მარია ზახაროვა: გარე ზეწოლის მიუხედავად, საქართველოს ხელისუფლება რუსეთთან კავშირს არ წყვეტს
მარია ზახაროვა ოცნებაზე
რუსეთის საგარეო საქმეთა სამინისტროს სპიკერი, მარია ზახაროვა, საქართველოს ხელისუფლებას აქებს “ეროვნული ინტერესების დაცვის გზაზე“ დგომისთვის და აცხადებს, რომ მოსკოვი საქართველოსთან “პრაგმატული ურთიერთობების“ განვითარებას ცდილობს.
მისი თქმით, თბილისი არ აჰყვა გარე ზეწოლას და არ აირჩია “უკრაინული ან მოლდოვური სცენარის“ განვითარება, რასაც დასავლეთის ზოგიერთი ქვეყანა სთავაზობდა.
ზახაროვას განცხადებით, საქართველომ, ნატოში გაწევრიანებისა და ევროკავშირთან ალიანსის მოლოდინის მიუხედავად, დაინახა “ოქროს მთების“ დაპირებების სიყალბე და სურს საკუთარი პოლიტიკა დამოუკიდებლად განახორციელოს. მან აღნიშნა, რომ მოსკოვისთვის მნიშვნელოვანია, საქართველო სუვერენული იყოს და არ იქცეს “სათამაშოდ“ სხვა ძალების ხელში.
“ვცდილობთ, საქართველოსთან პრაგმატული ურთიერთობები ავაწყოთ. მიგვაჩნია, რომ ჩვენი კავშირები ბუნებრივ ხასიათს ატარებს მეზობლობის, უმჭიდროესი ისტორიული და კულტურული კავშირებისა და სულიერი ერთობის გამო. აღვნიშნავთ თბილისის ნაბიჯებს ქართული საზოგადოების ტრადიციული ფასეულობებისა და წეს-ჩვეულებების დასაცავად გარედან თავსმოხვეული ნეოლიბერალური დამოკიდებულებებისგან, რომლებიც საქართველოს ეროვნული იდენტობის წაშლისკენ არის მიმართული“, — თქვა ზახაროვამ.
ზახაროვამ ყურადღება გაამახვილა ეკონომიკურ ფაქტორებზეც: 2025 წელს საქართველოსა და რუსეთს შორის სავაჭრო ბრუნვა 6%-ით, 2,7 მლრდ დოლარამდე გაიზარდა, ხოლო რუსი ტურისტების რაოდენობა 11%-ით გაიზარდა და 1,6 მლნ-ს მიაღწია. მისი თქმით, რუსეთი და დსთ საქართველოსთვის მთავარი სავაჭრო პარტნიორები არიან და ფაქტობრივად, “უალტერნატივო ბაზარს“ წარმოადგენენ.
პოლიტიკური დიალოგის განახლების შესახებ კი ზახაროვა ამბობს, რომ წინაპირობები ჯერჯერობით არ არსებობს. მან გაიხსენა სააკაშვილის პერიოდი, როცა დიპლომატიური ურთიერთობების გაწყდა, თუმცა ახლა, მისი თქმით, საქართველოში სულ უფრო მეტი მოქალაქე და პოლიტიკოსი ხედავს, რომ ქვეყნის კეთილდღეობის საწინდარი კონფრონტაციაში კი არა, რუსეთთან თანამშრომლობასა და დიალოგშია.
ზახაროვა განსაკუთრებულად გამოარჩევს 2023 წლის მაისში, პუტინის გადაწყვეტილებით აღდგენილ პირდაპირ ავიამიმოსვლას საქართველოსა და რუსეთს შორის, რაც, მისი თქმით, “საღი აზრის ზეიმი“ იყო.
“არასოდეს დამავიწყდება (ვხედავდი მედიაში გავრცელებულ კადრებს), როგორ შესრულდა წლების განმავლობაში პირველი რეისი, როდესაც ავიამიმოსვლა აღდგა, და როგორ უხაროდა ეს ხალხს. მათ ის კი არ უხაროდათ, რომ რაღაც უნიკალური, მაღალშემოსავლიანი ეკონომიკური პროექტი გამოუვიდათ. საღი აზრის ზეიმი უხაროდათ. ოჯახებს, მეგობრებს, ბიზნესის წარმომადგენლებს მიეცათ საშუალება, ეკონტაქტათ ერთმანეთთან და ჩამოფრენილიყვნენ “გადაჯდომების“ გარეშე, არამედ ისე, როგორც ამას ათწლეულების განმავლობაში აკეთებდნენ და რატომღაც ვიღაცის ბოროტი ნებით შეწყვიტეს. მახსოვს სიხარულის ეს ემოციები. ამ კონკრეტულ მაგალითზე შეიძლება დავინახოთ, როგორ იზეიმა სამართლიანობამ. და ეს ბნელი ბოროტება დამარცხდა კეთილი ნებითა და ზრახვებით.“ — განაცხადა მარია ზახაროვამ.
