კორონავირუსის „დელტა“ და „ალფა“ შტამებმა აზერბაიჯანამდეც მიაღწია

ჯემნიუსი

ბაქო

2021 წლის 13 ივლისს, აზერბაიჯანში პირველად გამოავლინეს კორონავირუსის „დელტა“ შტამით ინფიცირების 31 და „ალფა“ შტამით (ბრიტანული შტამი) ინფიცირების 9 შემთხვევა. ქვეყნის ჯანდაცვის სამინისტრომ მოქალაქეებს აქტიური ვაქცინირებისკენ მოუწოდა. მაგრამ დაიცავს ვაქცინები ახალი შტამებისგან ადამიანებს? რას ამბობენ ექიმები?

„პანდემია SARS-CoV-2, რომელიც წელიწადზე მეტია გრძელდება, ჯანდაცვის სისტემის მნიშვნელოვანი პრობლემაა მთელ მსოფლიოში და სერიოზულ სოციალურ და ეკონომიკურ სირთულეებს ქმნის. კორონავირუსის მუტაციის ბოლო ვარიანტები სერიოზულ შეშფოთებას იწვევს.

ჩვენს ქვეყანაში ეპიდემიოლოგიური ვითარების კონტროლის მიზნით გატარებული ღონისძიებების ფარგლებში, ჰემატოლოგიისა და ტრანსფუზიოლოგიის ეროვნული ცენტრის დიაგნოსტიკურ ცენტრში SARS-CoV-2-ის ვირუსის ვარიანტების რეგულარული გენეტიკური კვლევა ტარდება.

კვლევის შედეგად გამოვლინდა B.1.617 („დელტა“) შტამის 31 ნიმუში, რომელიც უცხოეთიდან ჩამოსულ პირებს დაუდასტურდათ და B.1.1.7 ვარიანტის (20 Alpha V1, დიდი ბრიტანეთი) 9 ნიმუში“, – ნათქვამია აზერბაიჯანის ჯანდაცვის სამინისტროს, სავალდებულო სამედიცინო დაზღვევის ეროვნული სააგენტოსა და სამედიცინო ტერიტორიული განყოფილებების მართვის გაერთიანების (TƏBİB) ერთობლივ განცხადებაში.

აღნიშნულმა ორგანიზაციებმა, რომლებიც ქვეყანაში ჯანდაცვის ვითარებაზე არიან პასუხისმგებლები, მოქალაქეებს აქტიური ვაქცინაციისკენ მოუწოდეს.

„მსოფლიოსა და ჩვენს ქვეყანაში ჩატარებული კვლევების შედეგების ანალიზმა კიდევ ერთხელ აჩვენა, რომ ვირუსის ახალი და სწრაფად გავრცელებადი სახიფათო ვარიანტებისგან დაცვის ყველაზე უფრო ეფექტიანი საშუალება ვაქცინაციაა. დღეს ვაქცინაციის წყალობით არის სტაბილური ეპიდემიოლოგიური სიტუაცია ჩვენს ქვეყანაში. ჩვენ კიდევ ერთხელ მოვუწოდებთ ყველა მოქალაქეს, დაუყოვნებლივ ჩაიტარონ ვაქცინაცია“, – აღნიშნულია მოსახლეობისადმი მიმართვაში.

COVID-19-თან დაკავშირებული ვითარება

უკვე თვეზე მეტია აზერბაიჯანში კორონავირუსის ინფექციასთან დაკავშირებული ვითარება სტაბილური რჩება. მართალია ბოლო დღეებში ინფიცირების დღიური მაჩვენებლის მცირედი ზრდა შეინიშნებოდა, მაგრამ, ექიმების თქმით, ვითარება კონტროლს ექვემდებარება.

დღეისათვის, მთელი ქვეყნის მასშტაბით, სულ, დაახლოებით, კორონავირუსით ინფიცირების 1600 აქტიური შემთხვევაა.

ვაქცინაცია აზერბაიჯანში

2021 წლის 13 ივლისის მონაცემებით, აზერბაიჯანში კორონავირუსის საწინააღმდეგო ვაქცინის პირველი დოზით აცრილია მთელი ქვეყნის მოსახლეობის 24.9 პროცენტი. მოქალაქეთა 16.6-მა პროცენტმა კი ვაქცინის ორივე დოზა მიიღო.

ამ დროისთვის ქვეყანაში კორონავირუსის საწინააღმდეგო ვაქცინის ოთხი სახეობაა ხელმისაწვდომი.

ექსპერტის მოსაზრება

ექიმ სულეიმან ნაზაროვის თქმით, როგორც თავად კორონავირუსი, ისე მისი ცალკეული შტამები ნაკლებად შესწავლილია.

„ყველას უნდა ესმოდეს, რომ სპეციალისტებიც უმრავლეს შემთხვევაში გასცემენ არცთუ ბოლომდე გადამოწმებულ ინფორმაციას. ამის მიზეზი ყველაზე ბანალურია: ახალი ინფექციაა, ბოლომდე შესწავლილი არ არის, ვაქცინებთან დაკავშირებით კი საქმე საერთოდ ტრაგიკომიკურია.

ხანდახან, ზოგიერთი ჩემი კოლეგა ვაქცინის მოქმედების გარკვეულ ვადებს ასახელებს, ასევე, მის მოქმედებას ამა თუ იმ შტამზე. მთელი ეს ინფორმაცია დაფუძნებულია საშუალოსტატისტიკურ მონაცემებზე, რომელიც არ უკავშირდება თავად კორონავირუსს“, – აღნიშნა ექსპერტმა JAMnews-თან ინტერვიუში.

„მიღებული საერთაშორისო სტანდარტების თანახმად, ვაქცინის ხარისხზე შეიძლება ვისაუბროთ მისი გამოჩენიდან მხოლოდ 5 წლის შემდეგ. სწორედ ამ პერიოდში მთავრდება ახალი ვაქცინის გამოცდის ყველა ფაზა. მაგრამ კორონავირუსის საწინააღმდეგო ვაქცინები ფაქტობრივად მაშინვე გამოჩნდა და მათგან ყველაზე „ძველი“ ერთი წლისაც არ არის. ამიტომ, ჯერჯერობით ძალიან ადრეა საუბარია მათ რაღაც თვისებებზე. ამისათვის უბრალოდ აუცილებელი მონაცემები არ არსებობს.

მაგრამ, რა შეგვიძლია ვურჩიოთ შექმნილ ვითარებაში მოსახლეობას? მხოლოდ ვაქცინირება. იმიტომ რომ, ეს ჯერჯერობით ერთადერთი გამოსავალია შექმნილ სიტუაციაში. მე არსებულ ვაქცინებს – „წყალწაღებულისთვის ხავსს“ არ ვუწოდებდი. ის უკვე აჩვენებს დადებით სტატისტიკას ქვეყნებში, სადაც ადამიანები მასობრივად იცრებიან. ამიტომ, ვაქცინის გარდა სხვა არაფრის რჩევა არ შეგვიძლია. ამ მომენტში ეს ერთადერთია, რამაც შეიძლება რეალურად გადაგვარჩინოს“, – განმარტა ნაზაროვმა.