კირბალში მომხდარის შემდეგ, ოპოზიცია მოუწოდებს მთავრობას, აამოქმედოს ოთხოზორია-ტატუნაშვილის სია

კირბალში მომხდარი მკვლელობა

საპარლამენტო ფრაქცია „ერთიანი ნაციონალური მოძრაობის“ თავმჯდომარე თინა ბოკუჩავა აცხადებს, რომ მათ შეადგინეს რეზოლუცია, “რომელსაც მთელი ოპოზიციური სპექტრი უჭერს მხარს” და რომელშიც მოუწოდებენ მთავრობას, “დაუყოვნებლივ შეიყვანოს” ოთხოზორია-ტატუნაშვილის სიაში სოფელ კირბალის დამნაშავეების სახელები.

ოპოზიციის განმარტებით, ეს სწორედ იმისთვის უნდა მოხდეს, რომ საქართველოს უმაღლეს საკანონმდებლო ორგანოს ჯეროვანი რეაგირება ჰქონდეს რუსეთის საოკუპაციო ძალების მხრიდან კირბალში მომხდარ დანაშაულზე, როდესაც რუსმა ოკუპანტებმა საქართველოს მოქალაქე, თამაზ გინტური მოკლეს.

ოპოზიცია მთავრობას მოუწოდებს, რომ „ოკუპაციის საერთო ეროვნული ხედვა მიიღოს იმისთვის”, რომ საქართველომ დეოკუპაციის და მშვიდობის პოლიტიკა გაატაროს.

“ჩვენ მოვუწოდებთ მთავრობას, დაუყოვნებლივ შეიყვანოს ოთხოზორია-ტატუნაშვილის სიაში ამ დამნაშავეების სახელები და აამოქმედოს ოთხოზორია-ტატუნაშვილის სია, რომელიც ამ პარლამენტმა 2018 წელს მიიღო, მაგრამ სამწუხაროდ, დღევანდელი ხელისუფლება არ იყენებს არც საერთაშორისო ასპარეზზე იმისთვის, რომ დამნაშავეები დაისაჯონ. ჩვენ ასევე, მოვუწოდებთ მთავრობას, რომ ოკუპაციის საერთო ეროვნული ხედვა მიიღოს იმისთვის, რომ საქართველომ დეოკუპაციის და მშვიდობის პოლიტიკა გაატაროს.“– განაცხადა თინა ბოკუჩავამ.

● თამაზ გინტურის მკვლელობა: რა მოხდა კირბალში და რა ვერსია აქვს ცხინვალს
● “წინა ხელისუფლების მოღალატეობრივი პოლიტიკის მემკვიდრეობა” – როგორ ეხმაურება მმართველი პარტია და პრეზიდენტი კირბალში მომხდარს
● საქართველოში ანტისაოკუპაციო პოლიტიკური საბჭო დაფუძნდა

რა მოხდა სოფელ კირბალში

6 ნოემბერს სოფელ კირბალთან ოკუპანტებმა საქართველოს ერთი მოქალაქე მოკლეს, მეორე კი გაიტაცეს. ოკუპანტების მიერ მოკლული საქართველოს მოქალაქე თამაზ გინტურია, გატაცებული კი ლევან დოთიაშვილი იყო, რომელიც ამ დროისთვის თავისუფალია. 

ლევან დოთიაშვილი, რომელიც ოკუპანტებმა გუშინ გაათავისუფლეს, 6 ნოემბერს, თამაზ გინტურის მკვლელობის დეტალებსა და საოკუპაციო ძალების მიერ მის უკანონო დაკავებას იხსენებს.

დოთიაშვილი ჰყვება, რომ თავდაპირველად რუსმა ჯარისკაცმა გამაფრთხილებელი ტყვია გაისროლა, რის შემდეგაც, ლომისის ეკლესიასთან მყოფი თამაზ გინტური და ლევან დოთიაშვილი მას გაესაუბრნენ, შემდეგ ტერიტორია დატოვეს და მანქანაში ჩასხდომიდან რამდენიმე წუთში, დაახლოებით 3 მეტრის გავლის შემდეგ რუსმა ჯარისკაცმა გამიზნული სროლა დაიწყო:

“ეკლესიის ეზოში რომ ავედით, კადრიც კი ნახეთ, რომ კარი გავხსენით, რომ გამოვდიოდით მოვიდა მხოლოდ ერთი რუსი ჯარისკაცი, გამაფრთხილებელი გასროლა გაისროლა პირველივე და მე დავუძახე, რომ არ გინდა სროლა, მოვრიგდეთ. ჩვეულებრივ დაწყნარდა ეს რუსი ჯარისკაცი, ვილაპარაკეთ, კამერა მაქვს ჩართულიო, ამოიღო და ამ დროს, თამაზმაც დაუწყო ლაპარაკი. ჩვეულებრივ, არანაირი აღელვება, არანაირი კონფლიქტი, არაფერი, დაწყნარებულად საუბარი.”

დოთიაშვილის თქმით, თავად ნახა დაჭრილი თამაზ გინტური. ის იხსენებს, რომ მანქანიდან თამაზ გინტურის გადმოყვანის შემდეგ, ადგილზე კიდევ 7 რუსი ჯარისკაცი გამოჩნდა, რომლებიდანაც ერთ-ერთმა მას დაარტყა, მიწაზე დააწვინა და ბორკილები დაადო.

“მე დამარტყა ერთ-ერთმა დაუნდობლად, მიწაზე დამაწვინა. ამ პროცესში მე უკვე ბორკილები დამადეს, წამიყვანეს ტყის მიმართულებით და მე თამაზი აღარ მინახავს. გზაში იყო შეურაცხყოფაც, დარტყმაც”, – აცხადებს დოთიაშვილი და აღნიშნავს, რომ რუსი ჯარისკაცების ამოცნობა უჭირს.

საქართველოს ხელისუფლება მოუწოდებს საერთაშორისო საზოგადოებას, დაგმოს რუსეთის საოკუპაციო ძალების მიერ საქართველოს მოქალაქის მკვლელობა.

პრეზიდენტმა სალომე ზურაბიშვილმა მომხდარს „ქართულ სახელმწიფოებრიობაზე უხეში თავდასხმა” უწოდა.

პრემიერმინისტრმა ირაკლი ღარიბაშვილმა საერთაშორისო თანამეგობრობასთან ერთად საოკუპაციო ძალების წარმომადგენლებსაც მიმართა და თანამშრომლობისკენ მოუწოდა. მისი თქმით, სოფელ კირბალში რუსეთის საოკუპაციო ძალების მიერ ცეცხლსასროლი იარაღით სროლის შედეგად საქართველოს მოქალაქის მკვლელობის ფაქტი კიდევ ერთხელ ადასტურებს “ადგილზე არსებულ რთულ უსაფრთხოების გარემოს და მეტყველებს ოკუპაციის მძიმე შედეგებზე”.

გორის მუნიციპალიტეტის სოფელი კირბალი სამხრეთ ოსეთის კონფლიქტის ზონაში, გორიდან 30 კილომეტრში მდებარეობს. კირბალი ე.წ. ბორდერიზაციის ზონის სოფელია. 2022 წელს რუსებმა აქ ახალი საგუშაგო ააშენეს. ოკუპანტების ქმედებების პროტესტის ნიშნად მაშინ ადგილობრივებმა რუსების მიერ დამონტაჟებული საზღვრის აღმნიშვნელი ბანერი მოიპარეს და ჯართში ჩააბარეს.

სოფელი კირბალი საინფორმაციო საშუალებებში ოქტომბრის ბოლოსაც მოხვდა. 25 ოქტომბერს გავრცელდა ინფორმაცია, რომ ლომისას მამათა მონასტრის ტერიტორიაზე რუსი ოკუპანტები გადაადგილდებოდნენ და მონასტრის კარი აჭედეს.

ამ ინფორმაციას გამოეხმაურა საპატრიარქოს საზოგადოებასთან ურთიერთობის სამსახურის ხელმძღვანელი, ანდრია ჯაღმაიძე, რომელმაც თქვა, რომ რუსი ოკუპანტების მიერ კირბალში, ლომისის წმინდა გიორგის ტაძრის კარის აჭედვა იმიტომ მოხდა, რომ “იქ ვიღაცამ საქართველოს დროშა ააფრიალა.”

ოთხოზორია-ტატუნაშვილის სია

საქართველოს პარლამენტმა “მაგნიტსკის სიის” მსგავსი “ოთხოზორია-ტატუნაშვილის სია” 2018 წლის ივნისში დაამტკიცა. 

სიის მთავარი მიზანია ოკუპირებულ ტერიტორიებზე საქართველოს მოქალაქეების უსაფრთხოების დაცვა. 

ცხინვალსა და ზუგდიდის რაიონის სოფელ ხურჩასთან მოკლული საქართველოს მოქალაქეების – არჩილ ტატუნაშვილის და გიგა ოთხოზორიას სახელი ამ სიას სიმბოლურად ჰქვია. სიაში მხოლოდ ტატუნაშვილის და ოთხოზორიას მკვლელობაში ბრალდებულები არ არიან. პარლამენტის მიერ მიღებული რეზოლუციის თანახმად, სიაში შედიან ოკუპირებულ ტერიტორიებზე საქართველოს მოქალაქეთა მკვლელობაში, გატაცებაში, წამებასა და არაჰუმანურ მოპყრობაში, ჯანმრთელობის მძიმე დაზიანებასა და დანაშაულის დაფარვაში ბრალდებული და მსჯავრდებული პირები.

არჩილ ტატუნაშვილი 23 თებერვალს ცხინვალში, სახელმწიფო უშიშროების კომიტეტის შენობაში საეჭვო ვითარებაში გარდაიცვალა; ხოლო გიგა ოთხოზორია, საქართველოსა და აფხაზეთის ადმინისტრაციულ საზღვართან აფხაზმა მესაზღვრემ მოკლა.

რას ითვალისწინებს “ოთხოზორია-ტატუნაშვილის” სია:

1. “ოთხოზორია-ტატუნაშვილის სიაში” მყოფ პირებს დაუყადაღდებათ ის ქონება, რომელზეც საქართველოს მთავრობას ხელი მიუწვდება;

2. მათ შეეზღუდებათ ქონების გადაადგილება თუ შეძენა, ასევე ფინანსური ტრანზაქციების განხორციელება საქართველოს პარტნიორ სახელმწიფოებში;

3. ისინი ვერ მიიღებენ ვიზებს საქართველოს პარტნიორ ქვეყნებში სამოგზაუროდ;

4. ისინი ვერ ისარგებლებენ იმ შეღავათებით, რომლებიც საქართველოს მთავრობას ოკუპირებულ ტერიტორიებზე მცხოვრები ადამიანებისთვის აქვს დაწესებული – მაგალითად, ვერ იმკურნალებენ საქართველოში (2010 წლიდან მოქმედებს ე.წ. ჯანდაცვის პროექტი, რომელიც გულისხმობს აფხაზეთიდან და ოსეთიდან პაციენტების უფასოდ მკურნალობას საქართველოს საავადმყოფოებში). 

ოპოზიცია აცხადებს, რომ  ხელისუფლებამ  „ოთხოზორია-ტატუნაშვილის სია“ თავის დროზე მხოლოდ საზოგადოებრივი ზეწოლის გამო მიიღო და მის გასაფართოებლად არაფერს აკეთებს. 

2018 წელს 33 ადამიანი მოხვდა საქართველოს მთავრობის მიერ შედგენილ “ოთხოზორია-ტატუნაშვილის სიაში.” ეს ის 33 პირია, რომლებმაც 1991 წლიდან დღემდე ოკუპირებულ ტერიტორიებზე საქართველოს მოქალაქეების მიმართ სხვადასხვა დანაშაული ჩაიდინეს.

● ტატუნაშვილის საქმე: ქართულმა სასამართლომ ცხინვალელ სამართალდამცავებს უვადო პატიმრობა შეუფარდა
● „ოთხოზორია-ტატუნაშვილის სიის“ საპასუხოდ სამხრეთ ოსეთი „სანაკოევის სიას“ მიიღებს