, რომ რუსეთმა ეკონომიკური სანქციები და ბარიერები მოხსნა ქართულ რძეზე, ღვინოზე და ა.შ. იმისთვის რომ მოიპოვოს საქართველოს ლოიალური დამოკიდებულება უკრაინა-რუსეთის ომში”, – განახადა არახამიამ.
მან საქართველოს რუსული აგრესიის დროს უკრაინის მიერ გაწეული დახმარება შეახსენა.
“თქვენ ფიქრობთ, რომ ეს ნორმალური პასუხია საქართველოსგან უკრაინის მიმართ, მაშინ როცა რუსეთი თავს გვესხმის?! გთხოვთ, ქართველო ხალხო, მე მჯერა თქვენი, გაარკვიეთ საქმე თქვენს მთავრობასთან, გადაწყვიტეთ ეს საკითხი, იმიტომ, რომ ჩვენ არ ვისურვებდით, ასეთი ღალატი და ზურგში დანა გვენახა ქართველი ხალხისგან.
მე ყოველთვის ვამაყობდი, რომ ქართველი ვარ, ვცხოვრობ უკრაინაში, ხელისუფლებაში ვარ და დღეს ნამდვილად მრცხვენია“ – განაცხადა არახამიამ.
გავრილოვი: რუსეთი საქართველოში ფრენებს აღადგენს
ამავე დროს რუსეთის სახელმწიფო სათათბიროს დეპუტატი გავრილოვი, რომელიც 2019 წელს “გავრილოვის ღამის” მიზეზი გახდა, განაცხადა, რომ რუსეთი, რომელსაც დასავლეთის ქვეყნები საჰაერო სივრცეს უკეტავენ, მზადაა საქართველოსთან ფრენები აღადგინოს.
“ვფიქრობთ, რომ თუ საქართველოს ხელისუფლება არ გადაუხვევს არჩეულ კურსს და მხარს არ დაუჭერს ანტირუსულ სანქციებს, რუსეთიდან პირდაპირი ფრენების აღდგენა უახლოეს მომავალში იქნება შესაძლებელი”, – თქვა გავრილოვმა.
