"ლელო - ძლიერი საქართველო" თვითმმართველობის არჩევნებში მონაწილეობას მიიღებს. რას ამბობენ ოპოზიციაში
“ლელო – ძლიერი საქართველო” არჩევნებში
კოალიცია “ლელო-ძლიერი საქართველო” თვითმმართველობის არჩევნებში მონაწილეობას მიიღებს. ამის შესახებ განცხადება კოალიციის ერთ-ერთმა ლიდერმა, ირაკლი კუპრაძემ გააკეთა.
“ძლიერი საქართველოს” გადაწყვეტილებას უკვე გამოეხმაურნენ ოპოზიციური პოლიტიკური პარტიები და კოალიციები. მათი თქმით, პარტიის გადაწყვეტილება “სამწუხაროა.”
რას ამბობს “ლელო – ძლიერი საქართველო”
“ძლიერ საქართველოს აქვს თავისი გეგმა, გზა, რომელიც ხალხის ინტერესებს ემსხაურება და ამ გზიდან ვერავინ გადაგვიყვანს, განსაკუთრებით ქართული ოცნება. ბრძოლა, ეს არის ერთადერთი გზა, რაც დღეს ჩვენ ივანიშვილის, რუსული რეჟიმის წინააღმდეგ გვაქვს – ეს არის უკომპრომისო და დაუღალავი ბრძოლა.
დღეს კოალიცია ძლიერი საქართველო აკეთებს თავის განაცხადს. ოფიციალურად და დეკლალრებულად იწყებს ბრძოლას თითოეული საქართველოს მოქალაქისთვის.
ჩვენ რუსულ რეჟიმთან შევდივართ ბრძოლაში. ჩვენ ვირჩევთ ბრძოლას სხვა ველზეც. დანაშაულია ამ არჩევნების ადგილობრივ არჩევნებად იდენტიფიცირება. ეს არის დეფაქტო არჩევნებში ბრძოლა. დე-ფაქტო ხელისფულებასთან დე-ეფაქტო არჩევნებში ბრძოლა გამოგვიცახდებია, ბრძოლა გაგრძელდება ბოლომდე და ეს ბრძოლა გაგრძელდება გამარჯვებამდე.” – თქვა პარტიის გენერალურმა მდივანმა ირაკლი კუპრაძემ.
გამოხმაურება
ერთიანობა – ნაციონალური მოძრაობის ლიდერმა თინა ბოკუჩავამ გადაწყვეტილებას “ძალიან, უკიდურესად სამწუხარო” უწოდა.
“ძალიან სამწუხაროა. უკიდურესად.
ლელომ ბრძოლისა და წინააღმდეგობის ნაცვლად, რეჟიმთან კომპრომისი და თანამშრომლობა აირჩია.
ყველაფერს უნდა დაერქვას თავის სახელი – ეს არის საერთო ბრძოლის ღალატი; არა ბრძოლა ქვეყნის გადარჩენისთვის, არამედ რეჟიმთან გარიგება საპატიო მეორე ადგილისთვის.
არ გამოვრიცხავ, მიხეილ ზებრა ყაველაშვილმა ახლა თავადაც შეიწყალოს ლელოს ლიდერები, რომ გარიგებულის მანტია ბოლომდე მოარგოს. ეს ხომ ნაცადი რუსული ტაქტიკაა, ამორალურ კომპრომისზე დაყოლიება და შემდეგ ყველაზე ცინიკურად და სასტიკად მხილება.
დღეს ვიხილეთ ლელოს მორალური სიკვდილი. პოლიტიკა მორალის გარეშე კი არ არსებობს. ამიტომ ოქტომბერში ვიხილავთ მათ ელექტორალურ სიკვდილსაც.
თავისუფლება პოლიტპატიმრებს! ბოლოს მაინც ჩვენ მოვიგებთ!”, – დაწერა თინა ბოკუჩავამ.
“კოალიცია ცვლილებისთვის” ერთ-ერთი ლიდერის ელენე ხოშტარიას თქმით, “4 პროცენტიანი ლელო რას იზამს, ნამდვილად არ განსაზღვრავს საქართველოს ბედს”.
“ძალიან კარგია სიცხადე! 4 პროცენტიანი ლელო რას იზამს ნამდვილად არ განსაზღვრავს საქართველოს ბედს!
სუსტები არიან თუ მოღალატეები ისტორიამ განსაჯოს, ჩვენ საქმეს მივხედოთ! და საქმე ბევრია და აუცილებლად მივხედავთ!
P.S ხოდა კიდე ფულით და ტელევიზიით აშანტაჟეთ საკუთარი თავები, ბიძინამ ვერ გატეხა ეს ქვეყანა ფულით, მართლა მეცინება”, – დაწერა ელენე ხოშტარიამ.
გადაწყვეტილებას გამოეხმაურა თავისუფლების მოედანიც და აღნიშნა, რომ მიუხედავად იმისა, რომ არ ეთანხმება ძლიერი საქართველოს გადაწყვეტილებას, “არ აპირებენ მომავალი თვეები შიდაპოლიტიკური ბრძოლის ველად ქცევას დაუთმონ”.
“არ ვეთანხმებით “ძლიერი საქართველოს” გადაწყვეტილებას “არჩევნებში” მონაწილეობის შესახებ. ეს მათი არჩევანი კი არის, მაგრამ ყველა დანარჩენის პოლიტიკური რისკია.
ამის მიუხედავად, არ ვაპირებთ მომავალი თვეები შიდაოპოზიციური ბრძოლის ველად ქცევას დავუთმოთ – ჩვენი მთავარი სამიზნე რუსული პარტიის “ქართული ოცნებაა.”
“თავისუფლების მოედანი” ფოკუსირებული ვიქნებით აქტიური ბოიკოტის და ალტერნატიული, დემოკრატიული და ინკლუზიური პოლიტიკური პროცესის ორგანიზებაზე და ჩვენს რესურსებს სწორედ ამისაკენ მივმართავთ”, – წერს თავისუფლების მოედანი.
“პარტია ფედერალისტების” ლიდერი თამარ ჩერგოლეიშვილი წერს, რომ “არაღიარების კამპანიის ფარგლებში მათი სამიზნე იქნება არა მხოლოდ რეჟიმი, არამედ მისი კოლაბორანტებიც”.
“ფედერალისტების სახელით გიცხადებთ, რომ არაღიარების კამპანიის ფარგლებში ჩვენი სამიზნე იქნება არა მხოლოდ რეჟიმი, არამედ მისი კოლაბორანტებიც.
ჩვენს ამომრჩეველს ინტელექტუალურ შეურაცხყოფას ვერ მივაყენებთ. რაც არასწორია – ის სამიზნეა!”, – წერს თამარ ჩერგოლეიშვილი.
მიხეილ ყაველაშვილმა დაპატიმრებულ ოპოზიციონერებს შეწყალების თხოვნა და არჩევნებში მოანწილეობა შესთავაზა
“ქართული ოცნების” პრეზიდენტმა მიხეილ ყაველაშვილმა გუშინ განაცხადა, რომ თუ დაპატიმრებული ოპოზიციონერი ლიდერები მას შეწყალების თხოვნით მიმართავენ და ამავე განცხადებაში დაადასტურებენ მათ სურვილს ადგილობრივ არჩევნებში მონაწილეობის შესახებ, ის მათ შეიწყალებს.
ამავე განცახდებაში, ოცნების მიერ არჩეული პრეზიდენტი ამბობს, რომ მნიშვნელოვანია, თვითმმართველობის არჩევნებში მონაწილეობა ყველა ოპოზიციურმა პარტიამ მიიღოს და მათ სრულფასოვანი საარჩევნო კამპანიის ჩატარება შეძლონ.
შეგახსენებთ, რომ კოალიცია “ძლიერი საქართველოს” ორი ლიდერი, მამუკა ხაზარაძე და ბადრი ჯაფარიძე წულუკიანის კომისიაზე არმისვლის გამო დაპატიმრებულია.
