მარნეულისა და ბოლნისის შესასვლელებთან გამშვები პუნქტები მოეწყო

კორონავირუსის გავრცელების საპრევენციო ღონისძიებებში თავდაცვის სამინისტროც ჩაერთო.  

მარნეულისა და ბოლნისის მუნიციპალიტეტებთან 5 საკონტროლო გამშვები პუნქტია მოწყობილი. 

გაიშალა საველე კარვები, სადაც მოქალაქეებს თავდაცვის ძალების სამედიცინო პერსონალი პირველად სამედიცინო შემოწმებას უტარებს. 

ტერიტორიაზე შემავალი და გამომავალი ავტოტრანსპორტი სადეზინფექციო ხსნარით მუშავდება.

პრემიერ-მინისტრის განმარტებით, მარნეულში კორონავირუსით ინფიცირების წყაროს დადგენა ვერ მოხერხდა, რის გამოსაკოორდინაციო საბჭოს გადაწყვეტილებით, 23 მარტიდან მარნეულისა და ბოლნისის მუნიციპალიტეტები საკარანტინო ზონებად გამოცხადდა.

• რას ნიშნავს საგანგებო მდგომარეობა – რისი უფლება გვაქვს და რისი არა

• საგანგებო მდგომარეობის მეორე დღე: ეკლესიებში ხალხმრავალი წირვა-ლოცვა ჩატარდა

• მარნეული და ბოლნისი დაიკეტა

მარნეულში კორონავირუსით დაინფიცირებული 62 წლის ქალი სამკურნალოდ თბილისში გადმოიყვანეს. მისი ჯანმრთელობის მდგომარეობა უკიდურესად მძიმეა. მას ორმხრივი პნევმონია  და ქრონიკული დაავადებები აქვს. 

ის მარნეულში მაღაზიაში, გამყიდვლად მუშაობდა. 62 წლის ქალი სავარაუდოდ ბოლნისში, წლისთავზე დაინფიცირდა, რომელსაც უამრავი ადამიანი ესწრებოდა. ეპიდემიოლოგებს ამ დროისთვის მისი 90-მდე კონტაქტი ჰყავთ მოძიებული. 

“ჯეოჰოსპიტალი”, სადაც ეს პაციენტი მკურნალობდა, მთლიანად კარანტინშია მოქცეული. კარანტინში იმყოფება მედპერსონალიც. 

23 მარტის მდგომარეობით, საქართველოში კორონავირუსით ინფიცირების 54 შემთხვევაა დადასტურებული. კარანტინის რეჟიმშია 3254 ადამიანი, ხოლო სტაციონარში მეთვალყურეობის ქვეშ – 233. 

ექიმების შეფასებით, 4 პაციენტის მდგომარეობა მძიმეა.

54 პაციენტიდან 3 გამოჯანმრთელდა.

კორონავირუსის პანდემიის შეჩერების მიზნით საქართველოში 21 მარტს საგანგებო ვითარება გამოცხადდა.