კორონავირუსი ჩრდილოეთ კავკასიაში: ინფიცირებულია ყველა რეგიონი, გარდაიცვალა ინგუშეთის მთავარი მუფთი
ინგუშეთში, 11 აპრილს, კორონავირუსით გარდაიცვალა მთავარი მუფთი, აბდურახმან მარტაზანოვი. ის რესპუბლიკაში ყველაზე ცნობილი და პატივსაცემი ღვთისმეტყველი იყო.
ეს მოვლენა ჩრდილოეთ კავკასიაში, ყველაზე ხმაურიანი იყო გასული საგანგაშო კვირის განმავლობაში, სადაც კორონავირუსით ინფიცირებულთა რაოდენობა იზრდება.
დაღესტანში ფიქსირდება „ეპიდემიის სტატია, როდესაც კონტროლი დაკარგულია“. სტავროპოლის მხარეში, ხალხს შეჩერებული ბიზნესის გამო მოახლებული სიღარიბის ეშინია.
და ყველგან ბევრს სწამს გლობალური შეთქმულების.
ჩრდილოეთ კავკასიაში კორონავირუსის პანდემიასთან დაკავშირებული მოვლენების მოკლე მიმოხილვა.
11 აპრილს, დღე-ღამის განმავლობაში, ჩრდილოეთ კავკასიაში, კორონავირუსით ინფიცირების 51 ახალი შემთხვევა გამოვლინდა. სულ რეგიონში, დაინფიცირებულია 275 ადამიანი.
რუსეთის ფედერაციის მთელ ტერიტორიაზე, 11 აპრილს, დღე-ღამის განმავლობაში, დაინფიცირდა 1 667 ადამიანი. სულ, 11 აპრილის მონაცემებით, ქვეყანაში დაინფიცირებულია 13 584 ადამიანი, გარდაიცვალა – 106.
რუსეთის ხელისუფლებამ აამოქმედა ვებგვერდი стопкоронавирус.рф, სადაც მთელი ქვეყნის სტატისტიკა ქვეყნდება.
- რუსეთი: ვირუსის გავრცელება პიკს უახლოვდება, მედიცინა მზად არ არის, ხელისუფლება კი იზოლაციის შესუსტებაზე ფიქრობს
- მოსაზრება: რუსებმა თავისიანები მიატოვეს
- ჩრდილოეთ ოსეთი: გადაჭედილი სპირტის საწყობები და აფთიაქები, სადაც ანტისეპტიკური საშუალებები არ არის
ინგუშეთი: ინფიცირებულთა რიცხვის ზრდა. მიზეზი, შესაძლოა, საუდის არაბეთში მცირე ჰაჯი იყოს
ბოლო მონაცემებით, ინგუშეთში, კორონავირუსით ინფიცირების 29 შემთხვევაა დადასტურებული. გარდაიცვალა ორი ადამიანი.
მაგრამ კიდევ 60 მოქალაქე ელოდება COVID-19-ზე განმეორებითი ტესტის პასუხს – მას შემდეგ, რაც პირველმა ტესტმა დადებითი პასუხი აჩვენა.
მუფთ მარტაზანოვის სიკვდილი მოულოდნელი იყო. ის ჰოსპიტალიზაციიდან მალევე გარდაიცვალა.
მანამდე 64 წლის მამაკაცი დაიღუპა.
ინფიცირებულთა შორის 3 ექიმია.
ვირუსის გავრცელების დინამიკითა და ინფიცირებულთა რაოდენობით, ინგუშეთი აბსოლუტური ლიდერია ჩრდილოეთ კავკასიაში. ადგილობრივების თქმით, ამას ორი მიზეზი აქვს.
პირველი – ხელისუფლების მხრიდან შეზღუდვის ზომების სუსტი კონტროლი.
მეორე – ადგილობრივი მუსლიმები, რომლებიც, დაახლოებით, ათი დღის წინ დაბრუნდნენ მცირე ჰაჯიდან, საუდის არაბეთიდან.
«ეს ათობით ადამიანი, შესაძლოა იქ დაინფიცირებულიყო. თუკი ეს ასეა – უახლოეს დღეებში, დაავადების პიკი იქნება», – განუცხადა JAMnews-ს ნაზრანის მცხოვრებმა, ტიმურ ევლოევმა.
ინგუშეთის ყველაზე დიდ ქალაქებში, ნაზრანსა და მაგასში მეჩეთები 3 აპრილს დაკეტეს, მაგრამ სოფლებში რა ხდება – უცნობია.
დაღესტანი: ვირუსის უკონტროლო გავრცელება
ყველაზე რთული ვითარება დაღესტანში შეინიშნება. იქ ეპიდემია ე.წ. მეოთხე ეტაპზე – უკონტროლოზე გადავიდა.
11 აპრილს, იქ კორონავირუსით ინფიცირების 84 შემთხვევაა დადასტურებული. სამი ადამიანი გარდაიცვალა. 2 183 ადამიანი კარანტინშია და კიდევ 2 037 – თვითიზოლაციაში.
ყაბარდო-ბალყარეთი: პირველი ინფიცირებული მექადან დაბრუნდა
11 აპრილს, ყაბარდო-ბალყარეთში, ოფიციალური მონაცემებით, 30 ადამიანია ინფიცირებული. ორი გამოჯანმრთელდა, გარდაცვლილი არ არის. 1 020 ადამიანი თვითიზოლაციაშია.
ნალჩიკის მცხოვრები, ფატიმა JAMnews-ს მოუყვა, რომ არც ქალაქში და არც მთლიანად რესპუბლიკაში, პანიკა არ არის.
ცნობილია, რომ ყაბარდო-ბალყარეთში, კორონავირუსით ინფიცირებული პირველი მოქალაქე – ქალაქ ჩეგემის მცხოვრებია და ის საუდის არაბეთიდან, მექადან, ჰაჯიდან დაბრუნდა.
«აქ არ არის ისე, რომ ადამიანები პანიკაში იყვნენ ან შტურმით იღებდნენ საავადმყოფოებს. სიმშვიდეა. ბევრს არ ჯერა ინტერნეტში გავრცელებული ინფორმაციის. არავინ მიტინგზე გასვლის მოწოდებებით არ გამოდის».
ჩრდილოეთ ოსეთი: „ცუდი ტენდენციაა“, მაგრამ ბიზნესი და საზოგადოებრივი ტრანსპორტი კვლავ მუშაობს
11 აპრილის ჩათვლით, ჩრდილოეთ ოსეთში, კორონავირუსის დიაგნოზი 27 ადამიანს დაუსვეს. მათგან ერთი პაციენტი გარდაიცვალა, სამი – გამოჯანმრთელდა.
კიდევ 90 ადამიანს კორონავირუსის პირველადმა ტესტმა დადებითი პასუხი უჩვენა, ისინი განმეორებითი ტესტის პასუხს ელიან.
781 ადამიანი თვითიზოლაციაშია.
იზოლირებულია და ექიმების დაკვირვების ქვეშ იმყოფება ჩრდილოეთ ოსეთის ხელმძღვანელის ადმინისტრაციის სამი თანამშრომელი. მათმა პირველადმა ტესტებმა კორონავირუსზე დადებითი პასუხი აჩვენა.
მათი ოჯახის წევრები და კოლეგები ასევე კარანტინში არიან. ადმინისტრაციის შენობაში დეზინფექცია ჩაატარეს.
ჩრდილოეთ ოსეთის ჯანდაცვის მინისტრი, ტამერლან გოგიჩაევი ტენდენციას ახასიათებს, როგორც „ცუდს“. მისი აზრით, კრიტიკულად აუცილებელია იზოლაციის დაცვა. ამბობს, რომ სხვანაირად „სურათი, შესაძლოა, გაუარესდეს და ინფიცირებულთა რაოდენობამ ათეულები შეადგინოს“.
19 აპრილამდე გაგრძელდება თვითიზოლაციის რეჟიმი. თუმცა, რესპუბლიკის ხელმძღვანელმა ვიაჩესლავ ბიტაროვმა 10 აპრილს განაცხადა, რომ მის გამკაცრებას არ აპირებს – და უკვე მისცა სამუშაოდ გასვლის უფლება მათ, ვისაც საკუთარი ბიზნესი აქვს.
ვლადიკავკაზში, უკვე გაიხსნა საპარიკმახეროები და სილამაზის სალონები.
ჯერ კიდევ 9 აპრილს განაახლა მუშაობა საზოგადოებრივმა ტრანსპორტმა.
ჩრდილოეთ ოსეთში, განსაკუთრებით აქტიურები არიან იმ ადამიანთა ჯგუფები, რომელთაც კორონავირუსი გამოგონილად მიაჩნიათ. ისინი ადამიანებს იზოლაციაზე უარის თქმისკენ, ქუჩაში გასვლისა და საპროტესტო მიტინგის გამართვისკენ მოუწოდებენ.
ჩეჩნეთი: მკაცრი და სასტიკი საკარანტინო კონტროლი
ჩეჩნეთი – ერთადერთი რესპუბლიკაა ჩრდილოეთ კავკასიაში, რომელმაც საკუთარი საზღვრები ჩაკეტა რუსეთის მოქალაქეებისთვის, რომლებსაც ადგილობრივი ბინადრობის ნებართვა არ აქვთ. თუმცა, ღიაა გზა სატვირთო ავტოტრანსპორტისათვის.
5 აპრილს, გროზნომ სრული თვითიზოლაციის რეჟიმი გამოაცხადა, დაკეტა შესასვლელები და გასასვლელები, აკრძალა ტრანსპორტითა და ფეხით გადაადგილება 20:00 საათიდან დილის 8 საათამდე.
დადასტურებულია კორონავირუსით ინფიცირების 48 შემთხვევა. 15 ადამიანი გამოჯანმრთელდა, ორი – გარდაიცვალა.
ჩეჩნეთის ხელმძღვანელმა, რამზან კადიროვმა მხარი დაუჭირა პოლიციელებს, რომლებმაც თვითიზოლაციის რეჟიმის დარღვევისთვის ადგილობრივ მცხოვრებს სცემეს.
«უკეთესია ერთი დარტყმა, ვიდრე ათასობით დასაფლავება“, – განაცხადა კადიროვმა.
სტავროპოლის მხარე: ბიზნესი უფრო მნიშვნელოვანია, ვიდრე კორონავირუსი
11 აპრილს, სტავროპოლის მხარეში, 66 ინფიცირებულია. ერთი ადამიანი გარდაიცვალა, 9 – გამოჯანმრთელდა.
მხარის ყველა კურორტი – ჟელეზნოვოდსკი და პიატიგორსკი – კარანტინზეა ჩაკეტილი.
«ქალაქში ტურისტები არ არიან, ადგილობრივ მცხოვრებლებს თვითიზოლაციის დარღვევისთვის აჯარიმებენ. ამბობენ, რომ, შესაძლოა, ივნისამდე ყველაფერი დაკეტილი იყოს, ასე რომ, საკურორტო სეზონი არ იქნება», – განუცხადა JAMnews-ს პიატიგორსკის ერთ-ერთი სასტუმროს თანამშრომელმა.
ადგილობრივმა პოლიტიკურმა აქტივისტმა, ვიტალი ზუბენკომ JAMnews-ს განუცხადა, რომ ადამიანები, დაახლოებით, ორ თანაბარ ჯგუფად გაიყვნენ. ერთნი მაქსიმალურ თვითიზოლაციას ითხოვენ – მეორენი კი აცხადებენ, რომ ბიზნესის შეჩერების შედეგები კორონავირუსზე უარესი იქნება.
«ზოგადად, არ შეიძლება ითქვას, რომ სტავროპოლის ქუჩები უდაბნოა. და ძირითადად, ადამიანები არ ატარებენ ნიღბებს და არ იჭერენ არანაირ დისტანციას», – განაცხადა ზუბენკომ.
ადიღეა და ყარაჩაე-ჩერქეზეთი
11 აპრილს, ადიღეაში, კორონავირუსით ინფიცირების შვიდი შემთხვევაა გამოვლენილი, ყარაჩაე-ჩერქეზეთში – ცხრა.
დაავადება ყველას შემთხვევაში უსიმპტომოდ მიმდინარეობს, ისინი სახლში, თვითიზოლაციაში, სამედიცინო დაკვირვების ქვეშ იმყოფებიან და გაფრთხილებულები არიან, რომ რეჟიმის დარღვევისთვის, სისხლის სამართლებრივი პასუხისმგებლობა დაეკისრებათ.
