კოვიდინფექციის პირველი შემოტევა მინიმალური დანაკარგით დავძლიეთ - თენგიზ ცერცვაძე

ბოლო 24 საათში საქართველოში covid-19-ის 9 ახალი შემთხვევა გამოვლინდა.

10 მაისის მონაცემებით, საქართველოში კორონავირუსით ინფიცირების 635  შემთხვევაა დადასტურებული. კარანტინის რეჟიმშია 4717 ადამიანი, ხოლო სტაციონარში მეთვალყურეობის ქვეშ – 452 პირი. კორონავირუსით ინფიცირებულთაგან 309 გამოჯანმრთელდა და 10  გარდაიცვალა. 

უცხოეთიდან საქართველოში სამკურნალოდ გადმოყვანილია კორონავირუსით ინფიცირებული საქართველოს 3 მოქალაქე.

ინფექციური საავადმყოფოს დირექტორის, თენგიზ ცერცვაძის თქმით, კორონავირუსის ახალი შემთხვევების გამოვლენის ბოლო დღეების სტატისტიკა მიუთითებს იმაზე, რომ თუ თუ საზოგადოება ეპიდემიოლოგების რეკომენდაციებს დაიცავს, covid-19-ით დაავადებულთა რაოდენობა მკვეთრად აღარ გაიზრდება: 

„თუ რაღაც ისეთი შეცდომები არ დავუშვით, როგორიც იყო დაშვებული ბოლნისის და მარნეულის, ასევე ქობულეთის მუნიციპალიტეტებში, ანდაც ლენტეხში, სადაც 50-კაციანი სუფრა გამართეს, მგონია, რომ კოვიდინფექციის პირველი და ყველაზე მძლავრი შემოტევა მინიმალური დანაკარგით დავძლიეთ,“ – ამბობს ცერცვაძე. 

• კორონავირუსი უჰანის ლაბორატორიიდან? რაში ადანაშაულებს დასავლეთი ჩინეთს
• პანდემია – შანსი მმართველი პარტიისთვის? საუბარი თორნიკე შარაშენიძესთან და კორნელი კაკაჩიასთან
• საქართველო: პანდემია, როგორც რუსეთზე ეკონომიკური დამოკიდებულების შემცირების შანსი

კორონავირუსით ინფიცირების პირველი შემთხვევა საქართველოში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი – საყოველთაო კარანტინის რეჟიმი.