მიგრანტების შემოდინებამ საქართველოს ეკონომიკაზე დადებითად იმოქმედა, თუმცა ეს ერთჯერადი ეფექტია - ADB

მიგრანტების შემოდინება საქართველოში

აზიის განვითარების ბანკის (ADB) ერთ-ერთი მაღალჩინოსანი ლიაზიზა საბიროვა ამბობს, რომ მიგრანტების შემოდინებამ საქართველოს ეკონომიკაზე დადებითად იმოქმედა, თუმცა ეს ერთჯერადი ეფექტია. ამის შესახებ საბიროვამ აზიის განვითარების ბანკის 55-ე წლიურ შეხვედრაზე განაცხადა.

საბიროვას განმარტებით, მიგრაციის პირველი ტალღის დროს “ჩვენს ქვეყნებში შემოსული რუსები” ძირითადად IT სპეციალისტები იყვნენ, ისინი შესაბამისი სახსრებითაც ჩამოვიდნენ და ახალი ბიზნესებიც დაიწყეს, რამაც სამხრეთ კავკასიის ეკონომიკებზე, საქართველოსა და სომხეთზე დადებითად იმოქმედა. მისივე თქმით, აზიის განვითარების ბანკმაც ამ ქვეყნების ეკონომიკური ზრდის პროგნოზი თითქმის გააორმაგა და 7 პროცენტამდე გაზარდა, “თუმცა, სავარაუდოდ, ეს მხოლოდ ერთჯერადი ეფექტია და ბევრი იქნება დამოკიდებული რუსეთის ეკონომიკურ მდგომარეობაზე სამომავლოდ.”

რეგიონული თანამშრომლობისა და ოპერაციების კოორდინაციის დირექტორმა ცენტრალურ და დასავლეთ აზიაში აღნიშნა ისიც, რომ მიგრანტების მეორე ტალღა პირველისგან სხვადასხვა ასპექტითაა განსხვავებული, მათ შორის, დემოგრაფიითა და სტატუსით, ხოლო ამ პროცესების გავლენას ეკონომიკაზე სამომავლოდ ბევრი ფაქტორი განაპირობებს, რასაც ქართველმა ეკონომისტებმა თვალი უნდა მიადევნონ:

“წელს ჩვენ ტურისტების დიდი რაოდენობა ვნახეთ საქართველოში და არა მხოლოდ რუსეთიდან. მართალია, ტურიზმის დონე ჯერ პოსტპანდემიურ დონეზე არაა, თუმცა აღდგენის გზას ადგას. რა მოხდება ეკონომიკაში სამომავლოდ, დამოკიდებული იქნება ბევრ ფაქტორზე, რომელთა ნაწილი ეკონომიკურ ზრდასა და ბიზნეს აქტივობას წაადგება, ნაწილი კი პირიქით იმოქმედებს.“

● როგორ ხვდება საქართველო რუსეთიდან და ბელარუსიდან ემიგრანტებს
● “თითქოს ომი კიდევ ერთხელ დაიწყო” – რას ფიქრობენ მობილიზაციაზე საქართველოში მცხოვრები რუსები
● მექსიკის გავლით ამერიკაში – სად და რატომ გარბიან ქართველები

აზიის განვითარების ბანკმა 21 სექტემბერს გამოაქვეყნა კავკასიის რეგიონისთვის განახლებული პროგნოზები, რომელთა თანახმადაც, მიმდინარე წელს საქართველოს ეკონომიკა 7 პროცენტით, მომავალ წელს კი 6 პროცენტით გაიზრდება. რაც შეეხება ინფლაციას, ADB 2022-ში სამომხმარებლო ფასების 11 პროცენტიან ზრდას ვარაუდობს წლიურ ჭრილში, 2023-ში კი ინფლაციის მაჩვენებელი 5 პროცენტამდე უნდა შემცირდეს.

აღსანიშნავია ისიც, რომ საქსტატის მონაცემებით, 2022 წლის პირველ კვარტალში საქართველოს ეკონომიკის საშუალო ზრდამ 14.4 პროცენტი შეადგინა, რაც საბაზისო 2019 წელთან შედარებით ქვეყნის ეკონომიკის ზრდის 11.9 პროცენტიანი მაჩვენებელია. ამ შედეგით საქართველო სამხრეთ კავკასიაში ეკონომიკური ზრდის ტემპით ლიდერია.

მიუხედავად ეკონომიკური ზრდის სწრაფი დინამიკისა, საქართველოში პროდუქტებზე ფასები კატასტროფულად იზრდება. მწარმოებლები გაზრდილ ფასებს რუსეთის მიერ უკრაინაში შეჭრას, რუსეთიდან გაძნელებული ლოგისტიკას და მსოფლიო ბაზარზე პროდუქციასა და ნედლეულზე გაზრდილი ფასებს უკავშირებენ.

საქართველოს მთავრობაც გაზრდილ ფასებს და ინფლაციას უკრაინაში რუსეთის შეჭრას აბრალებს. საქართველოს პრემიერმინისტრმა ირაკლი ღარიბაშვილმა განაცხადა, რომ ინფლაციის მაჩვენებლებმა არაერთ ქვეყანაში პროგნოზირებულ მაჩვენებელს გადააჭარბა.