მარილიანი კვერები საბედოს სანახავად. ლეილას გაკვეთილები ყარაჯალელი ქალებისთვის. რეგიონული ამბების დაიჯესტი
რა ხდება საქართველოს რეგიონებში
კასპში იპოვეს 70 წლის კაცის ცხედარი, რომელიც სავარაუდოდ ნადირმა დაგლიჯა
კასპში, სოფელ ლამისყანაში, 70-წლის კაცის ცხედარი იპოვეს. როგორც გამოცემა Qartli.ge წერს, კაცის სახლი სოფლის განაპირას დგას, იგი მარტო ცხოვრობდა. სოფლის მცხოვრებლები ვარაუდობენ, რომ მარტოხელა მამაკაცი გარეულმა ცხოველებმა დაგლიჯეს.
ვრცლად: Qartli.ge
მარნეულში 15 წლის გოგოს იძულებით ათხოვებდნენ
შინაგან საქმეთა სამინიტრომ მარნეულში დააკავა პირი, რომელიც 15 წლის გოგოს ნიშნობას აიძულებდა. რადიო „მარნეული“ წერს, რომ ბრალდებული გოგოს ოჯახის წევრია. 15 წლის გოგო 2 თებერვალს დაიკარგა, როგორც გაირკვა, მას იძულებით ნიშნავდნენ და ამის გამო, სახლიდან გაიქცა.
ვრცლად: marneulifm.ge
ქარელში 88 წლის მარტოხელა ქალი ითხოვს თავშესაფარში გადაიყვანონ
“შვილიშვილთან ერთად ვცხოვრობდი, ექვსი თვის წინ დაიჭირეს, ციხეშია. უპატრონოდ დავრჩი. სოციალური დახმარებაც მომიხსნეს. მითხრეს, შენი შვილიშვილი აიღებს ციხეში და შენ აღარ გეკუთვნისო. საჭმლის ფული არ მაქვს, მეზობლები მაჭმევენ“, – 88 წლის ქალი ქარელიდან, რადიო „მოზაიკას“ უყვება, როგორ დარჩა სრულიად მარტო. ქალი ითხოვს თავშესაფარში გადაიყვანონ.
ვრცლად: mozaikanews.ge
მომხდარიდან ორი წლის შემდეგაც ისევ არ ვიცით, რატომ გარდაიცვალა ახალციხელი ექთანი კოვიდის ვაქცინით აცრის შემდეგ
ორწლიანი ლოდინის შემდეგ, ახალციხელი ექთნის, მეგი ბაქრაძის ოჯახის ადვოკატებმა, ექსპერტიზის დასკვნა მიიღეს. რა წერია დასკვნაში ჯერ არ ვიცით. დასკვნას ოჯახის ახლობელი ექსპერტები სწავლობენ და საჯარო განცხადებებს ჯერ არ აკეთებენ.
მეგი ბაქრაძე ერთ-ერთი პირველი იყო, რომელმაც ახალციხეში კოვიდის საწინააღმდეგო ვაქცინა გაიკეთა. მომხდარიდან მალევე ის ცუდად გახდა, განვითარდა ანაფილაქსიური შოკი დაგარდაიცვალა. ოჯახმა მომხდარი ვაქცინაციას დაუკავშირა და საავადმყოფოს უჩივლა. ექთნის გარდაცვალებას დიდი ხმაური მოჰყვა, შეფერხდა ვაქცინაციის პროცესი, რომელიც ქვეყანაში სულ ახალი დაწყებული იყო.
ვრცლად: sknews.ge
“ეს ნიშნავს შიმშილის დაწყებას“ – ჯორჯიან მანგანეზმა მუშაობა შეაჩერა
„მაღაროები გვინახავდა, სხვა არაფერი არ მოდის ჩვენთან. ახლა წავა ხალხი, ზოგი თბილისში, ზოგი უცხოეთში, მშიერ კაცს რა გააჩერებს“ – ამბობენ „ჯორჯიან მანგანეზში“ დასაქმებულები, რომელთაც უთხრეს რომ დროებით, მინიმუმ მომავალი სამი თვე, კომპანია წარმოებას შეაჩერებს.
კომპანიაში დასაქმებულები ამბობენ, რომ ეს გადაწყვეტილება ფაქტობრივად შიმშილის დაწყებას ნიშნავს.
ვრცლად: kutaisipost.ge
გურჯაანში სოფლის მხარდაჭერის პროგრამის პრიორიტეტებს არჩევენ
გურჯაანში დაიწყო კრებები სოფლებში იმის გასარკვევად, რაში დახარჯონ სოფლის მხარდაჭერის ფარგლებში სოფლებისთვის გამოყოფილი ფული. როგორც გამოცემა „Speqtri.ge წერს, სოფლების უმრავლესობაში გადაწყვიტეს, რომ ამ თანხებით სპორტული მოედნები და მოსაცდელები გააკეთონ.
ამ პროგრამის ფარგლებში, გურჯაანის მუნიციპალიტეტს, წელს ნახევარი მილიონი ლარი ერგო.
ვრცლად: speqtri.ge
სამცხე-ჯავახეთში მარილიანი კვერები გამოაცხვეს და სურბ-სარქისი აღნიშნეს
სამცხე-ჯავახეთში მცხოვრებმა ეთნიკურად სომეხმა მოსახლეობამ, სურბ-სარქისის დღესასწაული იზეიმა. ამ დღეს ტაძრებში საზეიმო ლიტურგია იმართება. ადამიანები კი სახლში მარილიან პურებს აცხობენ, რადგან სჯერათ, რომ ღამით სიზმარში საბედოს ნახავენ.
კიდევ ერთი ტრადიცია, ოჯახებში „ ფოხინდის“ დამზადებაა. ფოხინდს მოხალული ფქვილისგან ამზადებენ და სახლის ზღურბლზე დგამენ. გადმოცემის თანახმად, ბედნიერების ნიშნად, ღამით ფოხინდზე წმინდა მხედართმთავარი სარქისის ცხენმა ნალის კვალი უნდა დატოვოს.
სომხურ სამოციქულო ეკლესიაში ეს ერთ-ერთი ყველაზე პატივსაცემი დღესასწაულია. 2007 წლიდან ის სახალხო დღესასწაულადაა გამოცხადებული.
ვრცლად: nor.ge
„64 წლის ვარ და ახალგაზრდებთან ერთად ვსწავლობ“ – ლეილას გაკვეთილები ყარაჯალელი ქალებისთვის
“ზოგ ქალს გაკვეთილებზე ოჯახის წევრები არ უშვებდნენ, ვიღაცებს ქმრები აცილებდნენ და აქ ელოდებოდნენ. შევხვდი მათ, მოვიწვიე, ერთი დედამთილი რძალთან ერთად მოვიდა“, – კახეთში, სოფელ ყარაჯალაში, ლეილა ბალაშვილი აზერბაიჯანელ ქალებსა და გოგოებს ქართულს ასწავლის.
სოფელი ყარაჯალა ეთნიკური აზერბაიჯანელებით არის დასახლებული. ამ სოფელში გოგოების ნაწილს იძულებით, ადრეულ ასაკში ათხოვებენ. ქალებმა არ იციან ქართული ენა. მათ არ აქვთ სამსახური. არ მიუწვდებათ ხელი განათლებაზე, ჯანდაცვაზე, ვერ სარგებლობენ სახელმწიფო პროგრამებით.
ვრცლად: knews.ge
რა ხდება საქართველოს რეგიონებში
