მიხეილ ყაველაშვილი დაპატიმრებულ ოპოზიციონერებს შეწყალების თხოვნასა და არჩევნებში მოანწილეობას სთავაზობს
მიხეილ ყაველაშვილი ოპოზიციონერებს მიმართავს
“ქართული ოცნების” პრეზიდენტი, მიხეილ ყაველაშვილი აცხადებს, რომ თუ დაპატიმრებული ოპოზიციონერი ლიდერები მას შეწყალების თხოვნით მიმართავენ და ამავე განცხადებაში დაადასტურებენ მათ სურვილს ადგილობრივ არჩევნებში მონაწილეობის შესახებ, ის მათ შეიწყალებს.
ამავე განცახდებაში, ოცნების მიერ არჩეული პრეზიდენტი ამბობს, რომ მნიშვნელოვანია, თვითმმართველობის არჩევნებში მონაწილეობა ყველა ოპოზიციურმა პარტიამ მიიღოს და მათ სრულფასოვანი საარჩევნო კამპანიის ჩატარება შეძლონ.
“როგორც საზოგადოებას მოეხსენება, რამდენიმე პოლიტიკური პარტიის კონკრეტული ლიდერები საქართველოს კანონმდებლობის შესაბამისად იხდიან სასჯელს თავისუფლების აღკვეთის დაწესებულებაში. ამ გარემოების გათვალისწინებით, ვთავაზობ ყველა შესაბამის მსჯავრდებულ პოლიტიკოსს, მომმართოს განცხადებით შეწყალების შესახებ და იმავე განცხადებით დაადასტუროს საკუთარი სურვილი არჩევნებში მონაწილეობის შესახებ. ამგვარი განცხადებით მომართვის შემთხვევაში, დაუყოვნებლივ გამოვცემ აქტს შესაბამისი მსჯავრდებულების შეწყალების თაობაზე.
ზუსტად სამ თვეში, 2025 წლის 4 ოქტომბერს გაიმართება ადგილობრივი თვითმმართველობის არჩევნები, რომელშიც საქართველოს მოსახლეობამ 64 მუნიციპალიტეტის მერი და საკრებულო უნდა აირჩიოს. მნიშვნელოვანია, ამ არჩევნებში სრულფასოვანი მონაწილეობა მიიღოს ყველა პოლიტიკურმა პარტიამ, რომელიც საქართველოს კანონმდებლობის შესაბამისად არის რეგისტრირებული და არჩევნებში მონაწილეობის სურვილს გამოხატავს. ასევე მნიშვნელოვანია, სრულფასოვანი საარჩევნო კამპანიის ჩატარება ყველა პოლიტიკურმა პარტიამ შეძლოს”, – წერია განცხადებაში.
გამოხმაურება
“ლელო – ძლიერი საქართველოს” გენერალური მდივანი, ირაკლი კუპრაძე მიხეილ ყაველაშვილის განცხადებას ეხმაურება და ამბობს, რომ საპატიმრო დაწესებულების რეგულაციების გამო, გასაუბრება ვერ მოახერხა, თუმცა დარწმუნებით ამბობს, რომ მამუკა ხაძარაძისა და ბადრი ჯაფარიძის მხრიდან ყაველაშვილის მიმართ შეწყალების მოთხოვნა არ გაიგზავნება.
“მე, როგორც ლელოს გენერალური მდივანი და მათი მეგობარი, ვიცი, თუ რა ღირებულებებით ცხოვრობენ მამუკა ხაზარაძე და ბადრი ჯაფარიძე. რა პრინციპებითა და ღირსებით იცავენ ქართველი ხალხის ინტერესს და სჯერათ ბრძოლის და გამარჯვების. მათთან შეუთანხმებლად, თუმცა რწმენით, რომ ეს არის 100%-ით მათი პოზიცია, ვაცხადებ: არანაირი შეწყალების მიმართვა არალეგიტიმური პრეზიდენტისთვის არ იქნება. ჩვენ მას მივუთითებთ გზას რუსული ხომალდის მიმართულებით”, – თქვა მან.
“კოალიცია ცვლილებებისთვის” მიხეილ ყაველაშვილის განცხადებას ეხმაურება. განცხადებაში ხაზგასმულია, რომ კოალიციის დაკავებული ლიდერები არ აპირებენ ყაველაშვილს შეწყალების მოთხოვნით მიმართონ და მონაწილეობა მიიღონ თვითმმართველობის არჩევნებში.
მათი თქმით, ოპოზიციური პარტიების ადგილობრივ არჩევნებში ჩართვით, “ოცნება” საკუთარი თავის ლეგიტიმაციას ცდილობ, ხოლო დაპატიმრებული ლიდერების საკითხს ვაჭრობისთვის იყენებს.
“ე.წ. პრეზიდენტის პირით რეჟიმმა დაადასტურა, რომ ადგილობრივ არჩევნებად წოდებულ ყალბ, კრიმინალურ პროცესში პროდასავლური ძალების მონაწილეობა არის რეჟიმის გადარჩენისა და ცვლილებების გადავადების ერთადერთი გზა და რომ ამის მისაღწევად ყველანაირ გარიგებაზე წავლენ.
დადასტურდა ისიც, რომ პოლიტიკური ლიდერები რეალურად უსამართლოდ და მხოლოდ და მხოლოდ იმიტომ დაატყვევეს, რომ მათ არ აღიარეს გაყალბებული არჩევნების შედეგები და არ ცნეს რეჟიმის ლეგიტიმაცია.
ნათელი გახდა, რომ რეჟიმი საკუთარი ლეგიტიმაციის ერთადერთ გზად განიხილავს პროდასავლური ძალების ე.წ. თვითმმართველობის არჩევნებში მონაწილეობას და სწორედ ამ საკითხზე ვაჭრობს პოლიტიკური პატიმრების თავისუფლებით.
ჩვენი პოზიცია არის უცვლელი – არცერთ ეტაპზე არ ვაპირებთ რეჟიმთან თანამშრომლობასა და მათთვის ლეგიტიმაციის მინიჭებას. გამარჯვების გზა გადის ართანამშრომლობასა და წინააღმდეგიბაზე.
ბოლომდე!” – წერია განცხადებაში.
“ერთიანობა – ნაციონალური მოძრაობის” ლიდერის, თინა ბოკუჩავას თქმით, მიხეილ ყაველაშვილის განცხადება დასტურია იმის, რომ “ივანიშვილის რეჟიმი გადარჩენის ერთადერთ შანსს რეალურად ხედავს აღიარებაში და ლეგიტიმაციაში”.
ბოკუჩავას თქმით, ის დარწმუნებულია, რომ მიხეილ ყაველაშვილს ეს განცხადება ივანიშვილის, სხვა მსახურებმა დაუწერეს და ასევე დარწმუნებულია, რომ ეს არ შეეხება პრეზიდენტ მიხეილ სააკაშვილს.
24 ივნისს “სტრატეგია აღმაშენებლის“ ლიდერი გიორგი ვაშაძე სასამართლომ პარლამენტის დროებითი საგამოძიებო კომისიის მოთხოვნის შეუსრულებლობის გამო დამნაშავედ ცნო და 7 თვით პატიმრობა შეუფარდა. მას 2 წლით თანამდებობის დაკავებაც აეკრძალა.
23 ივნისს, “ქართული ოცნების” სასამართლომ ოპოზიციის სამ ლიდერს – მამუკა ხაზარაძეს და ბადრი ჯაფარიძეს (ლელო – ძლიერი საქართველო), ასევე ზურაბ გირჩი ჯაფარიძეს (კოალიცია ცვლილებებისთვის) პატიმრობა შეუფარდა.
საგამოძიებო კომისიაზე გამოუცხადებლობის გამო ციხეში უკვე სხედან ნიკა მელია, ზურაბ გირჩი ჯაფარიძე და ნიკა გვარამია (კოალიცია ცვლილებებისთვის) და თავდაცვის ყოფილი მინისტრი ირაკლი ოქრუაშვილი.
ყველა მათგანს თეა წულუკიანის საგამოძიებო კომისიაზე გამოუცხადებლობას ედავებიან.
