კორონავირუსი და სამხრეთი ოსეთი: არ არიან ინფიცირებულები, არ არის ტესტები, არის ერთი ლაბორატორია და ერთი რეანიმაცია

სამხრეთ ოსეთში, ჯერჯერობით, კორონავირუსით ინფიცირების არც ერთი შემთხვევა ოფიციალურად არ დადასტურებულა და საერთოდაც, პანდემიასთან დაკავშირებული სიტუაცია ორჭოფულია.

ერთი მხრივ, ხელისუფლება და ადგილობრივი მედია (ძირითადად, ხელისუფლების მიერ კონტროლირებადი) მოსახლეობას ურჩევენ, პანიკას არ აყვნენ და მხოლოდ 26 მარტიდან აკრძალავენ კულტურულ-მასობრივ ღონისძიებებს.

სასწავლო დაწესებულებები და საბავშვო ბაღები 18-დან 31 მარტის ჩათვლით დახურულია, მაგრამ მიზეზად გაზაფხულის გრიპი დაასახელეს. მაშინვე დააწესეს შეზღუდვა სამხრეთ ოსეთში შესვლის მსურველებზე რუსეთის მხრიდან და სრულად ჩაკეტეს საქართველოს მხრიდან შესასვლელი.

სოციალურ ქსელებში, ასევე, განიხილავენ „ადგილობრივი ზომების“ ადეკვატურობას – მაგალითად, პროფილაქტიკის მიზნით ადგილობრივი არყის დალევას და ყალბი ცნობების გავრცელებისგან თავის შეკავებას.

მეორე მხრივ, ადგილობრივები მასობრივად ყიდულობენ მაღაზიებში პროდუქტებსა და პირველადი საჭიროების ნივთებს.

„მოულოდნელად, ჩვენთან, კორონავირუსით დაინფიცირების შემთხვევა რომ გამოვლინდეს… მაშინ, რუსეთთან საზღვარს ჩაკეტავენ. ჰოდა, სახლში ფაფა მაინც იყოს“, – განუცხადა რუსულ საინფორმაციო სააგენტო „კავკაზსკი უზელს“ ცხინვალის მცხოვრებმა, მარატმა.

• სამხრეთ ოსეთში მძღოლები და მცველები სჭირდებათ. იურისტები და ეკონომისტები – არა

• კორონავირუსის ეპიდემიის გამო დაცარიელებული
• თბილისიკორონავირუსი: გამოცხადდა პანდემია. რას ნიშნავს ეს და რას უნდა ველოდოთ

პროდუქტების ერთ-ერთი მაღაზიის მფლობელმა სააგენტოს უთხრა, რომ „16 მარტიდან მოყოლებული თაროებიდან ქრება მარცვლეული, მაკარონი, ტუალეტის ქაღალდი, წვენები და ზეთი“.

„ისეთი აჟიოტაჟია პროდუქტებთან დაკავშირებით, როგორც ახალ წელს“, – განაცხადა მან.

ერთი რეანიმაცია, ერთი ხელოვნური სუნთქვის აპარატი და არცერთი ტესტი

ოფიციალური ინფორმაციით, 23 მარტს, კორონავირუსის ნიშნებით, 6 ადამიანი მოათავსეს სტაციონარულ კარანტინში. კიდევ 19 ადამიანს სახლში აკვირდებიან, რადგან ისინი დაბრუნდნენ ისეთი ქვეყნიდან, სადაც კორონავირუსის პანდემია დაფიქსირდა.

სამხრეთ ოსეთის ჯანდაცვის სამინისტრო აცხადებს, რომ ყველაფერი საკმარისია, მათ შორის, ანტივირუსული პრეპარატები. ოფიციალური ინფორმაციით, ინფექციური საავადმყოფოს გრიპის განყოფილებაში მომზადებულია ინტენსიური თერაპიის პალატა (ერთი პალატა). ასევე, აქვთ ხელოვნური სუნთქვის აპარატი (ერთი აპარატი).

ამასთან, სამინისტრომ აღიარა, რომ ცხინვალში საერთოდ არ აქვთ კორონავირუსის გამოსავლენი ტესტები. „მათი შესყიდვის საკითხი დაყენებულია“, – განუცხადა მინისტრმა ჟურნალისტებს ტესტების შესახებ კითხვის პასუხად.

ერთი ლაბორატორია, მაგრამ ისიც არ არის Covid-19-ის ტიპის ინფექციის შესაფერისი

თავისი შეშფოთების შესახებ ისაუბრა სამხრეთ ოსეთის მთავარმა სანიტარულმა ექიმმა მარინა ქოჩიევამ – ერთადერთი ლაბორატორია არ შეესაბამება უსაფრთხოების მოთხოვნებს:

„ლაბორატორია ადაპტირებულია ხიფათის მესამე-მეოთხე ჯგუფებთან სამუშაოდ. ეს ვირუსი კი პირველ და მეორე ხიფათის ჯგუფებს განეკუთვნება. მაგრამ სხვა ლაბორატორია არ გვაქვს, გვიწევს გამოვიყენოთ ის, რაც გვაქვს“.

„ჩვენს თავზე ავიღეთ პასუხისმგებლობა და ორი თანამშრომელი კურსის გასავლელად სტავროპოლის მხარეში (რუსეთში) გავგზავნეთ“.

კოჩიევამ დაადასტურა, რომ სამხრეთ ოსეთში იგივე პრობლემაა, რაც დანარჩენ მსოფლიოში: არასაკმარისია სამედიცინო ნიღბები, სანიტარული საშუალებები და ზოგიერთი წამალი.

ეს პრობლემა კიდევ უფრო სერიოზული შეიძლება გახდეს. რუსეთმა საკუთარი ტერიტორიიდან ინდივიდუალური დაცვის საშუალებებისა და ზოგიერთი სამედიცინო პროდუქციის გატანა აკრძალა, იმპორტის სხვა წყარო კი სამხრეთ ოსეთს არ ჰყავს.

ადგილობრივმა ხელისუფლებამ დახმარების თხოვნით უკვე მიმართა მოსკოვს.

ოს სტუდენტებს რუსეთში, საერთო საცხოვრებლებიდან ასახლებენ და სახლში, სამხრეთ ოსეთში გზავნიან

საუბარია რუსული უნივერსიტეტების სტუდენტებზე, რომლებიც იქ სამხრეთ ოსეთიდან ჩავიდნენ სასწავლებლად. მათ, ისევე, როგორც ყველა სხვა უცხოელ სტუდენტებს, მოსკოვში, საერთო საცხოვრებლებიდან ასახლებენ და სამშობლოში გზავნიან.

ბევრი ახალგაზრდა ამის გამო მძიმე მდგომარეობაში აღმოჩნდა. მათ როგორმე სახლამდე უნდა ჩააღწიონ, შემდეგ კი სამხრეთ ოსეთში მოეწყონ, სადაც სამუშაო არ არის. დაუჭერს თუ არა მათ მხარს ხელისუფლება – უცნობია, რადგან ამ სიტუაციაზე ჯერჯერობით კომენტარები არ კეთდება.

ქართული საზოგადოება მძიმე მდგომარეობაშია

არაოფიციალური ინფორმაციით, მათ შორის, ვინც ახლა თვითიზოლაციაშია – ოთხი ქართული თემიდანაა, რომელიც სამხრეთ ოსეთის ლენინგორის რაიონში (თბილისის ტერმინოლოგიით – ახალგორის) კომპაქტურად ცხოვრობს.

როდესაც, 27 თებერვალს, სამხრეთ ოსეთმა გაურკვეველი ვადით, სრულად დაკეტა საქართველოში გადასასვლელი იმის გამო, რომ იქ კორონავირუსით ინფიცირების შემთხვევა გამოვლინდა, ქართული საზოგადოება დარტყმის ქვეშ აღმოჩნდა. ბევრი ადამიანი ქართულ პენსიას იღებს, აწარმოებს ბიზნესს და პროდუქციას ქართულ მხარეს ყიდულობს.

მოგვიანებით გამონაკლისი დაუშვეს ავადმყოფებისთვის. მათ ქართულ მხარეს გადასვლის უფლება მისცეს იმ პირობით, რომ დაბრუნების შემდეგ, ორკვირიან კარანტინს გაივლიან.

ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო