„კორონავირუსით დაინფიცირების პროცესი კონტროლს აღარ ექვემდებარება“, - სომხეთის ჯანდაცვის მინისტრი

სომხეთის მოსახლეობაში კორონავირუსი გავრცელებას აგრძელებს, და როგორც ჯანდაცვის მინისტრმა უკვე განაცხადა, ინფექციის წყაროებზე კონტროლი დაკარგულია.

10 აპრილის დილის მონაცემებით, დაინფიცირებულთა რიცხვი 937-მდე გაიზარდა. გამოჯანმრთელებულთა რაოდენობაა – 149, სტაციონარში რჩება 777 ადამიანი. დღის განმავლობაში გარდაცვალების ორი შემთხვევის შესახებ გახდა ცნობილი, სულ – 12.

ამასთან დაკავშირებით არსენ ტოროსიანმა მთავრობას შესთავაზა საგანგებო მდგომარეობის რეჟიმის გაგრძელება, რომელიც 16 მარტს დაწესდა და 14 აპრილს უნდა დასრულებულიყო.

ჯერჯერობით ამ საკითხთან დაკავშირებით ოფიციალური გადაწყვეტილება არ არსებობს. ნებისმიერ შემთხვევაში, მედიკოსებმა მოვლენების უარესად განვითარებისთვის მზადების დაწყება გადაწყვიტეს.

ამავდროულად სომხეთში სხვადასხვა ქვეყნიდან და ორგანიზაციიდან ფინანსური და ჰუმანიტარული დახმარება შედის.

როგორ პროგნოზს აკეთებს მინისტრი და ვინ ეხმარება სომხეთს ეპიდემიასთან გასამკლავებლად

• კორონავირუსი კავკასიაში. სიახლეები და მოვლენები კორონავირუსის ეპიდემიასთან დაკავშირებით
• ეპიდემია, საგანგებო მდგომარეობა ერევანში, როგორ გამოიყურება ეს. ვიდეო

                                         პროცესი კონტროლს აღარ ექვემდებარება

ბოლო ხანს დღის განმავლობაში გამოვლენილი დაინფიცირებულების რიცხვი მცირდებოდა, რამაც იმის იმედი გააჩინა, რომ ვირუსის დაძლევის პროცესი იწყებოდა. თუმცა, ჯანდაცვის მინისტრი საპირისპირო აზრის იყო. მან საკუთარი არაოპტიმისტური პროგნოზი ჯანდაცვის საპარლამენტო კომისიას წარუდგინა:

 „ვერ მივიჩნევთ, რომ გავრცელება შეჩერდა და 100 პროცენტით ჩაქრა. რატომ? იმიტომ, რომ თუკი მანამდე 50 შემთხვევა გვქონდა, მაგრამ – დაინფიცირების ერთი წყაროდან, მაგალითად – დიდი საწარმოდან, ახლა 16, 20, 30 შემთხვევა გვაქვს, მაგრამ 10 ან 20 სხვადასხვა ადამიანისგან. შესაბამისად, კორონავირუსით დაინფიცირების პროცესი კონტროლს აღარ ექვემდებარება“.

პარლამენტში გაკეთებული ამ განცხადების შემდეგ არსენ ტოროსიანმა საგანგებო მდგომარეობის გაგრძელების თაობაზე მთავრობისადმი თავის წინადადების შესახებ განაცხადა:

 „მიგვაჩნია, რომ ეს  კორონავირუსის საპროფილაქტიკოდ ჩვენი ქმედებების ხანგრძლივობისთვის არის მნიშვნელოვანი“.

მისი აზრით, საგანგებო მდგომარეობის გაუქმების შემთხვევაშიც კი, ცხოვრების ჩვეულ წესზე სწრაფად გადასვლა მაინც ვერ მოხერხდება. საჭიროა გრძელვადიანი ზომები, რათა ვირუსის გავრცელების ჯაჭვი გაწყდეს.

„საჭიროა დაინფიცირების ახალი შემთხვევებისთვის თვალ-ყურის დევნება, გამოვლენა და მკურნალობა, ხოლო ინფიცირებულებთან კონტაქტში მყოფთა – იზოლირება. და ამის მანამდე გაკეთება, ვიდრე ვირუსის საწინააღმდეგო ვაქცინა  შეიქმნება, ან ადამიანები გამოჯანმრთელდებიან“.

სავარაუდოდ,  მსჯელობა საგანგებო რეჟიმის ერთი თვით გაგრძელების საკითხზე მიმდინარეობს. 

რა დახმარებას იღებს სომხეთი

მედიკოსებს მიაჩნიათ, რომ  პაციენტების რიცხვის მოსალოდნელი ზრდისთვის მომსახურების რეზერვები ჯერჯერობით არსებობს.

ამავდროულად, აპრილის დასწყისიდან სომხეთი კორონავირუსთან საბრძოლველად სხვადასხვა ქვეყნიდან და ორგანიზაციიდან იღებს დახმარებას.

ევროკავშირმა კორონავირუსთან საბრძოლველად პროექტების განსახორციელებლად 92 მილიონი ევროს ოდენობის დახმარების გამოყოფის შესახებ განაცხადა. ერევანში ევროკავშირის  დელეგაციამ თავის Facebook-გვერდზე განაცხადა, რომ ეს თანხა მოკლევადიან და გადაუდებელ საჭიროებებს მოხმარდება:

„სახსრები – სამედიცინო აღჭურვილობისა და აქსესუარების მიწოდებას, მედპერსონალისა და ლაბორატორიის თანამშრომლების გადამზადებას, მცირე და საშუალო ბიზნესისა და საქმიანი საზოგადოების მხადაჭერას, ასევე – კორონავირუსის აფეთქების შედეგად დაზარალებულებს მოხმარდება“.

რუსეთმა სომხეთს კორონავირუსის ლაბორატორიული დიაგნოსტიკისთვის ტესტები გადასცა.

გარდა ამისა, ერევანში უკვე ჩაფრინდა ორი რუსული სატრანსპორტო თვითმფრინავი Ил-76 –    სამხედრო სპეციალისტებითა და სამედიცინო აღჭურვილობით.

მიღებულია ასევე მობილური ლაბორატორია – როგორც სომხური ქვედანაყოფების, ისე გიუმრიში განთავსებული რუსული სამხედრო ბაზის  სამხედრო მოსამსახურეებს შორის კორონავირუსის გამოსავლენად.

ჩინეთიდან ჩამოვიდა წამლების, სამედიცინო აქსესუარებისა და აღჭურვილობის დიდი პარტია:

 ფილტვების ხელოვნური ვენტილაციის 120 აპარატი;

ჟანგბადის ორი სადგური;

60 ათასი ტესტი;

60 ათასი სამედიცინო ნიღაბი;

280 ათასი დამცავი ნიღაბი;

20 ათასი დამცავი სათვალე;

100 ათასი დამცავი სამოსი.

ჩინეთიდან სომხეთში გზავნილებმა განსაკუთრებული ყურადღება მიიქცია. მთელი სამედიცინო აღჭურვილობა ჩავიდა შემდეგი წარწერის მქონე ყუთებით:

„დაე, ჩვენი მეგობრობა არარატის მთაზე მაღალი და მდინარე იანძიზე გრძელი იყოს“.

სომხეთს მხარდაჭერა გაუწია ჰუმანიტარულმა ინიციატივამ „ავრორა“. ჯანდაცვის სამინისტროს ფილტვების ხელოვნური ვენტილაციის აპარატების შესაძენად 120 ათასი დოლარის ოდენობის თანხა გადაერიცხა.

 „ეპიდემიის აფეთქებამ მსოფლიო, სომხეთის ჯანდაცვის სისტემის ჩათვლით, იძულებული გახადა, დროული მკურნალობისთვის ძალების მობილიზება მოახდინოს და ყველა რესურსი გამოიყენოს. ამ კრიზისთან მიმართებით ჩვენი სახელმწიფოს რეაგირება ჯანდცვის სფეროში ადეკვატური იყო. თუმცა, სათანადოდ უნდა შეფასდეს აუცილებელი აღჭურვილობის მნიშვნელობაც“, – თქვა სომხეთის ჯანდაცვის მინისტრმა.