ევროპარლამენტარი: პოლიტიკოსებმა არჩევნების შედეგების აღიარების პირობა არჩევნებამდე უნდა დადონ

ევროპარლამენტის წევრი და ესტონეთის ყოფილი საგარეო საქმეთა მინისტრი, მარინა კალიურანდი “ამერიკის ხმასთან” ინტერვიუში ამბობს, რომ ქართველმა პოლიტიკოსებმა არჩევნების შედეგების აღიარების პირობა არჩევნებამდე უნდა დადონ.

ევროპარლამენტარის განმარტებით, წინასაარჩევნო პერიოდი ყველა ქვეყანაში რთული და კრიტიკულია. მაგრამ საქართველო ამ პერიოდში, სამწუხაროდ, ძალიან პოლარიზებულია, სადაც პოლიტიკური ძალები ერთმანეთს ადანაშაულებენ:

“მე ვუსმენ “ქართულ ოცნებას” და ისინი ოპოზიციას სდებენ ბრალს, ვუსმენ ნაციონალურ მოძრაობას და ისინი ქართულ ოცნებას ადანაშაულებენ. ყველა ერთმანეთისკენ იშვერს ხელს. მე, როგორც საქართველოს მეგობარი ესტონელი და ევროპის პარლამენტის წევრი, ვამბობ, რომ დაძაბულობა უნდა შემცირდეს. ყველას მიზანი დემოკრატიული არჩევნების ჩატარება უნდა იყოს.”

მისი თქმით, პოლიტიკოსები უნდა გამოვიდნენ და თქვან, “რომ დიახ, თუ ოდირის დამკვირვებლები აღიარებენ არჩევნების შედეგებს, რა შედეგებიც არ უნდა მიიღოს ამა თუ იმ პარტიამ, რომ ისინი ამ შედეგებს აღიარებენ.”

მარინა კალიურანდი ამბობს იმასაც, რომ არჩევნების აღიარება ნიშნავს იმას, რომ პოლიტიკოსებმა ქვეყნის ინტერესები პარტიულ ინტერესებზე მაღლა უნდა დააყენონ, დღევანდელის ნაცვლად კი ხვალინდელ დღეზე იფიქრონ.

● რას ვირჩევთ 2 ოქტომბერს? ხუთი ნიშანი, რომელიც მიუთითებს, რომ საქართველოში თვითმმართველობა არ არის
● ISFED წინასაარჩევნო მონიტორინგის შედეგებს აქვეყნებს: დარღვევები, ძალადობა და ზეწოლა

ინტერვიუში მარინა კალირანდი მიხეილ სააკაშვილის საკითხსაც შეეხო, რომელმაც არჩევნების დღეს ქვეყანაში დაბრუნება დააანონსა. მისი თქმით, ის სააკაშვილს ბრიუსელში შეხვდა და მკაფიოდ განუცხადა, გამოიყენოს საკუთარი ძალა და პოლიტიკური კაპიტალი იმისთვის, რომ ქვეყანაში პოლარიზაცია შემსუბუქდეს.

ვეროპარლამენტარმა ისაუბრა შარლ მიშელის დოკუმენტზეც. მისი თქმით, ის არსად გამქრალა:

“ასევე, რა თქმა უნდა, უნდა ვახსენო შარლ მიშელის შეთანხმებაც. ის არსად გამქრალა. ევროკავშირმა და ევროპის პარლამენტმა მკაფიოდ თქვეს, რომ მას შემდეგაც, რაც „ქართულმა ოცნებამ“ შეთანხმებიდან საკუთარი ხელმოწერა მოხსნა, ჩვენ ყველა მხარისგან, ყველა პოლიტიკური პარტიისგან მოველით მისი პირობების და შეთანხმების განზრახვის შესრულებას.” 

● კრიზისის დასასრული? ხელისუფლებამ და ოპოზიციის ნაწილმა შეთანხმებას ხელი მოაწერა
● ევროკავშირი სუს-ის მიერ დიპლომატების მოსმენის გამო შესაბამის ნაბიჯებს გადადგამს
● ევროკავშირი: საქართველომ ვერ შეძლო შეესრულებინა მაკროფინანსური დახმარების პირობები

ადგილობრივი თვითმმართველობის არჩევნები საქართველოში 2 ოქტომბერს არის დანიშნული. მმართველი გუნდი აქტიურ წინასაარჩევნო კამპანიას აწარმოებს, ისევე როგორც ოპოზიცია.

თვითმმართველობის არჩევნები განსაკუთრებული ყურადღების ქვეშ მას შემდეგ მოექცა, რაც ევროპული საბჭოს პრეზიდენტმა, შარლ მიშელმა საქართველოს ხელისუფლებისა და ოპოზიციის ხელმოწერით ახალი დოკუმენტი შექმნა.

დოკუმენტი ერთ-ერთი მნიშვნელოვანი ბერკეტი უნდა ყოფილიყო, რომელიც 2021 წლის ოქტომბერში დანიშნული თვითმმართველობის არჩევნების სამართლიან გარემოში ჩატარებას შეუწყობდა ხელს.

ამავე დროს, საერთაშორისო თანამეგობრობის უპრეცედენტო აქტიურობით და ჩართულობით მომზადებული ეს შეთანხმება ასევე იმის ხაზგასმა იყო, რომ ქვეყანა ევროატლანტიკური კურსის ერთგულია.

“ქართული ოცნების” გადაწყვეტილებამ, დაეტოვებინა შეთანხმება, უკვე გამოიწვია მორიგი პოლიტიკური დაძაბულობა.