კვლევა: საქართველოს მოსახლეობის 48 პროცენტზე მეტი ვალებს იღებს 

საქართველოს მოსახლეობის 48 პროცენტზე მეტი ვალებს იღებს 

ISET-ის კვლევითი ინსტიტუტის მომხმარებელთა განწყობის ინდექსის მიხედვით, ოჯახის ამჟამინდელ ფინანსურ მდგომარეობაზე საუბრისას, საქართველოს მოქალაქეების 48.1 პროცენტი აცხადებს, რომ ვალებს იღებს, 33.3 პროცენტის თქმით კი, შემოსავალი ზუსტად ყოფნის.

მოსახლეობის განწყობის ინდექსი ასევე აჩვენებს, რომ გამოკითხულთა 45 პროცენტის ოჯახის ფინანსური მდგომარეობა ბოლო 12 თვის განმავლობაში არ შეცვლილა, 24.4 პროცენტი აცხადებს, რომ ოდნავ გაუარესდა, 18.6 პროცენტის თქმით კი საგრძნობლად გაუარესდა.

კითხვაზე, ბოლო 12 თვესთან შედარებით, როგორ შეიცვლება ფასები მომდევნო 12 თვის განმავლობაში, 37.5 პროცენტი პასუხობს, რომ ნაკლები ტემპით გაიზრდება, 26.7 პროცენტი კი ამბობს, რომ იგივე დარჩება.

აღსანიშნავია ისიც, რომ ოჯახის ფინანსურ მდგომარეობასთან დაკავშირებით მოსახლეობის მოლოდინები ოპტიმისტური არ არის, რადგან გამოკითხულთა 40.3 პროცენტი აცხადებს, რომ მისი ოჯახის ფინანსური მდგომარეობა მომდევნო 12 თვის განმავლობაში იგივე დარჩება.

ISET-ის კვლევითი ინსტიტუტის ინფორმაციით, გამოკითხულთა 36.1 პროცენტი თვლის, რომ საქართველოში ბოლო 12 თვის მანძილზე ეკონომიკური ვითარება საგრძნობლად გაუარესდა, 31.4 პროცენტი კი აცხადებს, რომ იგივე დარჩა.

● როგორია 2023 წლის ბიუჯეტი – მოკლედ
● როგორ აისახა უკრაინის ომი საქართველოს უძრავი ქონების ბაზარზე
● ევროპის ბიზნეს ასოციაცია: საქართველოში დღეს არსებული ეკონომიკური ზრდა სტაბილური არაა

საქართველოს სტატისტიკის ეროვნული სამსახურის ინფორმაციით, 2022 წლის ნოემბერში, წინა თვესთან შედარებით, ინფლაციის დონე 0.5 პროცენტით გაიზარდა და წლიურმა ინფლაციის დონემ საქართველოში 10.4 პროცენტი შეადგინა. შესაბამისად, გაძვირდა პროდუქტებიც – ბოსტნეული 26 პროცენტით, პური 23.8 პროცენტით, კვერცხი და ყველი კი 18.3 პროცენტით.

2021 წელს საქართველოში ინფლაციის დონემ ბოლო ათი წლის რეკორდულ ნიშნულს მიაღწია. ფინანსთა მინისტრი ლაშა ხუციშვილი ამბობს, რომ ინფლაცია და ფასები გამოწვევად დარჩება მომავალ წელსაც იქიდან გამომდინარე, რომ მსოფლიო ფასები რეკორდულ ნიშნულზე იყო ქვეყნების უმეტესობაში.

რაც შეეხება ეროვნულ ბანკს, წლის დასაწყისში ისინი აცხადებდნენ, რომ “არსებული პროგნოზით მოსალოდნელია, რომ, სხვა თანაბარ პირობებში, ინფლაცია მარტიდან შემცირდება, თუმცა წლის განმავლობაში მიზნობრივ მაჩვენებელზე მაღლა შენარჩუნდება.” ასევე, ეროვნულ ბანკში აღნიშნავენ, რომ საწვავის ფასების მკვეთრ მატებას ინფლაციის მაჩვენებელზე საგრძნობი გავლენა ექნება.

საქართველოს მთავრობა კი გაზრდილ ფასებს და ინფლაციას უკრაინაში რუსეთის შეჭრას აბრალებს. საქართველოს პრემიერმინისტრმა ირაკლი ღარიბაშვილმა განაცხადა, რომ ინფლაციის მაჩვენებლებმა არაერთ ქვეყანაში პროგნოზირებულ მაჩვენებელს გადააჭარბა.