გზა სულ არის შეიცვალო პროფესია - ხუთი IT მიმართულება, რომელიც პოპულარული იქნება კოვიდ ეპოქაში
ყველა თანხმდება, რომ კორონავირუსის პანდემია ბევრ რამეს შეცვლის სამყაროში, მათ შორის, პირველ რიგში, შრომის ბაზარს. პროფესიები, რომლებიც ერთ დროს პოპულარული იყო, დაკარგავს აქტუალობას, მათ ნაცვლად კი სულ სხვა ცოდნა, უნარი და პროფესიული ჩვევა გახდება მოთხოვნადი.
ისეთი სფეროები, როგორიცაა ავიაცია, ტურიზმი, შოუ-ბიზნესი, HoReCa (hotel/restaurant/café) კრიზისში არიან და უდიდეს ზარალს განიცდიან. პანდემიის დასრულების შემდეგ კი ბევრი ადამიანი დაფიქრდება საკუთარ პროფესიაზე. როგორც მინიმუმ, თუ სულ არ შეიცვლის მას, ეცდება, რომ თავი დაიზღვიოს და კიდევ რაიმე ახალი ისწავლოს.
თუ თქვენც მათ რიცხვში ხართ, ვინც აპირებთ ახალ რეალობას ფეხი აუბათ, და გჯერათ, რომ პანდემიის თუ სხვა გამოწვევების მიუხედავად, გზა სულ არის მიაღწიო წარმატებას – ჩვენ დაგეხმარებით ახალი პროფესიის შერჩევაში.
გაგაცნობთ IT პროფესიებს, რომლებზე მოთხოვნაც პანდემიურ და პოსტ-პანდემიურ მსოფლიოში გაიზრდება.
IT- მენეჯერი/ტექნიკური დირექტორი CTO (Chief Technical Officer)
ეს ერთ-ერთი ყველაზე მნიშვნელოვანი თანამდებობა გახდა კოვიდ ეპოქაში.
ეს არის ადამიანი, რომელმაც უნდა შეისწავლოს კომპანიის ბიზნეს-გეგმები და მათი გათვალისწინებით შეიმუშაოს IT სტრატეგია.
IT- მენეჯერმა კარგად უნდა იცოდეს, რა ხდება ტექნოლოგიური სიახლეების ბაზარზე და შეარჩიოს და დანერგოს ის, რაც კომპანიისთვის იქნება გამოსადეგი.
შესაბამისად, მისი პასუხისმგებლობაა ასევე IT თანამშრომლების შერჩევა, გუნდის ჩამოყალიბება და მისი მართვა. დღეს და მომავალში ეს პოზიცია ფასდაუდებელია, რადგან თანამედროვე კომპანია IT ტექნოლოგიების გარეშე წარმოუდგენელია.
კიბერუსაფრთხოების სპეციალისტი
ეპოქაში, როდესაც ყველაფერი ინფორმაციაზე დგას, კიბერუსაფრთხოება ნებისმიერი კომპანიისთვის ნომერ პირველი ამოცანაა.
დღეს, კომპანიისთვის კიბერუსაფრთხოების სპეციალისტის გარეშე მუშაობა იგივეა, რაც ოფისის კარების ღიად დატოვება.
კიბერუსაფრთხოების ექსპერტი არის ადამიანი, რომელიც იცავს კომპანიის კომპიუტერებს, თანამშრომლების პირად ანგარიშებსა და მონაცემებს კიბერ თავდამსხმელებისგან.
დეველოპერი/აპლიკაციების შემქმნელი
ის, რომ კომპანიების და ბიზნესების დიდი ნაწილი ციფრულ სამყაროში გადაინაცვლებს, ეს ცხადია. ამიტომ, ადამიანები, რომლებიც ამ კომპანიებისთვის პროგრამულ უზრუნველყოფას შეიმუშავებენ, ხდებიან პოსტ-კოვიდ ეპოქის მთავარი პერსონაჟები. ეს არის უნივერსალური პოზიცია, რომელიც შეიძლება მოიცავდეს პროგრამულ უზრუნველყოფას, ასევე მობილური აპლიკაციების შექმნას iOS და/ან Android-ისთვის.
ნებისმიერ კომპანიას, რომელსაც სურს, რომ კონკურენტუნარიანი იყოს, აუცილებლად დასჭირდება კარგი პროგრამისტის დახმარება იმისთვის, რომ სერვისები გააუმჯობესოს და მეტი კლიენტი მიიზიდოს.
ციფრული ტრანსფორმაციის ექსპერტი/კონსულტანტი
კარანტინში გამოკეტილი ყველაზე კონსერვატიული ბიზნესმენები და კომპანიის მფლობელებიც კი, აუცილებლად დაფიქრდებიან იმაზე, თუ რა უნდა შეცვალონ პოსტ-კოვიდ ეპოქაში. ბიზნესის დიგიტალიზაციის აუცილებლობაზე უკვე, ლამის, თონეების მეპატრონეებიც დაფიქრდნენ. მეწარმეები იმტვრევენ თავს – რა ფუნქციები ან რა პოზიციები უნდა დარჩეს სამუდამოდ ვირტუალურ სამყაროში და რა უნდა დაბრუნდეს რეალურში. ამაზე ფიქრი უკვე ნიშნავს იმას, რომ მეწარმეები პირველ ნაბიჯებს გადადგამენ კომპანიის ციფრული ტრანსფორმაციისკენ. შესაბამისად, იმისთვის, რომ ეს ტრანსფორმაცია ეფექტიანი გამოდგეს, მათ ექსპერტები და კონსულტანტები დასჭირდებათ, რომლებიც კომპანიის „გაციფრულების“ გეგმას შეიმუშავებენ და დაეხმარებიან კომპანიას ახალ, ციფრულ რეალობასთან ადაპტირებაში.
VR/AR-ტრანსლაციების ორგანიზატორი
კარანტინმა მნიშვნელოვნად გაზარდა ინტერესი ვიდეოსერვისების მიმართ: Zoom-მა პანდემიის პირობებში რეალურად გადაარჩინა კომუნიკაციები ბევრი კომპანიის საქმიანობაში.
არა მარტო ორგანიზაციები და კომპანიები, არამედ შოუ-ბიზნესის ინდუსტრიაც გამოიტანს გარკვეულ დასკვნებს 2020 წლიდან – კონცერტების, სპექტაკლების, წარმოდგენების ყურება, როგორც ჩანს, მომავალშიც შეგვეძლება სახლიდან გაუსვლელად.
ამასთან, როგორც სპეციალისტები ამბობენ, შოუ-ბიზნესი დიდხანს არ შეყოვნდება YouTube-ტრანსლაციების ფორმატში.
უახლოეს მომავალში, იგი სამგანზომილებიანი გამოსახულების აუცილებლობის წინაშე დადგება. თეატრებს, საკონცერტო დარბაზებს დასჭირდებათ სპეციალისტები, რომლებსაც შეეძლებათ კონტენტის ციფრულ ფორმატში გადატანა.
