"აქეთა მხარეს ჩვენ ყოველთვის გულგახსნილი შეგხვდებით" - პრემიერმა გაეროში ოკუპირებულ ტერიტორიაზე მცხოვრებ მოქალაქეებს მიმართა
კობახიძემ ოკუპირებულ ტერიტორიაზე მცხოვრებ მოქალაქეებს მიმართა
პრემიერმინისტრმა ირაკლი კობახიძემ გაეროს გენერალურ ასამბლეაზე სიტყვით გამოსვლისას ოკუპირებულ ტერიტორიაზე მცხოვრებ მოქალაქეებს მიმართა. მისი თქმით, საქართველო ყველა ძალისხმევას იყენებს, რომ რეგიონი “შესაძლებლობათა” რეგიონად იქცეს.
კობახიძეს გამოსვლაში ისევ არ უხსენებია რუსეთი.
პრემიერი აშშ-ს პრეზიდენტის, ჯო ბაიდენის ადმინისტრაციის მიერ, მსოფლიო ლიდერებისა და გაეროს მაღალჩინოსნების მიღებაზე მისი მიწვევის გაუქმებას გამოეხმაურა და თქვა, რომ ეს იყო “ერთგვარი ჰუმანიტარული აქტი ოპოზიციის სასარგებლოდ”.
ირაკლი კობახიძემ ასამბლეის 79-ე სესიაზე სიტყვით გამოსვლისას მმართველი პარტიის გზავნილები კვლავ გაიმეორა და “მშვიდობის მნიშვნელობაზე”, ეკონომიკურ წინსვლასა და კონფლიქტების მშვიდობიანი გზებით გადაჭრაზე ისაუბრა.
რა თქვა საქართველოს პრემიერმინისტრმა
● ვაღიარებთ რა, მშვიდობის ფასს – ყველა ძალისხმევას ვიყენებთ იმისთვის, რომ ჩვენი უშუალო რეგიონი სამხრეთ კავკასია კონფლიქტის ზონიდან შესაძლებლობათა რეგიონად ვაქციოთ.
● მთელი გულით გვახარებს და მივესალმებით აზერბაიჯანსა და სომხეთს შორის არსებული კონფლიქტის მშვიდობიანი მოგვარების პროცესს, რითაც შეიქმნა პლატფორმა რეგიონული თანამშრომლობისთვის – ნდობის, ერთიანობისა და საერთო მომავლის უზრუნველყოფისთვის.
● გაერთიანებული ერების ორგანიზაციის შექმნიდან, თითქმის 8 ათეული წელი გავიდა და ჩვენ კვლავ ვიბრძვით მშვიდობის მისაღწევად – სამწუხაროდ, კონფლიქტებით სავსე სამყაროში, წესებზე დაფუძნებული საერთაშორისო წესრიგი გამუდმებით იმყოფება გამოწვევების წინაშე, რაც მზარდ რისკებს უქმნის მშვიდობას და სტაბილურობას.
● საერთაშორისო სამართლის წესებზე დაფუძნებული საერთაშორისო წესრიგის პატივისცემა არის მშვიდობიანი, აყვავებული და სამართლიანი სამყაროს საფუძველი, ხოლო ეფექტური მიზნისთვის, უფრო შესაფერისი გლობალური ინსტიტუტები, რომელთა ბირთვი გაეროა გადამწყვეტ როლს თამაშობს გლობალურად სტაბილურობის, უსაფრთხოების ადამიანის უფლებების პატივისცემისა და განვითარებისთვის.
● დღევანდელი შეხვედრა უნდა გვთავაზობდეს უკეთესი მომავლის დაპირებას, რაც ასერიგ საჭიროა ამჟამინდელ მშფოთვარე სამყაროში.
● კიდევ ერთხელ მინდა ხაზი გავუშვა მშვიდობის ფორმულირების ინიციატივას და მის მხარდაჭერას.
● აცნობიერებთ რა საკუთარი გამოცდილებიდან, თუ რაოდენ მნიშვნელოვანია მშვიდობა, ჩვენ სათავეში ვუდგავართ ძალისხმევას, რომლის მიზანიცაა უშუალოდ სამხრეთ კავკასიის რეგიონის გარდაქმნა კონფლიქტების რეგიონიდან შესაძლებლობების რეგიონად. ჩვენ მივესალმებით მშვიდობიანი შეთანხმების პროცესს სომხეთსა და აზერბაიჯანს შორის, კერძოდ კი იმ ძალისხმევას, რომელიც მიმართულია მეზობელ ქვეყნებს შორის ურთიერთობების ნორმალიზაციისკენ.
● ჩვენ ყოველთვის ვიყავით მზად და დღესაც მზად ვართ, უზრუნველვყოთ რეგიონული თანამშრომლობის ფორმატი, რომელიც ხელს შეუწყობს ქვეყნებს შორის თანამშრომლობას და ნდობის აღდგენას, ჩვენ შორის უთანხმოების წარსულში დატოვებას და ჩვენს ერთობლივ წინსვლას ყველა იმ რესურსისა და უპირატესობის გამოყენების თვალსაზრისით, რომელთა შეთავაზება ჩვენს რეგიონს შეუძლია მსოფლიოსთვის
● ვიყურებით რა მომავალში და, ამავე დროს, ჩვენს მოკავშირეებსა და პარტნიორებთან ერთად ერთგულად ვემსახურებით აყვავებული საზოგადოების შექმნის იდეას, ჩვენი ერთობლივი ძალისხმევა მომავალშიც იქნება მიმართული მშვიდობის დასამყარებელი ზომების მხარდასაჭერად და მდგრადი განვითარების უზრუნველსაყოფად. ამ გზით კი, ჩვენ ავამაღლებთ ადამიანის ღირსებას არა მხოლოდ საქართველოს ამჟამინდელი მოქალაქეებისთვის, არამედ ყველა მომავალი თაობის საკეთილდღეოდ.
წინაისტორია
25 სექტემბერს ცნობილი გახდა, რომ ბაიდენის მიღებაზე საქართველოს პრემიერმინისტრის, ირაკლი კობახიძის მიწვევა გააუქმეს. “ამერიკის ხმის” ცნობით, მიღებაზე მიწვეულთა სიაში თავდაპირველად კობახიძეც ეწერა, თუმცა, მოგვიანებით აღნიშნული მიწვევა მას გაუუქმდა. გარდა ამისა, პრემიერმინისტრის მიწვევის გაუქმებასთან ერთად, ადმინისტრაციამ ასევე უარი თქვა საქართველოს დელეგაციასთან ყველა შეხვედრაზე. პრემიერმინისტრ კობახიძესთან შეხვედრაზე ასევე უარი თქვა ჯეიკ სალივანმა, თეთრი სახლის ეროვნული უსაფრთხოების მრჩეველმა.
20 სექტემბერს “ამერიკის ხმამ” თეთრი სახლის მაღალ თანამდებობის პირებზე დაყრდნობით გაავრცელა ინფორმაცია იმის შესახებ, რომ ამერიკის შეერთებულ შტატებს “ქართული ოცნების“ საპატიო თავმჯდომარის, ბიძინა ივანიშვილის წინააღმდეგ სანქციები შემუშავებული აქვს და მის უახლოეს მომავალში დაწესებას განიხილავს.
აშშ-ის მთავრობის მაღალი თანამდებობის პირის თქმით, სანქციების ბაზისია 14024-ე განკარგულება. მისივე განმარტებით, განკარგულებას “აქვს ფართო უფლებამოსილებები მასში მოხვდნენ პირები, რომლებიც ახორციელებენ ქმედებებს, რომლებიც ძირს უთხრიან დემოკრატიულ ინსტიტუტებსა და ღირებულებებს, ჩართულნი არიან საერთაშორისო კორუფციაში. არსებობს აქტივობების მთელი რიგი, რომელიც სანქციებს ექვემდებარება იმ შემთხვევაში, თუ ის რუსეთის ფედერაციისთვის სასარგებლოა”.
დრო, თუ როდის ამოქმედდება სანქციები, ამას შეერთებული შტატების ადმინისტრაციის მაღალი თანამდებობის პირები არ ასახელებენ. ისინი არც იმას აზუსტებენ, ეს მომავალ 26 ოქტომბრის არჩევნებამდე მოხდება, თუ მის მერე.
