„მოხალისეობრივი ჩართულობის აუცილებლობა არ იყო“, - შალვა პაპუაშვილი შოვის სტიქიაზე

შალვა პაპუაშვილი შოვის სტიქიაზე

საქართველოს პარლამენტის თავმჯდომარე შალვა პაპუაშვილმა „ქართული ოცნების“ ცენტრალურ ოფისში შოვის სტიქიასთან დაკავშირებით ბრიფინგი გამართა. მან განაცხადა, რომ სტიქიის ადგილას მოხალისეების საჭიროება არ არსებობდა. მისი თქმით, შოვში მოხალისეობრივი საქმიანობის მიზანი რიგ შემთხვევაში, იყო აღქმის ჩამოყალიბება, თითქოს ხელისუფლება საკმარისად არ ზრუნავს დაზარალებულებზე.

„ის, რაც ამ დღეებში ტელე თუ სოციალურ მედიაში ხდებოდა, თავისუფლად შეიძლება შეფასდეს, როგორც ქართულ საზოგადოებაზე საინფორმაციო თავდასხმა, რომლის მიზანი სახელმწიფოს მიმართ უნდობლობის გაჩენა, საზოგადოებაში დაბნეულობის შეტანა და პანიკის დათესვაა. ჩვენ ფაქტობრივად გავხდით მცირე მოდელირების მოწმე, თუ რა სახის საინფორმაციო შეტევები შეიძლება განხორციელდეს ქართულ საზოგადოებაზე კრიზისული სიტუაციების დროს“, – აღნიშნა პაპუაშვილმა.

• შოვის ტრაგედია: რა მოხდა და შეიძლებოდა თუ არა მსხვერპლის თავიდან აცილება
• რა მოხდა შოვში – სტიქიის გამომწვევ მიზეზებზე პირველადი დასკვნა გამოქვეყნდა
• ტრაგედია შოვში – ათობით დაღუპული, დაშავებული და დაკარგული

მისი თქმით, სოციალურ ქსელში ინტენსიურად ვრცელდებოდა ინფორმაცია დახმარებების შეგროვების შესახებ, იქნებოდა ეს საკვები, წყალი, ტანსაცმელი თუ მედიკამენტები. პარლამენტის თავმჯდომარემ განაცხადა, რომ მიუხედავად საგანგებო შტაბის მხრიდან გაკეთებული არაერთი განმარტებისა, რომ სახელმწიფო უზრუნველყოფდა ადგილზე მყოფ ყველა პირს და მოხალისეობრივი ჩართულობის აუცილებლობა არ იყო. „ასეთი აქციების მიზანი, რიგ შემთხვევაში, იყო აღქმის ჩამოყალიბება, თითქოს ხელისუფლება საკმარისად არ ზრუნავს დაზარალებულებზე“, – თქვა პაპუაშვილმა.

პარლამენტის თავმჯდომარემ ბრიფინგისას  მედია და არასამთავრობო ორგანიზაციები გააკრიტიკა. მან პოლიტიკოსებთან და არასამთავრობო ორგანიზაციებთან ერთად ყალბი ამბების გავრცელებაში დაადანაშაულა გამოცემა „მთის ამბები“, რომელმაც პირველმა დაიწყო შოვის მეწყერის შესახებ ცნობების გავრცელება. ამ განცხადებას გამოეხმაურა “მთის ამბებიც” და მედიაზე მორიგი თავდასხმა უწოდა.

პაპუაშვილმა ბრიფინგზე ისაუბრა სტიქიის შედეგად დაკარგულ ადამიანებზეც. მან აღნიშნა, რომ ბოლო ინფორმაციით, სტიქიის შედეგად დაკარგული იყო 33 ადამიანი, საიდანაც 9 აგვისტოს დილით განახლებული მონაცემებით, ნაპოვნია 20 ადამიანის ცხედარი.

შოვში მეწყერი 3 აგვისტოს 15 საათზე დაიწყო. სამაშველო ვერტმფრენი კი სტიქიის ზონაში 3 საათის შემდეგ გამოჩნდა. გუშინ, 8 აგვისტოს შალვა პაპუაშვილმა განაცხადა, რომ ვერტმფრენი შოვში „3 საათის დაგვიანებით კი არ მივიდა, სამ საათში მივიდა, სულ რაღაც სამ საათში”.