აფხაზეთში კრემლის კურატორმა თავის სოხუმის სახლი ეროვნული ინსტრუმენტების ორკესტრს გადასცა
კრემლის კურატორის საჩუქარი აფხაზურ ორკესტრს
რუსეთის პრეზიდენტის ადმინისტრაციის ხელმძღვანელის პირველი მოადგილე და აფხაზეთის კურატორი, სერგეი კირიენკო, სოხუმში მდებარე სახლს, სადაც ოდესღაც მისი ოჯახი ცხოვრობდა, ეროვნული ინსტრუმენტების ორკესტრს გადასცემს. მისი თქმით, შენობა აღდგება და საჭირო ტექნიკით აღიჭურვება მისი პირადი სახსრებით.
სერგეი კირიენკო 1962 წელს სოხუმში დაიბადა და ბავშვობის ნაწილი იქ გაატარა, თუმცა მშობლების განქორწინების შემდეგ, 1970-იანი წლების დასაწყისში დედასთან ერთად სოჭში გადავიდა საცხოვრებლად. მისი ბებია-ბაბუა კი სოხუმის სახლში განაგრძობდნენ ცხოვრებას.
აფხაზეთის ომის დროს, სოხუმის ცენტრში მდებარე ეს სახლი ნაწილობრივ დაინგრა და მომდევნო წლებში ცარიელი იყო. ახლა სერგეი კირიენკომ, რომელმაც სახლი მემკვიდრეობით მიიღო, გადაწყვიტა, ის ოთარ ხუნწარიას სახელობის აფხაზეთის ეროვნული ინსტრუმენტების ორკესტრს გადასცეს.
2016 წელს შექმნილ ორკესტრს ჯერ კიდევ არ ჰქონდა საკუთარი სარეპეტიციო დარბაზი და რეპეტიციებს ყველგან ატარებდა, სადაც ეს შესაძლებელი იყო, დაწყებული მისი ლიდერის, დენის არუჰას სახლიდან.
კირიენკოს მიერ მიცემული ოჯახის სახლი რეკონსტრუქციის შემდეგ ეროვნული მუსიკის სახლად გადაკეთდება, პირველ სართულზე საგამოფენო დარბაზით, სადაც ეროვნული ინსტრუმენტების ნიმუშები იქნება წარმოდგენილი, ხოლო მეორე სართულზე სარეპეტიციო დარბაზით, სადაც კონცერტების ჩატარებაც იქნება შესაძლებელი.
რეკონსტრუქცია მალე, სექტემბრის ბოლოს დაიწყება და ობიექტის დასრულება 2026 წლის ბოლოსთვის იგეგმება.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
