"უნდა დაინიშნოს ახალი არჩევნები" - როგორ ეხმაურებიან დასავლეთში ყაველაშვილის ინაუგურაციას და ზურაბიშვილის წასვლას
მიხეილ ყაველაშვილი და სალომე ზურაბიშვილი
საქართველოს დასავლელი პარტნიორების ნაწილი 29 დეკემბერს გამოეხმაურა. მათი უმრავლესობა ამბობს, რომ საქართველოში ახალი არჩევნები უნდა ჩატარდეს.
საქართველოს პარლამენტის შენობაში 29 დეკემბერს, “ქართული ოცნების” მიერ დანიშნული პრეზიდენტის, მიხეილ ყაველაშვილის ინაუგურაცია გაიმართა.
ყაველაშვილი პირველი პრეზიდენტია, რომელიც ხალხის მიერ არ არის არჩეული. მის ლეგიტიმურობას არ აღიარებს ოპოზიცია, სამოქალაქო საზოგადოება, საქართველოში მოქმედი არასამთავრობო ორგანიზაციები; მისთვის გამარჯვება არ მიულოცავთ არც საქართველოს დასავლელ პარტნიორებს.
ინაუგურაციის პარალელურად, სალომე ზურაბიშვილის მხარდასაჭერად, რომელსაც საზოგადოების დიდი ნაწილი ერთადერთ ლეგიტიმურ პრეზიდენტად მიიჩნევს, საქართველოს პრეზიდენტის ორბელიანების სასახლესთან დილიდან ათასობით ადამიანი შეიკრიბა.
რას ამბობენ საქართველოს დასავლელი პარტნიორები:
ნორდიკული და ბალტიის ქვეყნები მთავრობას არჩევნების დანიშვნის განხილვისკენ მოუწოდებენ
სკანდინავიურმა და ბალტიის ქვეყნებმა – დანია, ესტონეთი, ფინეთი, ისლანდია, ლიტვა, ლატვია, ნორვეგია და შვედეთი – საქართველოსთან დაკავშირებით ერთობლივი განცხადება გაავრცელეს:
“ჩვენ სერიოზულად შეშფოთებულები ვართ საქართველოში არსებული ვითარებით.
ჩვენ წარსულში მოვუწოდეთ 26 ოქტომბრის საპარლამენტო არჩევნების წინ და მის დროს დარღვევებზე გავრცელებული ცნობების სიღრმისეული და მიუკერძოებელი გამოძიებისკენ.
ჩვენ დავგმეთ ძალადობა და დაშინება მშვიდობიანი მომიტინგეების, პოლიტიკოსებისა და მედიის წარმომადგენლების წინააღმდეგ; და ჩვენ ვგმობთ მუქარებს, რომლებიც პრეზიდენტ ზურაბიშვილისკენაა მიმართული.
როგორც საქართველოს დიდი ხნის მეგობრები და ქართველი ხალხის ევროპული მისწრაფებების მხარდამჭერები, ჩვენ შეშფოთებულები ვართ უფრო ღრმა პოლარიზაციისა და კრიზისისკენ მიმართული ქვეყნის გზით.
საქართველოს სასწრაფოდ სჭირდება კრიზისიდან გამოსასვლელი გზა და მის დემოკრატიულ ინსტიტუტებში საზოგადოების ნდობის აღდგენა. მოვუწოდებთ საქართველოს მთავრობას, მყისიერად გადადგას ნაბიჯები ამ მიმართულებით, მათ შორის, ეუთოს საარჩევნო რეკომენდაციების დანერგვითა და ამ რეკომენდაციებზე დაყრდნობით ახალი არჩევნების შესაძლებლობის განხილვით”. – წერია ერთობლივ განცხადებაში.
მოლდოვის პრეზიდენტი, მაია სანდუ X-ზე წერს:
“დღეს, როგორც ყოველთვის, ჩვენ ვდგავართ ქართველი ხალხის გვერდით მათ ბრძოლაში თავისუფლებისთვის, დემოკრატიისა და ევროპული მომავლისთვის. თქვენი სიმამაცე და მონდომება შთააგონებს ყველას და მოლდოვა თქვენს გვერდით რჩება ამ საერთო გზაზე.”
შვედეთის ყოფილი პრემიერ-მინისტრი და საგარეო ურთიერთობების საკითხებში ევროპული საბჭოს თანათავმჯდომარე, კარლ ბილდტი X-ზე წერს:
“კრიტიკული მომენტი საქართველოში, როდესაც ხარვეზიანი არჩევნების შემდეგ, რეჟიმმა თავისი მარიონეტი პრეზიდენტი დააყენა და ზურაბიშვილმა თან წაიღო ხალხის მხარდაჭერის პოლიტიკური ლეგიტიმაცია და ცარიელი სასახლე დატოვა.”
ლიტვის პრეზიდენტი გიტანას ნაუსედა X-ზე წერს:
“მორიგი დღე “ტრადიციულ” ევროპულ დემოკრატიაში, სადაც “ოცნების პარტიას” სერიოზულად ვერავინ აღიქვამს, ხოლო მხოლოდ საკუთარი პარტიის მიერ არჩეული და აღიარებული ადამიანის ინაუგურაცია ნახევრად საიდუმლო ცერემონიალით მოხდა. საქართველო, როგორც ჩანს, ან თავიდან განსაზღვრავს დემოკრატიის ცნებას, ან მთლიანად უგულებელყოფს პარლამენტისა და პრეზიდენტის იდეას.”
ნიდერლანდების საგარეო საქმეთა მინისტრი, კასპარ ველდკამპი X-ზე წერს:
“ჩემი შექება სალომე ზურაბიშვილს მისი სასიცოცხლოდ მნიშვნელოვანი ლიდერობისა და უდრეკი ერთგულებისა საქართველოს ევროპული კურსის მიმართ. უკვე ერთი თვეა, ქართველი ხალხი ქუჩებში მშვიდობიანად იცავს მათ დემოკრატიულ და ევროპულ მომავალს, ძალადობისა და მუქარის მიუხედავად.
არანაირ მთავრობას არ შეუძლია მათი ჩივილის უგულებელყოფა. OSCE/ODIHR-მა დაადასტურა სერიოზული საარჩევნო დარღვევები და სავარაუდო გაყალბებების არასაკმარისი გამოძიება. უკვე დროა, რომ საქართველოს მთავრობამ აღადგინოს საზოგადოების ნდობა, ეუთოს რეკომენდაციების დანერგვითა და ამ რეკომენდაციებზე დაყრდნობით ახალი არჩევნების შესაძლებლობის განხილვით.”
ლიეტუვის ყოფილი საგარეო საქმეთა მინისტრი და მოქმედი ელჩი შვედეთში, ლინას ლინკევიჩუსი X-ზე წერს:
“ჩვენ ძალიან ხშირად ვმარცხდებით, როდესაც ვერ ვიკავებთ ერთიან, ძლიერ პოზიციას გარდამტეხ მომენტში. ახლა ქართული დემოკრატიის დაცემა ხდება.
მხოლოდ ახალ თავისუფალ არჩევნებს შეუძლია ამ კრიზისის გადაჭრა. ჩვენ მკაფიოდ უნდა დავუჭიროთ მხარი საქართველოს პრეზიდენტს [სალომე ზურაბიშვილს] ქვეყნის ევროპულ გზაზე დატოვების მცდელობაში.”
ბუნდესტაგის საგარეო ურთიერთობათა კომიტეტის თავმჯდომარე, მიხაილ როთი X-ზე წერს:
“სალომე ზურაბიშვილმა გადაარჩინა საქართველოს ღირსება! არავინ უნდა აღიაროს საქართველოს ე.წ. ახალი პრეზიდენტი, ან მოახდინოს მისი ლეგიტიმაცია მიწვევით ან ვიზიტებით.
ის აირჩიეს დეპუტატებმა, რომლებმაც მანდატები გაყალბებული არჩევნებით მოიპოვეს. საქართველოს სჭირდება თავისუფალი და სამართლიანი არჩევნები, რაც შეიძლება მალე.”
ჰელსინკის კომისიის თავმჯდომარე, კონგრესმენი ჯო უილსონი X-ზე წერს:
“მომდევნო კვირას “ქართული კოშმარის არაღიარების აქტს” წარვადგენ, რომელიც აუკრძალავს შეერთებულ შტატებს საქართველოში არალეგიტიმური დიქტატორული რეჟიმის აღიარებას და აღიარებს სალომე ზურაბიშვილს, როგორც ერთადერთ ლეგიტიმურ ლიდერს საქართველოში მანამ, სანამ თავისუფალი და სამართლიანი არჩევნები არ იქნება ჩატარებული.”
ლატვიელი ევროპარლამენტარი რიჰარდს კოლსი X-ზე წერს:
“საქართველოში მასობრივი საპროტესტო აქციების 32-ე დღე. ისინი აგრძელებენ, სასტიკი დარბევების მიუხედავად. დღევანდელი ე.წ. ინაუგურაცია ქართული ოცნების მარიონეტი რეჟიმის მიერ დემოკრატიის შეურაცხყოფაა.
საქართველოს ერთადერთ ლეგიტიმურ პრეზიდენტად სალომე ზურაბიშვილი რჩება – ლიდერი, რომელიც ხალხის გვერდით დგას და არა მართ წინააღმდეგ.
რა უნდა გააკეთოს ევროკავშირმა:
არ აღიაროს ეს არალეგიტიმური რეჟიმი;
არანაირი ხელის ჩამორთმევა ან ლეგიტიმაცია;
ზურაბიშვილი ცნოს ლეგიტიმურ პრეზიდენტად;
დაასანქციროს ივანიშვილის და ქართული ოცნების მაღალჩინოსნები.
32 დღეა, ქართველები აჩვენებენ სიმამაცესა და სიმტკიცეს. ევროპა მათ გვერდით უნდა დადგეს.”
გერმანიის ბუნდესტაგის დეპუტატი, კნუტ აბრაჰამი X-ზე წერს:
“პატივცემულო მინისტრო ბერბოკ, ევროკავშირის კანდიდატ ქვეყანაში, საქართველოში სიტუაცია დღითიდღე უარესდება. ვაიმარის სამკუთხედის (საფრანგეთი, გერმანია, პოლონეთი) საგარეო საქმეთა მინისტრები ახლა თბილისში უნდა წავიდნენ. საქართველოს საკითხზე ევროპარლამენტის რეზოლუცია და ბალტიისპირეთის გამოცდილება წინსვლის გზას გვიჩვენებს.”
აშშ-ის არმიის თადარიგის გენერალმა ბენ ჰოჯესმა ამერიკის ხმასთან ინტერვიუში განაცხადა:
“უნდა ვთქვა, როგორი აღფრთოვანებული ვარ საქართველოს პრეზიდენტით [სალომე ზურაბიშვილით]. ის არის მაგალითი სიმამაცის, ძალისა და ნებელობისა დაუპირისპირდეს საქართველოს არალეგიტიმურ მთავრობას. რა თქმა უნდა, ვნერვიულობ იმაზეც, გარკვეულ დროს, ვინმემ რამე არ დაუშავოს მას.
ვფიქრობ, რომ მთელი დემოკრატიული სამყარო მზად უნდა იყოს და ძალიან ნათლად უნდა ვთქვათ, რომ ჩვენ მხოლოდ მას [სალომე ზურაბიშვილის] ვაღიარებთ ლეგიტიმურ პრეზიდენტად. იმ შემთხვევაში, თუ მას რამე მოუვა, ამაზე პასუხი უნდა აგონ.
სამწუხაროდ, ახლა ყველა ჩვენგანის ქვეყანაშიც ბევრი რამ ხდება. ამერიკა ძალაუფლების გადაცემის პროცესს გადის, ტრამპის ადმინისტრაციისგან გვესმის განცხადებები გრინლადიაზე, კანადაზე, პანამასა და მგავს თემებზე, როგორც ჩანს, სამწუხაროდ, ისინი შავი ზღვის რეგიონზე არ არიან ფოკუსირებული.”
