ქართული ქარტია, ეკონომიკა, განათლება და რეგიონების გაძლიერება - "კოალიციამ ცვლილებებისთვის" საარჩევნო პროგრამის ძირითადი მიმართულებები წარადგინა
“კოალიციამ ცვლილებებისთვის” საარჩევნო პროგრამა წარადგინა
ქართული ქარტია, ეკონომიკის სწრაფი განვითარება, განათლება და რეგიონების გაძლიერება – ზურა ჯაფარიძემ “კოალიცია ცვლილებებისთვის” საარჩევნო პროგრამის ოთხი ძირითადი მიმართულება წარადგინა.
“ქართული ქარტია” – ასე ჰქვია პრეზიდენტ სალომე ზურაბიშვილის მიერ წარმოდგენილ სამოქმედო გეგმას, რომელიც მიზნად ისახავს პროევროპული ოპოზიციის ერთი სიმბოლური ქოლგის ქვეშ გაერთიანებას პრორუსული ხელისუფლების საპირწონედ 26 ოქტომბრის საპარლამენტო არჩევნებისთვის.
“ქართული ქარტიის” შესახებ სალომე ზურაბიშვილმა 26 მაისს, საქართველოს დამოუკიდებლობის დღეს განაცხადა.
“ქართულ ქარტიას” ორბელიანების სასახლეში ხელი მოაწერეს პარტიებმა: ახალი, გირჩი-მეტი თავისუფლება, ევროპული საქართველო, ლელო, რესპუბლიკური პარტია, სტრატეგია აღმაშენებელი და ერთიანი ნაციონალური მოძრაობა. ქარტიას არ შეუერთდებიან გირჩი და გიორგი გახარიას პარტია საქართველოსთვის.
“კოალიცია ცვლილებებისთვის” წინასაარჩევნო პროგრამა
“საარჩევნო პროგრამა არის ყველაფერზე. კამპანიის დროს აქცენტი იქნება ოთხ ძირითად მიმართულებაზე. პირველი, ეს არის “ქართული ქარტია”, რომელზეც ხელი მოვაწერეთ. ჩვენ ვცდილობთ, რომ რაღაც დაპირებას რომ გავცემთ და რაღაცაზე ხელს მოვაწერთ, ისევე, როგორც ვთქვით, რომ 8 ივლისამდე რაღაც ტიპის კონფიგურაციამდე შევჯერდებოდით და ვასრულებთ, მარტო ჩვენ გავაკეთეთ ეს და სხვა არავის გაუკეთებია.
ქარტიაში გაწერილი ის რეფორმები, რომლებიც გამომდინარეობს ევროკომისიის 9 რეკომენდაციიდან, რომ საქართველომ გახსნას მოლაპარაკებები ევროკავშირთან.
მეორე მიმართულება გვექნება ეკონომიკის სწრაფ განვითარებაზე აქცენტი. უნდა მოხდეს ეკონომიკის გაორმაგება, რაც შემდგომ საფუძველი იქნება სხვა ცვლილებებისთვის ბიუჯეტთან მიმართებით.
შემდეგი ნაწილი არის განათლების თემა – ჩვენ გვინდა მოვაწყოთ თანამედროვე განათლების სისტემა, სადაც რამდენიმე აქცენტი არის, ჩემთვის მნიშვნელოვანი რაც იყო, აქცენტი კეთდება კერძო საგანმანათლებლო დაწესებულებების მაქსიმალურ დერეგულაციაზე. საჯარო რაც დარჩება, იქ თავისუფალი ბაზრის ელემენტების შემოტანაზე, რათა განათლების ხარისხი მუდმივად უმჯობესდებოდეს და ამას არ სჭირდებოდეს ჩარევა.
ბოლო არის რეგიონების განვითარება, რაც გულისხმობს იმას, რომ ცენტრი არ იყოს ყველაფრის განმკარგავი და მმართველი, ადგილზე გაჩნდნენ მესაკუთრეები და ადამიანებს გაუჩნდეთ სტიმული, რომ ბაზარმა იმუშაოს, რეალურად ჩამოყალიბდეს თვითმმართველობა ადგილზე, რომელიც საკუთარ თავს მიხედავს.” – განაცხადა ზურაბ ჯაფარიძემ.
9 ივლისს ცნობილი გახდა, რომ სამი ოპოზიციური პარტია “ახალი“, “დროა“ და “გირჩი – მეტი თავისუფლება“ 2024 წლის საპარლამენტო არჩევნებში ერთიანი სიით მიიღებს მონაწილეობას. ეს სამი პარტია საარჩევნოდ ერთიან კამპანიას დაიწყებს.
ასევე, წინასაარჩევნოდ საქართველოში კიდევ ერთი პოლიტიკური ცენტრი შეიქმნა – პარტია “ლელო საქართველოსთვის”, ანა დოლიძის პარტია “ხალხისთვის” და ლევან ცუცქირიძის პოლიტიკური მოძრაობა “თავისუფლების მოედანი” გაერთიანდნენ. 24 ივლისს კი მათ ალეკო ელისაშვილის “მოქალაქეები” შეუერთდა.
მანამდე “ერთიანმა ნაციონალურმა მოძრაობამ“ და “სტრატეგია აღმაშენებელმა“ წარადგინეს ახალი პოლიტიკური პლატფორმა “ერთიანობა საქართველოს გადარჩენისთვის”. ეს ორი პარტია არჩევნებში ამ პლატფორმით გავა. პლატფორმის საარჩევნო ნომერი იქნება იგივე, რაც ჰქონდა პარტია “ერთიან ნაციონალურ მოძრაობას”, ნომერი – 5.
