"გაგისინჯავთ ნიგოზ-ბროწეული?" - "იმერული პეწი" საირმის სამზარეულოში. რა ხდის უნიკალურს აქაურ კერძებს
კურორტი საირმე სამზარეულო
რა მოგეწონათ ყველაზე მეტად საირმეში დასვენების დროს? ამ კითხვით ჩვენ ცოტა ხნის წინ მივმართეთ ცნობილ ადამიანებს, რომლებიც ამ კურორტზე ისვენებდნენ. პასუხებში სჭარბობდა: “საოცარი კვება”, “უგემრიელესი საჭმელი”. ამიტომ გადავწყვიტეთ გავერკვიოთ, რა არის უნიკალური საირმის სამზარეულოში. ამისთვის ვესაუბრეთ სასტუმრო “ახალი საირმის” შეფს, კახა ციკოლიას, სასტუმრო “საირმის” შეფს თამარ ბეგიაშვილს და საირმის ლეგენდარული საცხობის მთავარი ტექნოლოგს, კახა ვაჩეიშვილს.
კურორტი “საირმე” საქართველოს ერთ-ერთი უძველესი კურორტია. იგი სუბტროპიკული სარტყლის მთიან ზონაში, ქუთაისის სამხრეთით, ზღვის დონიდან 950 მეტრზე მდებარეობს. “საირმე” ევროპის ერთ-ერთი ყველაზე დიდი კურორტია – მწვანე საფარი აქ 60 ჰექტარზეა გადაჭიმული. “საირმის” რეაბილიტაციის შემდეგ კომპლექსის ტერიტორიაზე ფუნქციონირებს ორი თანამედროვე ტიპის სასტუმრო (“საირმე” და “ახალი საირმე”), რომელიც 4 ვარსკვლავის სტანდარტებს შეესაბამება. სასტუმრო „საირმე“ აერთიანებს 154 ნომერს, სადაც 395 ადამიანის განთავსებაა შესაძლებელი, „ახალ საირმეში“ კი 104 ნომერია. კომპლექსი სრულად პასუხობს თანამედროვე ტენდენციებს თავისი ინტერიერით, უნიკალური ადგილმდებარეობითა და ინფრასტრუქტურით.
კახა ციკოლია, სასტუმრო “ახალი საირმის” შეფი
ჩვენი კონცეფცია არის „იმერული პეწი“, ანუ სუნელები. იმერეთს სამზარეულოს თვალსაზრისით აქვს ძალიან დიდი პერსპექტივა, დაწყებული ბოსტნეულით და დამთავრებული ხორცეულით, რომელსაც აქ ძალიან გემოვნებით აკეთებენ. აქ ბევრი სხვადასხვა ქვეყნის სამზარეულოს კერძებს ვაკეთებთ მათი წესის, ტექნოლოგიის დაცვით – იტალიურს იტალიურად, ფრანგულს ფრანგულად და ა.შ., მაგრამ ყველაფერს იმერული პეწით. ამიტომ, ყველაფერს უნიკალური გემო აქვს. „საირმე“ არის პირველი და ასეთი სამზარეულო არავის არა აქვს. მობრძანდით, დააგემოვნეთ და მერე მიხვდებით. თან რომ იცოდეთ, რა ხალხი მყავს სამზარეულოში. ამ ხალხის გარეშე აქ არ იქნებოდა არაფერი.
იმერლებს ძალიან დახვეწილი გემოვნება აქვთ. მე ვუსმენ, ვუყურებ, ვთანამშრომლობ ამ ხალხთან და ამიტომ არის ჩემი საჭმელი ასეთი გემრიელი.
რა გასინჯოთ პირველ რიგში? გაგისინჯავთ ნიგოზ-ბროწეული? თუ არა, მაშინ პირველ რიგში ეს უნდა გასინჯოთ. ასევე, ეკალა ნიგვზით, თხილით, ორაგულის სოუსში და რაც მთავარია, იმერული ძმრით. იმერული ღვინო ღვინოობაშიც ძმარია და კიდევ რომ დააძმარებ და მჟავეს გახდი და მერე ამით შეკმაზავ საჭმელებს, წარმოიდგინეთ, რა იქნება. სოუსები გვაქვს ასევე სრულიად უნიკალური, ვინც გასინჯა, მოდის და რეცეპტებს მეხვეწება.
თამარ ბეგიაშვილი, სასტუმრო “საირმის” შეფი
ჩვენი სამზარეულო არის ძალიან მრავალფეროვანი – დაწყებული დიეტური საკვებით, დამთავრებული საკმაოდ ნოყიერ კერძებამდე. სტუმარს შეუძლია, თავად აირჩიოს, რა სჭირდება.
ჩვენთან არის სამჯერადი კვება, რომელიც განკუთვნილია ისეთი სტუმრებისთვისაც, ვინც სამკურნალოდ ჩამოდის. ამიტომ ვცდილობთ, ეს კერძები სამკურნალო წყლებთან თავსებადი იყოს. თუმცა, ცხადია ჩვენი მენიუ მრავალფეროვანია და ყველა ტიპის დამსვენებელზეა მორგებული.
ასევე გვაქვს ე.წ. შოუს განყოფილება, სადაც სტუმარს შეუძლია, იქვე მოამზადებინოს მისთვის სასურველი კერძის ულუფა და იქვე მიირთვას. სტუმრებს ეს ძალიან მოსწონთ.
რაც მთავარია, ყველაფერი არის გემრიელი. სტუმრებს განსაკუთრებით მოსწონთ წვნიანები და სალათები. აქაც ძალიან დიდი არჩევანია – შეუძლიათ აირჩიონ მსუბუქი სალათები, უფრო ფოთლებით და ასევე უფრო ნოყიერიც. რაც მთავარია, ყველაფერი ჯანსაღი პროდუქტით კეთდება. ნაკლებად ვიყენებთ კონსერვანტებს და, თუ შეგვიძლია, ჩვენ მოვამზადოთ და არ ვიყიდოთ, ჩვენვე ვამზადებთ. მაგალითად, საწებლებს, ჯემებს ჩვენ ვამზადებთ.
ჩვენი მიზანია, ყველაფერი იყოს ჯანსაღი და ახალი პროდუქტებით დამზადებული.
კახა ვაჩეიშვილი, საცხობის მთავარი ტექნოლოგი
ჩვენი საცხობი იმით არის გამორჩეული, რომ პროდუქციას ნატურალურ ნედლეულზე ვამზადებთ და ადგილობრივ წყალზე, რომელიც სპეციფიკური წყალია და თავის სპეციფიკურ გემოვნურ თვისებებს და განსაკუთრებულ გემოს სძენს აქ გამომცხვარ პურს.
ამავდროულად პროდუქცია არის უსაფუვრო და ვიტამინების გარეშე. ეს კი მნიშვნელოვანია ჯანმრთელობისთვის და შეიძლება ითქვას, გადამწყვეტი პროდუქციის ხარისხისთვის.
ჩვენ განსაკუთრებულ ტექნოლოგიებს ვიყენებთ, როგორც პურის, ასევე ფუნთუშეულის და ღვეზელების ცხობისთვის.
გვაქვს ასევე უგლუტენო პური და ეს ძალიან მნიშვნელოვანია მათთვის, ვისაც გლუტენზე ალერგია აქვს. გარდა ამისა, გვაქვს დიაბეტიანებისთვის პური.
საერთო ჯამში, ჩვენ კონცენტრირებული ვართ ჯანსაღ პროდუქციაზე და იმაზე, რომ ყველასთვის მისაღები და მოსაწონი პროდუქცია გვქონდეს.
ცხობის პროცესი რომ აღგიწეროთ, ცომს 24 საათი ვაჩერებთ მაცივარში. მაცივარში ნამყოფ ცომს ისევ ვამუშავებთ და მხოლოდ ამის შემდეგ ვდებთ ღუმელში.
რამდენად გემრიელია ჩვენი ცომეული ჩვენს სტუმრებს კითხეთ. აუცილებლად გეტყვიან, რომ გემრიელი, ჯანსაღი და განსხვავებული პროდუქცია გვაქვს.
