ლავროვის მოადგილე თამაზ გინტურზე: რისთვის დავსაჯოთ ვინმე? მკვლელობად შეფასება არასწორია

ლავროვის მოადგილე თამაზ გინტურზე

რუსეთის საგარეო საქმეთა მინისტრის, სერგეი ლავროვის მოადგილე მიხაილ გალუზინი ამბობს, რომ რუსი ოკუპანტების მიერ მოკლულ თამაზ გინტურზე საუბრისას სიტყვა “მკვლელობის” გამოყენება “არაკორექტულია.” თამაზ გინტურის მკვლელობაზე შეკითხვა მას ჟენევაში საზოგადოებრივმა მაუწყებლმა დაუსვა.

მისივე განმარტებით, მოკლული თამაზ გინტური და უკანონოდ გატაცებული ლევან დოთიაშვილი რუს მესაზღვრეებს თავს დაესხნენ და “ნაჯახის გამოყენებით ემუქრებოდნენ”. მისივე სიტყვებით, რუსი მესაზღვრეები “საერთაშორისოდ ცნობილი წესების ფარგლებში მოქმედებდნენ” და ამის შეფასება მკვლელობად არასწორია.

გალუზინის თქმით, საჭიროა რეალურად და ცხადად იმ გეოპოლიტიკური რეალობის მიღება, რომელიც “გარშემო გვაქვს” და საჭიროა ცხადად დამახსოვრება დღევანდელი მდგომარეობის მიზეზებისა და სათავეებისა:

“ისტორიის, როგორ ვითარდებოდა მოვლენები 2008 წლის აგვისტოდან, როგორ იწყებოდა საქართველოში აგრესია სააკაშვილის ხელმძღვანელობით სამხრეთ ოსეთის მოსახლეობისა და რუსი სამშვიდობოების წინააღმდეგ. რუს სამშვიდობოებზე თავდასხმა ნიშნავს რუსეთზე თავდასხმას, ამიტომ საქართველო იძულებით მოწოდებული იქნება მშვიდობისკენ.”

ლავროვის მოადგილე ამტკიცებს, რომ საქმე ეხება არა იმას, რომ “ვინმე მიზნად ისახავდა ადამიანის მკვლელობას”, არამედ იმას, რომ ადამიანებმა უკანონოდ გადაკვეთეს “სამხრეთ ოსეთის” საზღვარი. 

ამასთან, მისი სიტყვებით, ისინი ნაჯახის გამოყენებით ემუქრებოდნენ მესაზღვრეებს. ნაჯახი კი “სერიოზული” ცივი იარაღია.

“ისინი ცდილობდნენ ეკლესიაში შეჭრას, როდესაც მათ წესრიგისკენ მოუწოდეს. ამ ნაჯახით ისინი ჩვენს მესაზღვრეებს დაემუქრნენ, მათ მოუწოდეს, შეეწყვიტათ მსგავსი ქმედებები, ამის მიუხედავად, ისინი ჩვენს მესაზღვრეებს ემუქრებოდნენ, უნდოდათ მანქანით დასჯახებოდნენ.

თავიდან გამაფრთხილებელი ცეცხლი ჰაერში გაიხსნა, შემდეგ კი მანქანის ბორბლების მისამართით. რისთვის უნდა დავსაჯოთ ვინმე, როცა მესაზღვრეები მოქმედებენ იმ წესების ფარგლებში, რომელიც საერთაშორისოდ ცნობილია.

კარგი იქნებოდა, ქართულ მხარეს კარგად განემარტა საკუთარი მოსახლეობისადმი, რომ არ ღირს ჩუმად და უკანონოდ საზღვრების გადაკვეთა.” – ამბობს გალუზინი.

● შამბა: კონფლიქტის გადასალახად საჭიროა საუბარი. იცვლება თუ არა მიდგომა ქართულ-აფხაზური კონფლიქტის მიმართ?
● ევროპარლამენტის რეზოლუცია: თამაზ გინტური რუსეთის საოკუპაციო ძალებმა მოკლეს
● კირბალში მომხდარის შემდეგ, ოპოზიცია მოუწოდებს მთავრობას, აამოქმედოს ოთხოზორია-ტატუნაშვილის სია

რა მოხდა სოფელ კირბალში

6 ნოემბერს სოფელ კირბალთან ოკუპანტებმა საქართველოს ერთი მოქალაქე მოკლეს, მეორე კი გაიტაცეს. ოკუპანტების მიერ მოკლული საქართველოს მოქალაქე თამაზ გინტურია, გატაცებული კი ლევან დოთიაშვილი იყო, რომელიც ამ დროისთვის თავისუფალია. 

ლევან დოთიაშვილი, რომელიც ოკუპანტებმა გაათავისუფლეს, თამაზ გინტურის მკვლელობის დეტალებსა და საოკუპაციო ძალების მიერ მის უკანონო დაკავებას იხსენებს.

დოთიაშვილი ჰყვება, რომ თავდაპირველად რუსმა ჯარისკაცმა გამაფრთხილებელი ტყვია გაისროლა, რის შემდეგაც, ლომისის ეკლესიასთან მყოფი თამაზ გინტური და ლევან დოთიაშვილი მას გაესაუბრნენ, შემდეგ ტერიტორია დატოვეს და მანქანაში ჩასხდომიდან რამდენიმე წუთში, დაახლოებით 3 მეტრის გავლის შემდეგ რუსმა ჯარისკაცმა გამიზნული სროლა დაიწყო:

“ეკლესიის ეზოში რომ ავედით, კადრიც კი ნახეთ, რომ კარი გავხსენით, რომ გამოვდიოდით მოვიდა მხოლოდ ერთი რუსი ჯარისკაცი, გამაფრთხილებელი გასროლა გაისროლა პირველივე და მე დავუძახე, რომ არ გინდა სროლა, მოვრიგდეთ. ჩვეულებრივ დაწყნარდა ეს რუსი ჯარისკაცი, ვილაპარაკეთ, კამერა მაქვს ჩართულიო, ამოიღო და ამ დროს, თამაზმაც დაუწყო ლაპარაკი. ჩვეულებრივ, არანაირი აღელვება, არანაირი კონფლიქტი, არაფერი, დაწყნარებულად საუბარი.“

დოთიაშვილის თქმით, თავად ნახა დაჭრილი თამაზ გინტური. ის იხსენებს, რომ მანქანიდან თამაზ გინტურის გადმოყვანის შემდეგ, ადგილზე კიდევ 7 რუსი ჯარისკაცი გამოჩნდა, რომლებიდანაც ერთ-ერთმა მას დაარტყა, მიწაზე დააწვინა და ბორკილები დაადო.

“მე დამარტყა ერთ-ერთმა დაუნდობლად, მიწაზე დამაწვინა. ამ პროცესში მე უკვე ბორკილები დამადეს, წამიყვანეს ტყის მიმართულებით და მე თამაზი აღარ მინახავს. გზაში იყო შეურაცხყოფაც, დარტყმაც”, – აცხადებს დოთიაშვილი და აღნიშნავს, რომ რუსი ჯარისკაცების ამოცნობა უჭირს.

გორის მუნიციპალიტეტის სოფელი კირბალი სამხრეთ ოსეთის კონფლიქტის ზონაში, გორიდან 30 კილომეტრში მდებარეობს. კირბალი ე.წ. ბორდერიზაციის ზონის სოფელია. 2022 წელს რუსებმა აქ ახალი საგუშაგო ააშენეს. ოკუპანტების ქმედებების პროტესტის ნიშნად მაშინ ადგილობრივებმა რუსების მიერ დამონტაჟებული საზღვრის აღმნიშვნელი ბანერი მოიპარეს და ჯართში ჩააბარეს.

სოფელი კირბალი საინფორმაციო საშუალებებში ოქტომბრის ბოლოსაც მოხვდა. 25 ოქტომბერს გავრცელდა ინფორმაცია, რომ ლომისას მამათა მონასტრის ტერიტორიაზე რუსი ოკუპანტები გადაადგილდებოდნენ და მონასტრის კარი აჭედეს.

ამ ინფორმაციას გამოეხმაურა საპატრიარქოს საზოგადოებასთან ურთიერთობის სამსახურის ხელმძღვანელი, ანდრია ჯაღმაიძე, რომელმაც თქვა, რომ რუსი ოკუპანტების მიერ კირბალში, ლომისის წმინდა გიორგის ტაძრის კარის აჭედვა იმიტომ მოხდა, რომ “იქ ვიღაცამ საქართველოს დროშა ააფრიალა.”

გამოხმაურება საქართველოში

საქართველოს ხელისუფლება მოუწოდებს საერთაშორისო საზოგადოებას, დაგმოს რუსეთის საოკუპაციო ძალების მიერ საქართველოს მოქალაქის მკვლელობა.

პრეზიდენტმა სალომე ზურაბიშვილმა მომხდარს „ქართულ სახელმწიფოებრიობაზე უხეში თავდასხმა” უწოდა.

პრემიერმინისტრმა ირაკლი ღარიბაშვილმა საერთაშორისო თანამეგობრობასთან ერთად საოკუპაციო ძალების წარმომადგენლებსაც მიმართა და თანამშრომლობისკენ მოუწოდა. მისი თქმით, სოფელ კირბალში რუსეთის საოკუპაციო ძალების მიერ ცეცხლსასროლი იარაღით სროლის შედეგად საქართველოს მოქალაქის მკვლელობის ფაქტი კიდევ ერთხელ ადასტურებს “ადგილზე არსებულ რთულ უსაფრთხოების გარემოს და მეტყველებს ოკუპაციის მძიმე შედეგებზე”.

თამაზ გინტურის ოჯახს დაზარალებულის სტატუსი აქვს, პროკურატურამ დაღუპულის უფლებამონაცვლედ ცნო მისი შვილი დიმა გინტური.

საქართველოს საგარეო საქმეთა მინისტრმა ილია დარჩიაშვილმა ეუთოს მინისტრთა საბჭოს 30-ე პლენარულ სესიაზე სიტყვით გამოსვლისას რუსეთის საოკუპაციო ძალების მიერ საქართველოს მოქალაქის, თამაზ გინტურის მკვლელობას ეთნიკური ქართველების წინააღმდეგ ძალადობის მორიგი აქტი უწოდა.

ევროპარლამენტის რეზოლუცია

ევროპარლამენტში ოკუპანტების მიერ თამაზ გინტურის მკვლელობაზე რეზოლუცია 23 დეკემბერს მიიღეს.

ევროპარლამენტი ხაზს უსვამს, რომ სისხლის სამართლის დანაშაულზე პასუხი უნდა აგონ და მართლმსაჯულებას გადაეცნენ გინტურის მკვლელობასა და დოთიაშვილის გატაცებაზე პასუხისმგებელი პირები.

ევროპარლამენტი ასევე კატეგორიულად გმობს თამაზ გინტურის მკვლელობას და ლევან დოთიაშვილის უკანონო დაკავებას რუსეთის ფედერაციის მესაზღვრეების მიერ ოკუპირებული ცხინვალის რეგიონის/სამხრეთ ოსეთის ადმინისტრაციულ გამყოფ ხაზთან.

როგორც რეზოლუციაში წერია, თამაზ გინტურის მკვლელობა, ისევე როგორც ქართველი დევნილების: არჩილ ტატუნაშვილის, გიგა ოთხოზორიას და დავით ბაშარულის სასტიკი მკვლელობები, ასევე ირაკლი კვარაცხელიას დაღუპვა რუსეთის სამხედრო ბაზაზე ოკუპირებული აფხაზეთის რეგიონში, რუსეთის მხრიდან საქართველოს ტერიტორიების ოკუპაციის პირდაპირი შედეგია.

ასევე, ევროპარლამენტარების თქმით, მართლმსაჯულებას უნდა გადაეცნენ გინტურის მკვლელობასა და დოთიაშვილის გატაცებაზე პასუხისმგებელი პირები, მათ შორის რუსეთის უმაღლეს სამხედრო და პოლიტიკურ ეშელონებში და რუსეთის ფედერაციის საგამოძიებო კომიტეტში მომუშავე პირები.