მიხეილ სააკაშვილი წყვეტს შიმშილს და თანახმაა გორის სამხედრო ჰოსპიტალში გადაიყვანონ
50-დღიანი შიმშილის შემდეგ, საქართველოს ყოფილი პრეზიდენტი, პატიმარი მიხეილ სააკაშვილი, წყვეტს შიმშილს და თანხმდება იუსტიციის სამინისტროს შეთავაზებას, ქალაქ გორის სამხედრო ჰოსპიტალში გადაიყვანონ.
ამის შესახებ მისმა ადვოკატმა, ნიკა გვარამიამ განაცხადა.
გვარამიამ თქვა, რომ ექს-პრეზიდენტ მიხეილ სააკაშვილს გორში დღესვე გადაიყვანენ. თუმცა, ზუსტად როდის, უსაფრთხოებიდან გამომდინარე, არ დააკონკრეტა. მან თქვა, რომ ექს-პრეზიდენტი შიმშილს გორის ჰოსპიტალში გადაყვანისთანავე შეწყვეტს.
ნიკა გვარამია, გლდანის მე-18 სამკურნალო დაწესებულებაში, მიხეილ სააკაშვილთან, დეტალების დასაზუსტებლად ბოლო რამდენიმე საათის განმავლობაში იმყოფებოდა.
“ჩვენთვის ჰოსპიტალი უცნობია, მიუხედავად იმისა, რომ სააკაშვილის აშენებულია. ვიცით, რომ მაღალტექნოლოგიურად აღჭურვილია. რა თქმა უნდა, ვფიქრობთ, რომ იქ მაღალკვალიფიციური ადამიანებიც არიან, თუმცა, ჩვენთვის მნიშვნელოვანია, რომ ვიცოდეთ დაზუსტებით“, – განაცხადა ნიკა გვარამიამ გლდანის ციხის საავადმყოფოდან გამოსვლის შემდეგ.
სააკაშვილის ადვოკატმა გლდანის ციხესთან შეკრებილებს სთხოვა, უსაფრთხოების მიზნით, დატოვონ ტერიტორია:
“მე მინდა ვთხოვო მედიის გარდა ყველას, რომ დატოვოს ტერიტორია, შეფერხებები არ შექმნას აქ დგომით. უბრალოდ, არ გამოვა დაწესებულებიდან რეანომობილი თუ აქ იქნება ადამიანების სიმრავლე, ეს მედიას არ ეხება ცხადია”, – თქვა გვარამიამ.
- იუსტიციის მინისტრმა მიხეილ სააკაშვილს გორის ჰოსპიტალში გადაყვანა შესთავაზა
- სააკაშვილის მდგომარეობა კრიტიკულია – რა წერია ექსპერტთა ჯგუფის დასკვნაში
ნიკა გვარამიამ მედიასთან პატიმარი ექს-პრეზიდენტის მორიგი წერილიც წაიკითხა.
წერილში სააკაშვილი წერს, რომ მადლობელია ყველასი, ვინც მისდამი სოლიდარობის ნიშნად შიმშილობდა, აქციაზე იდგა, პეტიციას ავრცელებდა ან სხვა ფორმით იბრძოდა; ექიმთა ჯგუფების, საქართველოშიც და მის ფარგლებს გარეთაც და იქვე, საზოგადოებას და ოჯახს ბოდიშს უხდის მიყენებული სტრესისთვის.
სააკაშვილი ამბობს, რომ ის დასთანხმდა მისივე აშენებულ ჰოსპიტალში გადასვლას, თუმცა, არ აპირებს შეეგუოს უკანონო პატიმრობას:
“მზად ვარ წარვდგე თუნდაც სპეციალურად შექმნილი, ოღონდ სამართლიანი სასამართლოს წინაშე და დავიცვა, ჩემი და ჩვენი ისტორიული სიმართლე. მათ შორის, იმ ადამიანების წინაშე, ვინც თავი დაჩაგრულად ჩათვალა, ან ვისაც რეალური ზიანი მიადგა ჩემი პრეზიდენტობის დროს.
მაგრამ, ეს ყველაფერი უნდა ჩატარდეს ეროვნული ღირსების და სამართლებრივი ნორმის განუხრელი დაცვით და მე დავემორჩილები ამგვარი სასამართლოს ნებისმიერ განაჩენს“, – წერს მიხეილ სააკაშვილი წერილში.
მიხეილ სააკაშვილი კიდევ ერთხელ უსვამს ხაზს, რომ თავს უკანონო პატიმრად მიიჩნევს და საზოგადოებას მიმართავს, რომ “ახლა მოშვების დრო არ არის”:
“ახლა კონსოლიდაციის დროა, არ შეუშინდეთ არც ზამთარს, არც რეჟიმის მუქარას, არ ჩავთვალოთ რომ რაიმე მნიშვნელოვანს მივაღწიეთ, მთავარი ჩვენი სამშობლოს გათავისუფლებაა. ბოლოს და ბოლოს რას ვითხოვთ ისეთს, რასაც არ ვიმსახურებთ“.
- სააკაშვილის საქმეები. რისთვის ზის ციხეში ყოფილი პრეზიდენტი
- არის თუ არა სააკაშვილი პოლიტიკური პატიმარი? რას ამბობენ იურისტები და უფლებადამცველები
მიხეილ სააკაშვილს გორის სამხედრო ჰოსპიტალში გადაყვანა იუსტიციის სამინისტრომ დღეს, 19 ნოემბერს შესთავაზა. ამ შეთავაზებამდე ერთი დღით ადრე, გლდანის ციხის საავადმყოფოში მყოფმა მიხეილ სააკაშვილმა, მცირე ხნით გონება დაკარგა.
სამინისტროს გადაწყვეტილების შემდეგ, გორის სამხედრო ჰოსპიტალში ჩავიდა საქართველოს ჯანდაცვის მინისტრი ეკატერინე ტიკარაძე.
მინისტრმა განაცხადა, რომ პატიმარ სააკაშვილს, ისევე როგორც ყველა მოშიმშილეს, მაქსიმალურ ყურადღებას აქცევდნენ. თუმცა, ამის მიუხედავად, ბოლო პერიოდში ბევრი დეპუტატის ჯანმრთელობა გაუარესდა. მინისტრმა დეპუტატების პროტესტის ამ ფორმას “შიმშილობის ეპიდემია” უწოდა:
“მან [სააკაშვილმა] დადო პირობა, რომ ამ ნიშნით ის შეწყვეტს შიმშილობას და შესაბამისად შიმშილობის ის კასკადი რომელიც გვქონდა მიღებული ასევე შეწყდება ქვეყანაში“,- განაცხადა მინისტრმა.
“მივესალმები ყოფილი პრეზიდენტის გადაყვანის გეგმას გორის სამხედრო ჰოსპიტალში, რადგან ეს არის ადგილი, რომელიც აკმაყოფილებას ყველა სტანდარტს, როგორც სამედიცინო, ასევე უსაფრთხოების მიმართულებით”, – ამ განცხადებით იუსტიციის სამინისტროს გადაწყვეტილებას საქართველოს პრეზიდენტი სალომე ზურაბიშვილი გამოეხმაურა.
იუსტიციის სამინისტროს გადაწყვეტილების შემდეგ, შიმშილობა შეწყვიტა “დროას” ლიდერმა, ქართველმა ოპოზიციონერმა ელენე ხოშტარიამ. ხოშტარია 17 დღე შიმშილობდა.
დეპუტატი გამოკვლევებისთვის კლინიკა “ნეო-ჰოსპიტალში” გადაიყვანეს. კლინიკის ექიმმა თქვა, რომ ხოშტარიას რეაბილიტაციას შესაძლოა რამდენიმე დღე, ან რამდენიმე კვირა დასჭირდეს. ეს მის ანალიზებზეა დამოკიდებული.
მიხეილ სააკაშვილის პოზიციის გასაჯაროების შემდეგ, შიმშილი შეწყვიტეს “ნაციონალური მოძრაობის” კოალიციაში მყოფმა, ოპოზიციონერმა დეპუტატებმა (9 დეპუტატი) და ასევე, ზუგდიდში, საკრებულოს ახლადარჩეულმა წევრებმა (4 წევრი).
პარტია „ლელოს“ ერთ-ერთმა ლიდერმა ბადრი ჯაფარიძემ კი თქვა, რომ ფრაქცია “ლელო” შეწყვეტს საპარლამენტო ბოიკოტს.
მიხეილ სააკაშვილის გადაწყვეტილების გაცნობის შემდეგ, დაიშალა ოპოზიციის ხალხმრავალი საპროტესტო აქციაც, რომელიც რუსთაველის გამზირზე იმართებოდა.
“ერთიანი ნაციონალური მოძრაობის” ლიდერმა, ნიკა მელიამ აქციის მონაწილეებს მადლობა გადაუხადა დაუღალავი ბრძოლისთვის და თქვა, რომ ბრძოლა გაგრძელდება:
“სახელმწიფოს გადამტრიალებელი ვინმე თუ არის, არის “ქართული ოცნება” ამიტომ მართლაც ქედს ვიხრი, მოვა დრო და ვილაპარაკებ კონკრეტული ფაქტებით რას გადავურჩით ჩვენ. ძალიან თხელ ყინულზე ვიარეთ თითოეულმა ჩვენგანმა.
მთავარი თავგადასავალი გველოდება წინ – სანამ მიხეილ სააკაშვილი ამ უკანონო პატიმრობიდან არ იქნება დახსნილი, ბრძოლას არ შევაჩერებთ, სანამ მიტაცებული სახელმწიფო ქართულ ოცნებას” ექნება, ბრძოლას არ შევაჩერებთ. ჩვენ მარტო არ ვართ, ჩვენი ევროპელი და ამერიკელი პარტნიორები არიან ჩვენ გვერდით“, – განაცხადა ნიკა მელიამ.
საქართველოს მესამე პრეზიდენტი მიხეილ სააკაშვილი, რომელიც ხელისუფლებას ძებნილად ჰყავდა გამოცხადებული, საქართველოში ფარულად დაბრუნდა. 1 ოქტომბერს ის დააკავეს და გლდანის ციხეში გადაიყვანეს.
დაპატიმრებისთანავე ყოფილმა პრეზიდენტმა პროტესტის ნიშნად შიმშილობა დაიწყო. სააკაშვილი თავს პოლიტიკურ, უფრო კონკრეტულად კი რუსეთის პრეზიდენტის ვლადიმერ პუტინისა და საქართველოს არაფორმალური მმართველის ბიძინა ივანიშვილის პატიმრად მიიჩნევს.
ყოფილი პრეზიდენტი 50 დღე შიმშილობდა. ბოლო ორი კვირა ის აღარ იღებდა აღარც სამკურნალო მედიკამენტებს. მისი მდგომარეობა დღითიდღე უარესდებოდა. ექიმთა ჯგუფმა, რომელიც სახალხო დამცველმა შექმნა, მისი მდგომარეობა კრიტიკულად შეაფასა.
საქართველოს სამოქალაქო სექტორი, დიპლომატები, რიგითი მოქალაქეები, მსახიობები, მწერლები და საზოგადოების სხვა ცნობილი სახეები ხელისუფლებას ექს-პრეზიდენტის მრავალპროფილურ კლინიკაში გადაყვანას სთხოვდნენ. ამ მოთხოვნით ხელისუფლებას მიმართა საქართველოს სახალხო დამცველმა, სახელმწიფო ინსპექტორის აპარატმა. გუშინ განცხადება გაავრცელა აშშ-ს სახელმწიფო დეპარტამენტმა.
გარდა ამისა, არსებობდა სტრასბურგის ადამიანის უფლებათა სასამართლოს 10 ნოემბრის გადაწყვეტილება. სასამართლომ მიხეილ სააკაშვილს შიმშილის შეწყვეტისკენ მოუწოდა, სახელმწიფოს კი დაავალა, უზრუნველეყო პატიმრის უსაფრთხოება და ადეკვატური მკურნალობა.
ამ ყველაფრის მიუხედავად, ხელისუფლების წევრები ამ დრომდე ირწმუნებოდნენ, რომ მიხეილ სააკაშვილის შიმშილი “ფეიკი” იყო კატეგორიულ უარს აცხადებდნენ მის სამოქალაქო, მრავალპროფილურ კლინიკაში გადაყვანაზე.
