მედიების წინააღმდეგ კრიტიკული სარჩელების უმეტესობა ქართული ოცნებიდან შევიდა - TI
გაზიარება
გაზიარება
მედიების წინააღმდეგ კრიტიკული სარჩელების უმეტესობა ქართული ოცნებიდან შევიდა
საერთაშორისო გამჭვირვალობა – საქართველოს (TI)ცნობით, გასულ ერთ წელში კრიტიკული მედიის წინააღმდეგ 28 სარჩელი შევიდა და ეს სარჩელები მთავარი არხის, ტვ პირველისა და ფორმულას წინააღმდეგ იყო.
როგორც ორგანიზაციაში განმარტავენ, მომჩივნების დიდი ნაწილი მმართველი პარტიის წარმომადგენლები და მათთან დაახლოებული პირები არიან. განცხადებაში აღნიშნულია, რომ დროის მცირე მონაკვეთში კრიტიკული მედიის წინააღმდეგ სარჩელების სიმრავლე “აშკარად კოორდინირებულ ტენდენციაზე მიანიშნებს”, რაც მედიის საქმიანობის შეზღუდვასა და დაშინებას ისახავს მიზნად:
“სამწუხაროა, სასამართლო პრაქტიკის ცვლილებაც, მაგალითად, კანონმდებლობით დადგენილი ცალსახა ჩანაწერის მიუხედავად, მტკიცების ტვირთი ჟურნალისტზე გადადის.”
TI-ს აკონკრეტებს, რომ ამ ტენდენციის გაგრძელებაა 15 ათასი ლარის ჯარიმის დაკისრება ჟურნალისტზე, რომლის გადახდაც სასამართლომ ტვ პირველთან ერთად ჟურნალისტ მაია მამულაშვილსაც დაავალდებულა. არასამთავრობო ორგანიზაციის შეფასებით, თბილისის საქალაქო სასამართლოს გადაწყვეტილება ტვ პირველზე და ჟურნალისტ მაია მამულაშვილზე ბოლო პერიოდში მედიაზე ზეწოლის საშიში ტენდენციის ახალ ეტაპზე გადასვლაა. TI-ის განცხადებით, ხელისუფლების წარმომადგენლები სასამართლოს კრიტიკული მედიის შესავიწროებლად იყენებენ.
“ქართული მედია გარემო, განსაკუთრებით კი კრიტიკული სარედაქციო პოლიტიკის წარმომადგენლების საქმიანობა სასიცოცხლო გამოწვევების წინაშე დგას. ჟურნალისტების წინააღმდეგ ფიზიკური ძალადობის, მასობრივი უკანონო მოსმენებისა თუ მიზანმიმართული დეზინფორმაციის პარალელურად, ბოლო პერიოდში მმართველი პარტიის მხრიდან ხდება სასამართლო ხელისუფლების ბოროტად გამოყენება.” – ვკითხულობთ განცხადებაში.
30 ნოემბერს სასამართლომ TV პირველსა და ჟურნალისტ მაია მამულაშვილს 15 ათასი ლარის გადახდა დააკისრა. ინფორმაცია ამის შესახებ არხის საინფორმაციო სამსახურის უფროსმა, ნოდარ მელაძემ გაავრცელა.
კახა კალაძემ საქალაქო სასამართლოს რამდენიმე თვის წინ მიმართა. მორალური ზიანის ანაზღაურებისთვის ის 100 ათას ლარს მოითხოვდა. კალაძე ჟურნალისტის მიერ, მისი აზრით, ცილისმწამებლური ცნობის უარყოფასაც ითხოვდა.
საქმე ეხებოდა მაია მამულაშვილის მიერ გავრცელებულ ინფორმაციას კახა კალაძის მიერ ტენდერებში სავარაუდო კორუფციულ გარიგებას.
“იმის გამო რომ, კახი კალაძეს მაია მამულაშვილის დასმული კითხვა არ მოეწონა, სასამართლომ პირველს და მაია მამულაშვილს დააკისრა 15 ათასი ლარის გადახდა. TV პირველი ამ თანხას ვერ გადაიხდის, რადგან ანგარიშებს ადევს ინკასო. შესაბამისად შემდეგ ნაბიჯი იქნება კალაძე აღსრულებას მიმართავს, რომ ტელევიზიიდან კამერები წაიღოს, ან მაია მამულაშვილის სახლიდან, ამ თანხის ოდენობის ნივთები, სამეული მაცივარი და ან ტელევიზორი. ველოდებით აღსრულების სამსახურის, მერის მიმართვის საფუძველზე როგორ შემოდის ტელევიზიაში, ნივთების წასაღებად.
P.S. კახა კალაძე ჩემს კომპიუტერს ვერ წაიღებთ, ტელევიზიის არაა ჩემია და სადაც ვმუშაობ ყველგან თან დამაქვს”, – ამბობს ნოდარ მელაძე.
კახა კალაძის ადვოკატი, დიმიტრი გაბუნია ამბობს, რომ დაკისრებული თანხა ნორმალური ანაზღაურებაა.
“სამწუხაროა, ვთქვათ, რომ უფრო მეტი არ დაეკისრა”, – აღნიშნა ადვოკატმა.
