მოსაზრება: როგორ მუშაობს საგზაო ავტოინსპექცია ცხინვალში
საგზაო პოლიცია ანუ “გაი” ერთ-ერთია იმ სახელმწიფო სამსახურებიდან, რომლებთანაც პოსტსაბჭოთა სივრცის მაცხოვრებლებს შეხება ყველაზე ხშირად აქვთ ხოლმე. ხშირად, სწორედ ამ სამსახურის წარმომადგენლები ხდებიან ხელისუფლების სახე და მოქალაქეთა მიმართ მისი დამოკიდებულების მაჩვენებელი.
ჟურნალისტი, ბლოგერი და მეწარმე ცხინვალიდან ალან პარასტაევი იმაზე მსჯელობს, თუ როგორ მუშაობს საგზაო ინსპექტორების სამსახური ცხინვალში და რა შეიცვალა ბოლო წლებში.
“ქორწილის ინსპექტორები”
კვირადღეს ცხინვალის ხმაური სან-ფრანცისკოს ან ჩიკაგოს მოგაგონებთ – როგორც ისინი ჰოლივუდის ბლოკბასტერებშია ნაჩვენები. ყოველ წუთს ისმის პოლიციის საყვირები, რომლებიც ხან გიახლოვდება და ხან დადუმდება. საღამოობით აფეთქებებისა და გასროლების მსგავსი ხმაც ისმის – ეს შუშხუნები და პეტარდებია. ისმის მუსიკაც, თუმცა არა ბლუზი ან ჯაზი, არამედ “კავკასიური შანსონი”.
- ცხინვალის სადგური მატარებლის გარეშე
- ცხინვალი: როგორ გადავარჩინოთ მდინარე
- ოსი აბიტურიენტების უმეტესობა სასწავლებლად რუსეთში მიდის. რამდენი მათგანი დაბრუნდება?
სინამდვილეში, ეს ქორწილების ხმებია, რომლებიც ქალაქში აღინიშნება.
ჩვენი კანონების თანახმად, ყველა ქორწილს საგზაო მოძრაობის უსაფრთხოების სახელმწიფო ინსპექციის ეკიპაჟი უნდა ახლდეს. ის ცოტა უცნაურად და, შეიძლება ითქვას, გროტესკულად გამოიყურება ხოლმე. პოლიციის მოწყენილი თანამშრომლები ლურჯ-თეთრ მანქანებიდან უყურებენ, როგორ აღინიშნავენ ქორწილს ხშირად მათი მეგობრები, ამხანაგები და შესაძლოა ნათესავებიც.
მე სამუშაოს ერთ – ერთი სახეობა აღვწერე, რასაც დღეს სამხრეთ ოსეთის საგზაო პოლიცია ასრულებს, რაც წინა წლებში მისთვის არ იყო დამახასიათებელი. და, ჩემი აზრით, ის ფაქტი, რომ საგზაო პოლიციელებს ასეთი ფუნქციები ეკისრებათ, ჩვენი საზოგადოების ამჟამინდელ მდგომარეობაზე მეტყველებს.
და აი რატომ: საქორწინო კორტეჟში ამ მიზნებისათვის სპეციალურად გამოყოფილ საპატრულო ავტომობილის ყოფნა ფაქტობრივად ნასვამ მდგომარეობაში მართვის ლეგალიზებას ნიშნავს. პოლიციის თანამშრომლები არ აკონტროლებენ სტუმრებს – სვამენ ისინი თუ არა. და, რა თქმა უნდა, არც ალკოჰოლზე ამოწმებენ. უბრალოდ სთხოვენ, სიჩქარეს არ გადააჭარბონ და საქორწილო კავალკადის სხვა მონაწილეებს არ გაასწრონ.
დიახ, ეს ყველაფერი კეთდება უსაფრთხოების მიზნით, საგზაო შემთხვევების და მსხვერპლის თავიდან ასაცილებლად. მაგრამ შინაგან საქმეთა სამინისტროს ეს პოზიცია არ შეიცავს საგანმანათლებლო კომპონენტს. მძღოლს, ფაქტობრივად, ეძლევა საშუალება საჭესთან დალიოს. მართალია, განსაკუთრებულ შემთხვევაში და თანამშრომლების მეთვალყურეობის ქვეშ. მაგრამ მაინც ეძლევა.
იმავე წარმატებით, ის საჭესთან ნასვამი დაჯდება უბრალოდ ბუნებაში ქეიფის შემდეგაც. თავს იმით გაიმართლებს, რომ არ დაარღვევს, ისევე როგორც ეს ქორწილში იყო.
თუ ეს ნებადართულია ერთ, თუნდაც განსაკუთრებულ შემთხვევაში, რატომ არ უნდა იყოს სხვა შემთხვევაშიც, თუ მოძრაობის წესები დაცული იქნება?
რა შეიცვალა უკეთესობისკენ
თუ საგზაო პოლიციაში ინოვაციების თემას გავაგრძელებთ და მას კრიტიკულ ტალღაზე არ დავამთავრებთ, უნდა აღინიშნოს გარკვეული ცვლილებები ჩვენი “ზოლიანი კვერთხის რაინდების” უშუალოდ ყოველდღიურ და არა შაბათ-კვირის, მუშაობაში. ჩემი დაკვირვებით, სტაციონარულ პოსტებზე დგომა და ვიდეოხაფანგების საშუალებით სიჩქარის დამრღვევების დაჭერა სულ უფრო და უფრო უკანა პლანზე გადადის.
და ეს კარგია. ნუთუ მათ საბოლოოდ გააცნობიერეს შემოწმების ამ მეთოდის უშედეგოობა და დაბალი ეფექტურობა? ის სამხრეთ ოსეთის გავლით რუსეთიდან ამიერკავკასიაში და უშუალოდ საქართველოში ტრანზიტის დროიდან შემორჩა. მაშინ შეგეძლო ერთ ადგილას დამდგარიყავი და ყველა და ყველაფერი ამ ერთადერთ გზაზე, ტრანსკავკასიური მაგისტრალზე, გამოივლიდა.
ზუსტად 13 წლის წინ ეს შეწყდა [ტრანზიტი 2008 წლის ომის შემდეგ შეჩერდა] და რამდენიც არ უნდა ილაპარაკონ, ჯერ ვერ აღდგება. მართალია, სამხრეთ ოსეთის აღდგენის პროგრამის აქტიური განხორციელების პერიოდში, სატვირთო მიმოსვლა დიდი იყო, მაგრამ რუსეთიდან ჰუმანიტარული დახმარებით დატვირთული მანქანების მძღოლების დაჯარიმება ცოტა რთული საქმე იყო.
თუმცა, ბევრჯერ გავხდი იმის მოწმე, თუ როგორ აჩერებდნენ მსუბუქ კერძო ავტომობილებს რუსეთიდან. ეს შეიძლება უბრალო საბუთების შემოწმება ყოფილიყო. თუმცა, მანქანამ, რომელმაც ვთქვათ, სოფელ გუფთაში საგუშაგომდე მიაღწია, უკვე გაიარა სრული შემოწმება ორ სასაზღვრო და საბაჟო გამშვებ პუნქტზე.
პატრულირება ახლა უფრო ხშირად ხდება. რამდენიმე დღის წინ ბიჭი, რომელმაც მომიყვანა, საპატრულო “პრიორამ” გააჩერა. მან პირდაპირ შუქნიშანთან ჩამომსვა და საგზაო პოლიციამ, რომელიც ჩვენს უკან მოძრაობდა, ეს შენიშნა, გააჩერა “ჩემი” მძღოლი და ოქმი შეუდგინა. თუმცა, ფაქტობრივად, მე უნდა დავჯარიმებულიყავი.
არ ვიცი, ამ დროს მიმდინარეობს თუ არა ვიდეოჩაწერა ლაივ-რეჟიმიში მორიგე პუნქტზე გადაცემით. ეს მნიშვნელოვნად შეუწყობდა ხელს საგზაო პოლიციის მუშაობას “ნაცნობ” და სხვადასხვა “მოწმობების” მქონე დამრღვევებთან ბრძოლის თვალსაზრისით.
ამ შემთხვევაში, თანამშრომელს ყოველთვის შეუძლია ყველაფერი უფროსობას დააბრალოს, რომელიც ყველაფერს ხედავს. და თუ ის დამრღვევს ოქმის გარეშე გაათავისუფლებს, დაისჯება. ასეთი სისტემა ხელს შეუშლიდა მექრთამეობას და შესაძლოა სწორედ ესაა მიზეზი, თუ რატომ არ გამოიყენება ისე, როგორც სასურველი იქნებოდა.
მაგრამ მთელი ჩვენი კრიტიკული დამოკიდებულების მიუხედავად საგზაო პოლიციის მიმართ, რომელიც ჯერ კიდევ საბჭოთა პერიოდში ჩამოყალიბდა, უნდა აღინიშნოს, რომ კორუფციის დონე აშკარად შემცირდა და საგზაო ინსპექტორების ქცევამ უფრო ცივილიზებული სახე მიიღო. ახლანდელი საგზაო პოლიციელი კეთილგანწყობის დამსახურებას და არა შეშინებას ცდილობს, როგორც ადრე, და, რაც მთავარია, მზადაა გზაში დახმარება გაგიწიოს.
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
