კიდევ ერთი პოლიტიკური ცენტრი: ლელო, ანა დოლიძის პარტია და ცუცქირიძის პოლიტიკური მოძრაობა გაერთიანდნენ
კიდევ ერთი პოლიტიკური ცენტრი
წინასაარჩევნოდ საქართველოში კიდევ ერთი პოლიტიკური ცენტრი იქმნება – პარტია “ლელო საქართველოსთვის”, ანა დოლიძის პარტია “ხალხისთვის” და ლევან ცუცქირიძის პოლიტიკური მოძრაობა “თავისუფლების მოედანი” გაერთიანდნენ.
“მრავალპარტიული დემოკრატიის ცენტრის” (EECMD) ხელმძღვანელმა, ლევან ცუცქირიძემ თანამოაზრეებთან ერთად ახალი პოლიტიკური მოძრაობა “თავისუფლების მოედანი” პირველ ივლისს დააფუძნა.
“ჩვენ მოვდივართ პოლიტიკაში არა პოლიტიკური სივრცის დანაწევრებისთვის, არამედ მისი გაერთიანებისთვის, დღევანდელი ჩვენი შეკრება მხოლოდ დასაწყისია.” – განაცხადა ცუცქირიძემ მოძრაობის პრეზენტაციაზე.
“ახლა და აქ, ევროპის მოედანზე იწყება ნამდვილი ერთობა, ნამდვილი ერთობა ევროპისთვის. ახლა და აქ, იწყება ახალი ძალის ნამდვილი, ღირსეული, პროფესიონალი, გამოცდილი პოლიტიკოსების ერთობის დაანონსება და ბრძოლის წამოწყება, რა პროცესშიც ჩვენ გვაქვს თქვენი იმედი.” – აცხადებს “ლელოს” ერთ-ერთი ლიდერი ირაკლი კუპრაძე.
“თავისუფლების მოედნის” წევრის, ნინი შენგელიას თქმით, პოზიტიური ცვლილებების დროა:
“ვცხოვრობთ ეპოქაში, როცა ჩვენმა ხელისუფლებამ საგარეო კურსი შეცვალა ნეგატიურისკენ, ამას ვერ შევეგუებით, ვერ გავუშვებთ ხელიდან იმ ისტორიულ შესაძლებლობას, რომელიც ჩვენ დღეს გაგვაჩნია, ეს არის დიდი ევროპის ოჯახში ჩვენი ადგილის დამკვიდრება… მე ვარ ადამიანი, რომელიც აქამდე პოლიტიკაში არ ყოფილა, ისევე როგორც ჩემი თანამებრძოლები, ამ ბრძოლაში გავიცანი ბევრი ადამიანი, ჩვენ ვერთიანდებით ერთი იდეის ირგვლივ, ეს იდეა არის თავისუფალი და დემოკრატიული საქართველო, ძლიერი საქართველო, ისეთი, როგორიც ჩვენ წარმოგვედგინა.”
პარტია “ხალხისთვის” ლიდერის, ანა დოლიძის თქმით, “სამი თვის წინ”, რიყეზე შეკრებილმა სამასი ათასმა ადამიანმა და მათმა ოჯახებმა “პოლიტიკოსებს მოგვცეს” ერთი დავალება – შეცვალეთ ხელისუფლება იმისთვის, რომ მოხდეს “საქართველოს საბოლოო დეოკუპაცია” და განხორციელდეს ქართველი ხალხის გეოპოლიტიკური არჩევანი.
პრეზენტაციაზე სიტყვით გამოვიდა “ლელოს” თავმჯდომარე მამუკა ხაზარაძე. მან განაცხადა, რომ ასეთი კრიტიკული ზღვარი დამოუკიდებლობის მიღებიდან “ჩვენს ქვეყანას არც ერთ არჩევნებზე” არ ჰქონია
“ყოველგვარი გადამეტების გარეშე, ეს არჩევნები არის წყალგამყოფი ან ვიქნებით ჭაობში და ვიქნებით ოკუპანტის უღლის ქვეშ ან ვიქნებით თავისუფალ სამყაროში ღირსეულად და იქ, სადაც ჩვენი ქართველობა, ჩვენი მოქალაქეობა, ჩვენი დროშა და გერბი იქნება ძალიან მაღლა აწეული.
ამისთვის, სწორედ ამისთვის არის ერთი რამ საჭირო, და ამ ერთ რაღაცას, ყველა სხვა რაღაცასთან ერთად, ჰქვია ერთობა. ბრძოლა არის დიდი და ძლიერ საქართველოს გაერთიანების გარეშე ვერ დავაყენებთ ფეხზე, ამიტომ, მივიღეთ გადაწყვეტილება, ამ არაჩვეულებრივ ადამიანებთან, ამ არაჩვეულებრივ მებრძოლ ქალთან, ანა დოლიძესთან, რომელიც მთელი ცხოვრება, რაც თავი მახსოვს, იბრძვის უსამართლობის წინააღმდეგ, იბრძვის იმისთვის, რომ ქვეყანა იყოს ნათელი, გამჭვირვალე, რომ გვქონდეს გამჭვირვალე და მოწესრიგებული სასამართლო სისტემა, რომ ბავშვები არ შიმშილობდნენ და უამრავი რამ, რისთვისაც ანას თავისი მთელი ენერგია და ცოდნა აქვს ჩადებული.
მე ვარ ბედნიერი, რომ ლევანმა [ცუცქირიძემ] და მისმა მეგობრებმა მიიღეს ყველაზე სერიოზული გადაწყვეტილება და შემოვიდნენ პოლიტიკაში და დღეს მივესალმები თითოეულ მათგანს.” – თქვა ხაზარაძემ.
9 ივლისს ცნობილი გახდა, რომ სამი ოპოზიციური პარტია “ახალი“, “დროა“ და “გირჩი – მეტი თავისუფლება“ 2024 წლის საპარლამენტო არჩევნებში ერთიანი სიით მიიღებს მონაწილეობას. ეს სამი პარტია საარჩევნოდ ერთიან კამპანიას დაიწყებს.
“დროას“ ლიდერი ელენე ხოშტარია ამბობს, რომ ოპოზიციური პოლიტიკური სპექტრი ვალდებულია საზოგადოებას, რომელმაც იბრძოლა და წარმატებას მიაღწია, შესთავაზონ არჩევანი, ხოლო “გირჩი-მეტი თავისუფლების“ ლიდერის, ზურაბ ჯაფარიძის თქმით, არსებობს უნიკალური შანსი, ხუთ წელიწადში საქართველო ევროკავშირის სრულფასოვანი წევრი გახდეს.
მანამდე “ერთიანმა ნაციონალურმა მოძრაობამ“ და “სტრატეგია აღმაშენებელმა“ წარადგინეს ახალი პოლიტიკური პლატფორმა “ერთიანობა საქართველოს გადარჩენისთვის”. ეს ორი პარტია არჩევნებში ამ პლატფორმით გავა. პლატფორმის საარჩევნო ნომერი იქნება იგივე, რაც ჰქონდა პარტია “ერთიან ნაციონალურ მოძრაობას”, ნომერი – 5.
ყრილობის პრეზენტაციაზე თინა ბოკუჩავამ თქვა, რომ 26 ოქტომბერი რეფერენდუმის ტოლფასია, ამიტომ, ახლა დანაწევრების, დაპირისპირების, ამბიციების ან ეგოების ჭიდილის დრო არ არის.
პარტიის ახალმა სახეებმა, ვინც ამ დრომდე არ ყოფილა არცერთი პოლიტიკური პარტიის წევრი [გია ჯაფარიძე, ლაშა ბაქრაძე], სიტყვით გამოსვლისას აღნიშნეს, რომ ისინი შეუერთდნენ ერთიანობას და არა რომელიმე პარტიას.
ოქტომბრის საპარლამენტო არჩევნებამდე ოთხ თვეზე ცოტა ნაკლებია დარჩენილი. მარტის აქციებისა და საფეხბურთო ციებ-ცხელების შემდეგ, ქვეყანა ნელ-ნელა არჩევნების თემას უბრუნდება.
26 ოქტომბრის საპარლამენტო არჩევნებში აკრძალულია საარჩევნო ბლოკის შექმნა. ამიტომ, პარტიებმა სხვა გადაწყვეტილებები უნდა მოძებნონ. ისინი უნდა შეთანხმდნენ რა კონფიგურაციით გავლენ ოქტომბრის არჩევნებში, რამდენი პოლიტიკური ცენტრი იქნება, ვინ ვისთან გაერთიანდება, ან, არ გაერთიანდება.
საპარლამენტო არჩევნები საქართველოში 2024 წლის 26 ოქტომბერს უნდა გაიმართოს. წინასაარჩევნო კამპანია”, “ქართულმა ოცნებამ” უკვე დაიწყო. პარტიის მიზანია, მეოთხე ვადით დარჩეს ხელისუფლებაში.
ოპოზიცია და სამოქალაქო სექტორი მიიჩნევს, რომ ეს არჩევნები რეფერენდუმის ტოლფასია. რადგან, ამ არჩევნებმა უნდა გადაწყვიტოს, საით წავა საქართველო, საბოლოოდ ჩამოშორდება ცივილიზებულ დასავლეთს თუ გამოიყენებს იმ ისტორიულ შესაძლებლობებს, რაც ახლა ამ გზაზე არსებობს.
