დმიტრი მედვედევი საქართველოს ოკუპირებული ტერიტორიების რუსეთთან შეერთებას არ გამორიცხავს

მედვედევი საქართველოს ოკუპირებულ ტერიტორიებზე

რუსეთის ფედერაციის უშიშროების საბჭოს თავმჯდომარის მოადგილემ და რუსეთის ყოფილმა პრეზიდენტმა, დმიტრი მედვედევმა გამოაქვეყნა სტატია, რომელშიც საქართველოს ოკუპირებული ტერიტორიების რუსეთთან შეერთებით იმუქრება და ამბობს, რომ აფხაზეთსა და სამხრეთ ოსეთში რუსეთთან შეერთების იდეა ძველებურად პოპულარულია.

“არ გვჭირდება 2008 წლის ისტორიის გამეორება. ძველებურად მზად ვართ პრობლემები მოლაპარაკებების მაგიდასთან, გაეროს წესდების სულისკვეთებით გადავჭრათ. მაგრამ თუ ჩვენი შეშფოთება რეალურად გამოიკვეთება, არ დავაყოვნებთ. აფხაზეთსა და სამხრეთ ოსეთში რუსეთთან შეერთების იდეა ძველებურად პოპულარულია. და სავსებით შეიძლება მისი რეალიზება, თუ საფუძვლიანი მიზეზები გაჩნდება”. – წერს მედვედევი სტატიაში.

მისივე მტკიცებით, საქართველო მრავალი წლის განმავლობაში “ახდენდა ოსი ერის შეუფარავ გენოციდს”, ხოლო 2008 წლის მოვლენებში მედვედევი ქართულ მხარეს ადანაშაულებს აგრესიაში და ამბობს, რომ ამ “აგრესიის” მიზანი “დაუმორჩილებელი სამხრეთ ოსეთის მტრულ სახელმწიფოს საზღვრებში დაბრუნება” იყო:

 “კარგია, რომ ასეთი მოვლენები, თუ ისინი ხდება, მტრულად განწყობილი დამკვირვებლებისთვის გაკვეთილია. სამწუხაროდ არა, ეს არ მომხდარა. და უკეთესი გამოყენების ღირსი დასავლური მსოფლიო ჯიუტად, ისევ და ისევ ერთსა და იმავე შეცდომას იმეორებს. უცვლელი და კარგად განჭვრეტადი რეზულტატით”.

● სამხრეთ ოსეთი რუსეთის შემადგენლობაში: ისევ აქტუალურია ეს თემა?
● ცხინვალი რუსეთისკენ მიისწრაფვის, მაგრამ მას იქ არ ელიან. რატომ და რას უნდა ველოდოთ?
● მოსაზრება: აფხაზეთის ხელისუფლება ინერტულია

მედვედევი აღნიშნავს, რომ NATO რუსეთის წინააღმდეგ უკრაინაში აწარმოებს “ჰიბრიდულ, მაგრამ აბსოლუტურად სრულმასშტაბიან და სისხლისმღვრელ ომს” და კიევი ისევე დამარცხდება, როგორც “თავის დროზე ქართველი აგრესორები” დამარცხდნენ.

რუსეთის ყოფილი პრეზიდენტი ასევე იმუქრება, რომ მომავალში შესაძლებელია “საბჭოთა კავშირის ნამსხვრევებზე ხელოვნურად შექმნილი სახელმწიფო უკრაინა მსოფლიოს პოლიტიკური რუკიდან საერთოდ გაქრეს.” 

მედვედევისვე მტკიცებით, 2008 წელს თბილისის მიმართულებით იერიში რუსეთმა მას შემდეგ შეაჩერა, რაც საფრთხე უვნებელყო და უსაფრთხოების გარანტიები შექმნა. მის სტატიაში საუბარია ე.წ. მეორე ფრონტზეც.

“დასავლეთმა კიდევ ერთი მნიშვნელოვანი გაკვეთილი უნდა ისწავლოს. 2008 წელს ჩვენ შევაჩერეთ იერიში თბილისისკენ, როცა გაჩენილი საფრთხეების აღმოფხვრა და უსაფრთხოების გარანტირება მოვახერხეთ. მაგრამ ვითარებას კვლავ აქტიურად ძაბავენ – როგორც ჩანს, იმისთვის, რომ ჩვენს საზღვრებთან, უკრაინის ფლანგის მისამატებლად, დაძაბულობის მორიგი კერა შექმნან. კვლავ მიდის საუბარი საქართველოს NATO-ში შესაძლო გაწევრიანებაზე. ბრძანებისამებრ, ამ ქვეყანაში რუსოფობიური ნაპერწკლები გაჩნდა”. – წერს მედვედევი.

● “ამაში ყველაზე საშიში ის არის, რომ კრემლი ნამდვილად ასე ფიქრობს” – კომენტარი
● რა გამოხმაურება მოჰყვა მედვედევის პოსტს, სადაც ეწერა, რომ საქართველო რუსეთის ნაწილი უნდა გახდეს

საგარეო უწყების გამოხმაურება

საქართველოს საგარეო საქმეთა სამინისტროს პრესისა და ინფორმაციის დეპარტამენტი დმიტრი მედვედევის განცხადებას ეხმაურება და განმარტავს, რომ ეს რუსეთის მხრიდან საქართველოს ტერიტორიების ოკუპაციის პოლიტიკის გაგრძელებას წარმოადგენს.

“2008 წლის აგვისტოს ომის 15 წლისთავზე, რუსეთის უშიშროების საბჭოს მდივნის მოადგილის მიერ გაკეთებული განცხადება წარმოადგენს რუსეთის ფედერაციის მხრიდან საქართველოს ტერიტორიების ოკუპაციის პოლიტიკის გაგრძელებას და სუვერენიტეტისა და ტერიტორიული მთლიანობის ხელყოფის მორიგ მცდელობას.

მოვუწოდებთ რუსეთის ფედერაციას, პატივი სცეს საერთაშორისო სამართლის ფუნდამენტურ პრინციპებსა და ნორმებს და შეასრულოს 2008 წლის 12 აგვისტოს ცეცხლის შეწყვეტის შეთანხმება.

საქართველო განუხრელად ადგას კონფლიქტის მშვიდობიანი მოგვარების პოლიტიკას და ამ გზით საქართველოს ტერიტორიების დეოკუპაციის უზრუნველყოფას და ომის შედეგად დაშორიშორებულ მოსახლეობას შორის შერიგების და მშვიდობიანი თანაცხოვრების უზრუნველყოფას”, – აცხადებენ უწყებაში.

___________

2022 წლის პირველ ივნისს ცნობილი გახდა, რომ რუსეთთან შეერთების შესახებ რეფერენდუმი, რომელიც ე.წ. სამხრეთ ოსეთის უკვე ყოფილმა პრეზიდენტმა ანატოლი ბიბილოვმა 17 ივლისისთვის ჩანიშნა, აღარ ჩატარდება.

ახლად არჩეული პრეზიდენტი ალან გაგლოევი ამ იდეისადმი თავდაპირველად კრიტიკულად იყო განწყობილი. მაშინ, ჯერ კიდევ ოპოზიციის ლიდერმა და პარტია “ნიხასის” ხელმძღვანელმა, გაგლოევმა ბიბილოვი „წინასაარჩევნო პიარისთვის“ მკაცრად გააკრიტიკა. მაგრამ, საბოლოოდ, ინიციატივის ბედი მაშინ მოსკოვის კატეგორიულმა, უარყოფითმა რეაქციამ გადაწყვიტა.

რეფერენდუმს უნდა განესაზღვრა, სურს თუ არა ცხინვალის მოსახლეობას რუსეთის შემადგენლობაში შესვლა თუ ურჩევნია დარჩეს დამოუკიდებელი სახელმწიფოს სტატუსით, რომელიც აღიარა რუსეთმა და კიდევ ოთხმა ქვეყანამ (ნიკარაგუა, ნაურუ, ვენესუელა და სირია). დანარჩენი მსოფლიო და გაერო განაგრძობს მის საქართველოს ტერიტორიად განხილვას.

ეს ცხინვალის უკვე მეხუთე მცდელობა იყო შესულიყო რუსეთის შემადგენლობაში საბჭოთა კავშირის დაშლისა და 1990-იანი წლების დასაწყისში შეიარაღებული კონფლიქტის დაწყების შემდეგ.