საქართველოს პარლამენტმა მედიკამენტებზე ზღვრული ფასების დაწესებას მხარი დაუჭირა

მედიკამენტებზე ზღვრული ფასების დაწესება

საქართველოს პარლამენტმა მხარი დაუჭირა მთავრობის ინიციატივას, რომელიც წამლებზე რეფერენტული ფასების, ანუ სახელმწიფოს მიერ განსაზღვრული მაქსიმალური ფასის დაწესებას გულისხმობს.

“წამლისა და ფარმაცევტული საქმიანობის შესახებ” საქართველოს კანონში ცვლილების შეტანის თაობაზე პარლამენტმა კანონპროექტი პირველი მოსმენით, 75 ხმით მიიღო.

წამლებზე რეფერენტული ფასები 2023 წლიდან დაწესდება და სახელმწიფო ღირებულების იმ მაქსიმალურ ზღვარს დაადგენს, რომელზე ძვირადაც დაუშვებელი იქნება მედიკამენტის რეალიზაცია.

“ცვლილებები ეხება ქვეყანაში მედიკამენტებზე ხელმისაწვდომობის გაუმჯობესებისათვის რეფერენტული ფასების მექანიზმის შემოტანას. რეფერენტული ფასი ითვალისწინებს მედიკამენტების ფასზე იმ ზედა ზღვრული მაჩვენებლის დაწესებას, რის ზემოთაც ბაზარზე მედიკამენტის რეალიზაცია დაშვებული არ იქნება“, – განაცხადა პარლამენტში ჯანდაცვის მინისტრის მოადგილემ, თამარ გაბუნიამ.

რეფერენტული ფასები პირველ ეტაპზე დაახლოებით 1000-1200 მედიკამენტს შეეხება. ხოლო ამ მექანიზმის შემოტანა, როგორც თამარ გაბუნია აღნიშნავს, დღეს ბაზარზე არსებული მედიკამენტების ფასებს სავარაუდოდ 40%-ით შეამცირებს.

საქართველოს მთავრობის გადაწყვეტილებით, იანვრიდან რეფერენტული ფასები ქრონიკული და ონკოლოგიური დაავადებების სამკურნალო მედიკამენტებს შეეხება, მეორე კვარტლიდან ნებისმიერ სხვა სარეცეპტო მედიკამენტს, ხოლო წლის ბოლომდე ყველაზე გავრცელდება.

ჯანდაცვის მინისტრის განმარტებით, პირველ ეტაპზე სახელმწიფოს დადგენილი ფასების დამრღვევს გაფრთხილებენ, ხოლო მეორე ეტაპზე ჯარიმა დაეკისრება. 

როგორც აზარაშვილი ამბობს, ქვეყნების იდენტიფიცირება, რომელთა საფუძველზეც რეფერენტული ფასის განსაზღვრა მოხდება, ახლა მიმდინარეობს. შეირჩევა 4-5 ქვეყანა, რის შემდეგაც განისაზღვრება მაქსიმალური ზღვარი მედიკამენტების გასაყიდ ფასთან დაკავშირებით.

28 ნოემბერს, საქართველოს პრემიერმინისტრმა ირაკლი ღარიბაშვილმა მთავრობის სხდომაზე განაცხადა, რომ PSP-ს აფთიაქებს ხალხი შეცდომაში შეჰყავს რასაც შესაბამისი რეაგირება მოჰყვება.

“მაგალითად, როცა მომხმარებელი შედის და კონკრეტული წამლის ყიდვას ითხოვს (ვიცი, რომ დავალებაა ასეთი, ეს ინფორმაცია არსებობს და ამას, რა თქმა უნდა, გადამოწმება სჭირდება) გამყიდველი ეუბნება – რომელი გნებავთ, ხარისხიანი ძვირიანი, თუ უხარისხო თურქული? ამას რა ჰქვია, თუ არა მომხმარებლის შეცდომაში შეყვანა. ეს პირდაპირ არის მტრობა.” – განმარტა ღარიბაშვილმა.

● “დედა თითქოს პატარა გოგო იყო, ასე გრძნობდა თავს”. როგორ ცხოვრობენ საქართველოში ადამიანები დემენციით
● თბილისში 5 აფთიაქის ხელმძღვანელი “სააფთიაქო ნარკომანიის” საქმეზე დააკავეს
● “ერთი გოგო მთელი დღე იდგა და ტიროდა” – კოვიდ-კლინიკაში მომუშავე ექიმების და ექთნების მონოლოგები

წამლის ფასების შესახებ საქართველოში უკვე დიდი ხანია საუბრობენ. წამლები საქართველოში რეგიონის სხვა ქვეყნებთან შედარებით ერთ-ერთი ყველაზე ძვირია. ჯანდაცვის ყოფილი მინისტრი, ეკატერინე ტიკარაძე 2021 წლის ნოემბერში ამბობდა, რომ წამლის ფასი მოსახლეობისთვის დიდი ტვირთია და “ჯანდაცვის სამინისტრო პრობლემის აღმოსაფხვრელად აქტიურ რეჟიმში იწყებს მუშაობას.”

იმავე 2021 წელს კონკურენციის სააგენტომ გამოაქვეყნა ანგარიში, რომლის მიხედვით, მედიკამენტებზე მაღალი დანახარჯები მომხმარებლების ნაკლები ინფორმირებულობითაა განპირობებული, რადგან შედარებით იაფი გენერიკული ჩამნაცვლებელი მედიკამენტების არსებობის შესახებ მომხმარებლებს ინფორმაცია არ აქვთ. 

“გენერიკული მედიკამენტები” საერთაშორისო სახელწოდებით გამოშვებული წამლებია, რომელიც მოქმედების მექანიზმით არ განსხვავდება ფარმაცევტული ფირმების მიერ დაპატენტებული სხვადასხვა სახელწოდებით წარმოებული მედიკამენტებისგან. განსხვავება მხოლოდ ფასშია: “გენერიკული მედიკამენტები” უფრო იაფია და ამდენად, უფრო ხელმისაწვდომი ფართო საზოგადოებისთვის.

სააგენტომ 6 ჯგუფის მედიკამენტების ანალიზის შედეგად დაადგინა, რომ ბრენდირებული მედიკამენტების გენერიკებით ჩანაცვლების შემთხვევაში, პაციენტი 2016-2020 წლებში საშუალოდ 16 მილიონ ლარს დაზოგავდა.