მოსაზრება: პუტინი ტრამპს იყენებს, ევროპა ყურადღებით უნდა იყოს
აშშ-ში, მაღაზიებში დაიწყო იმ წიგნის გავრცელება, რომლის აკრძალვასაც აქტიურად ცდილობდა პრეზიდენტი დონალდ ტრამპი.
ეს არის ეროვნული უსაფრთხოების საკითხებში ტრამპის ყოფილი მრჩევლის, ჯო ბოლტონის მემუარები, რომელშიც მოყვანილია პრეზიდენტთან დაკავშირებული ბევრი სკანდალური ფაქტი.
ტრამპის ადმინისტრაციამ და იუსტიციის სამინისტრომ სასამართლოს „მთელი ქვეყნის მასშტაბით ტირაჟის კონფისკაციისა და მისი განადგურების“ თხოვნით მიმართეს, მაგრამ ფედერალურმა მოსამართლემ, როის ლამბერტმა ამაზე უარი განაცხადა, ამის შესახებ CNN იუწყება.
წიგნს ჰქვია „ოთახი, სადაც ეს მოხდა“.
ჯო ბოლტონს ეროვნული უსაფრთხოების საკითხებში აშშ-ის პრეზიდენტის მრჩევლის პოსტი 2018 წლის აპრილიდან 2019 წლის სექტემბრამდე ეკავა. მისმა მოგონებებმა 592 გვერდი დაიკავა.
ბოლტონი ასეთ ისტორიებსაც ჰყვება.
საკონცენტრაციო ბანაკები ჩინეთში – „სწორი ნაბიჯი“
2019 წელს, ჩინეთის ხელმძღვანელობასთან შეხვედრისას ტრამპმა მოიწონა ჩინეთში საკონცენტრაციო ბანაკების მშენებლობა, რომელშიც მუსლიმი უმცირესობის – უიღურების წარმომადგენლები ჰყავთ დაკავებული.
“სწორი ნაბიჯი”, — განაცხადა ტრამპმა, წერს ბოლტონი.
აშშ, აჯანყება: რატომ არიან გენერლები და ყოფილი პრეზიდენტები ტრამპის წინააღმდეგ
ტრამპი არაბეთ-ისრაელის კონფლიქტის დარეგულირების ახალი გეგმით გამოვიდა
50 ადამიანი, რომლებმაც „ათწლეულის სახე განსაზღვრეს“ – Financial Times-ის ვერსია
ასევე, 2019 წელს, იაპონიაში, მსოფლიო ლიდერების შეხვედრაზე, ტრამპმა „ყველას გასაკვირად“ ჩინეთის ლიდერთან, სი ძინპინთან აშშ-ის მომავალ საპრეზიდენტო არჩევნებზე (2020 წლის შემოდგომის) დაიწყო საუბარი.
ტრამპმა განაცხადა, რომ გამარჯვებისთვის მას ძალიან სჭირდება სასოფლო-სამეურნეო საქმიანობით დაკავებული შტატების ამომრჩევლის მხარდაჭერა და ჩინეთის ლიდერს მოუწოდა, გაეზარდა ამერიკული მარცვლეულისა და სოიოს შესყიდვა.
სანაცვლოდ, ტრამპი დათმობას დაჰპირდა აშშ-სა და ჩინეთს შორის ახალი სავაჭრო შეთანხმების შესახებ მოლაპარაკების პროცესში.
რუსეთისა და ჩრდილოეთ კორეის ლიდერები ტრამპით მანიპულირებენ
აშშ-ის პრეზიდენტმა არ იცოდა, რომ დიდი ბრიტანეთი ბირთვულ შეიარაღებას ფლობდა და მაშინდელ პრემიერ-მინისტრთან, ტერეზა მეისთან შეხვედრისას გაკვირვებულმა იკითხა: „ა, თქვენ ბირთვული სახელმწიფო ხართ?“.
ამასთან, მან თეთრი სახლის ადმინისტრაციის მაშინდელ ხელმძღვანელს, ჯონ კელის ჰკითხა, შედიოდა თუ არა ფინეთი რუსეთის შემადგენლობაში.
ეს შეკითხვა აშშ-ის პრეზიდენტმა 2018 წლის ზაფხულში, ჰელსინკიში, ვლადიმირ პუტინთან შეხვედრის წინა დღეს დასვა. მოლაპარაკებების შემდეგ ტრამპმა განაცხადა, რომ ამერიკის არჩევნებში რუსეთის შესაძლო ჩარევის საქმეზე საუბრისას, მას უფრო მეტად რუსეთის ფედერაციის პრეზიდენტის სჯერა, ვიდრე საკუთარი დაზვერვის სამსახურების.
“როგორც ჩანს, პუტინი ხმამაღლა იცინოდა, როდესაც იმას აფასებდა, თუ რას მიაღწია ჰელსინკიში”, — წერს ბოლტონი.
ბოლტონი ასევე ამტკიცებს, რომ ტრამპი ღიად უკავშირებდა უკრაინისთვის ამერიკული დახმარების გამოყოფას ამ ქვეყნის მიერ საპრეზიდენტო არჩევნებზე მისი პოტენციური მოწინააღმდეგის, ჯო ბაიდენის წინააღმდეგ გამოძიებას.
თავის წიგნში, ბოლტონი დემოკრატებს აკრიტიკებს და ამტკიცებს, რომ მთელი იმპიჩმენტის პროცესი არასწორად იყო აგებული.
“ტრამპს საკუთარი პოსტი უნდა დაეტოვებინა არა უკრაინასთან დაკავშირებული სკანდალის, არამედ საერთოდ საგარეო-პოლიტიკური გადაწყვეტილებების გამო”, — წერს ბოლტონი.
ბოლტონის აზრით, ისეთი ავტორიტარული ლიდერები, როგორებიც ვლადიმირ პუტინი და კიმ ჩენ ინი არიან, „ოსტატურად მანიპულირებენ“ პრეზიდენტ ტრამპით.
დონალდ ტრამპმა, წიგნზე რეაგირებისას, მას შემდეგ, რაც მისი აკრძალვა ვერ მოახერხა, ბოლტონს „მატყუარა“ და „ის ადამიანი უწოდა, რომელმაც არასანქცირებულად გაახმაურა საიდუმლო ინფორმაცია“.
კომენტარები ევროპიდან
Simon Tisdall, The Guardian
ტრამპმა დაანგრია თანამშრომლობა ევროპასთან ისრაელსა და პალესტინაში, ირანში, ჩინეთში, საერთაშორისო სისხლის სამართლის სასამართლოს მიმართ, რომლის განადგურებაც, როგორც ჩანს, სურს.
ტრამპმა საშინელი პანდემიის შუა პერიოდში, დაფინანსება შეუწყვიტა ჯანდაცვის მსოფლიო ორგანიზაციას.
ახლა მას ახალი გეგმა აქვს – გამოიყვანოს ამერიკელი სამხედროები გერმანიიდან და ამით იქ რუსეთის პოზიციები გაამყაროს.
ტრამპი პუტინს ელაქუცება და ფეხებს ულოკავს.
ხედავს თუ არა ტრამპი წინააღმდეგობას იმაში, რომ სულ რაღაც ერთი წლის წინ, ის ფსონს ჩინეთის ლიდერზე აკეთებდა, ახლა კი ჩინეთს უტევს და ცდილობს, მას დააკისროს პასუხისმგებლობა ამერიკაში კორონავირუსის პანდემიის კატასტროფულ შედეგებზე?
ანაღვლებს თუ არა ტრამპს შესაძლო შედეგები? ან რას ფიქრობს მასზე მსოფლიო? ან რას ამბობს აშშ-ის კონსტიტუცია?
არა. ერთადერთი, რასაც მისთვის მნიშვნელობა აქვს – ეს არის არჩევნებში გამარჯვება.
ეს ყველაფერი ერთად ქმნის შთაბეჭდილებას, რომ აშშ ნელ-ნელა უგულებელყოფს ევროპის ინტერესებს. ეს ყველაფერი გამწვავდება, დღეიდან დაწყებული 2020 წლის ნოემბრის ჩათვლით, როდესაც ნათელი გახდება, დარჩება თუ არა დონალდ ტრამპი აშშ-ის პრეზიდენტის პოსტზე.
