პენსიების და ხელფასების ზრდა, დავალიანების და ჯარიმების ჩამოწერა - ხელისუფლებამ წინასაარჩევნო კამპანია დაიწყო - ISFED
ხელისუფლების წინასაარჩევნო კამპანია
მართალია, ოფიციალურად წინასაარჩევნო კამპანია საქართველოში არჩევნებამდე 60 დღით ადრე იწყება, თუმცა არაოფიციალურად „ქართულმა ოცნებამ“ იგი უკვე დაიწყო, – წერია არასამთავრობო ორგანიზაცია „სამართლიანი არჩევნების“ (ISFED) მიერ გამოქვეყნებული ანგარიშში.
ამასთან უკვე გამოიკვეთა სახელმწიფო რესურსების მობილიზების და ადამინისტრაციული რესურსის საარჩევნო მიზნით გამოყენების ნიშნები, აღნიშნავს ორგანიზაცია.
საპარლამენტო არჩევნები საქართველოში 2024 წლის 26 ოქტომბერს გაიმართება. “ქართული ოცნება”, რომელიც უკვე 12 წელია მართავს ქვეყანას, შეეცდება მეოთხე ვადით დარჩეს ხელისუფლებაში.
წინასაარჩევნო სოციალური პროექტები
ISFED-ის ანგარიშში ვკითხულობთ, რომ ტრადიციულად, ხელისუფლებამ წინასაარჩევნოდ მასშტაბური სოციალური პროექტები წამოიწყო. გამოიკვეთა სახელმწიფო ინიციატივები, რომლებიც ადმინისტრაციული რესურსის საარჩევნო მიზნით გამოყენების ნიშნებს შეიცავს.
აქ ჩამოვთვლით კონკრეტული სოციალური პროექტებს, რომლებიც ხელისუფლებამ 2024 წელს დაანონსა და წამოიწყო:
● 2024 წლის თებერვალში მთავრობა გამოვიდა ძალოვნების პენსიის მომატების ინიციატივით. 1 მაისიდან ყოფილი ძალოვანების პენსია ათას ლარამდე გაიზარდა.
● სახელმწიფომ ამჯერადაც მიმართა წინასაარჩევნოდ ჯარიმების ჩამოწერის პრაქტიკას – კოვიდპანდემიის დროს დაწესებული რეგულაციების დარღვევისთვის დაჯარიმებული მოქალაქეები ადმინისტრაციული სახდელისგან გათავისუფლდებიან.
● 2024 წლის აპრილში პრემიერ-მინისტრმა საგადასახადო დავალიანებების ჩამოწერის შესახებ განაცხადა. საქართველოს მთავრობის გადაწყვეტილებით, ყველა ფიზიკურ პირს, მათ შორის, ინდივიდუალურ მეწარმეებს სრულად ჩამოეწერებათ 2021 წლის პირველ იანვრამდე წარმოშობილი და გადაუხდელი აღიარებული საგადასახადო დავალიანება, მათზე დარიცხული საურავების ჩათვლით. როგორც ირაკლი კობახიძემ აღნიშნა, კანონპროექტის მიღების შემდეგ, 145 ათას ფიზიკურ პირს სრულად ჩამოეწერება ჯამში 590 მილიონი ლარის ოდენობის საგადასახადო დავალიანება.
● 2024 წლის თებერვალში ცნობილი გახდა, რომ პროცენტების შემცირება მოხდება იმ პენსიონერებისთვის, ვისაც სესხი აღებული აქვს 2023 წლამდე. ინიციატივა შეეხო 150 ათასზე მეტ პენსიონერს.
● 2024 წლის თებერვალში განათლების, მეცნიერებისა და ახალგაზრდობის მინისტრმა სტუდენტებისათვის ანაზღაურებადი სტაჟირების პროგრამა დააანონსა.
● წინასაარჩევნოდ ხელფასების ზრდა დაფიქსირდა ერთ-ერთ ყველაზე მნიშვნელოვან და მრავალრიცხოვან სექტორში – განათლების სექტორში.
ახალი სახელფასო ფორმულა, რომლის მიმართ ბევრი კითხვა არსებობს, 2024 წლის 1-ელი ივლისიდან ამოქმედდება და როგორც დაანონსებულია, პედაგოგთა ანაზღაურების “უპრეცედენტო” ზრდას გულისხმობს.
ISFED-ის ანგარიშში განხილულია ასევე 29 აპრილის აქცია, რომელიც სამთავრობო პოლიტიკისა და „უცხოური გავლენის გამჭვირვალობის შესახებ“ კანონის მხარდასაჭერად ხელისუფლებამ დააორგანიზა. როგორც ანგარიშში ვკითხულობთ, ამ აქციის მოსამზადებელ სამუშაოებში „ქართული ოცნება“ აქტიურად იყენებდა ადმინისტრაციულ რესურსს.
მთავარი ტენდენციები
ანგარიშის მნიშვნელოვანი ნაწილია იმ ძირითად ტენდენციებზე საუბარი, რომლებიც 26 ოქტომბრის საპარლამენტო არჩევნების წინა პერიოდის გარემოს შეფასებისას გამოიკვეთა და რომლებიც წინა არჩევნების დროს საქართველოში არ ყოფილა:
● ქვეყნის უახლეს ისტორიაში პირველად მმართველმა პარტიამ ეჭვქვეშ დააყენა საქართველოს კონსტიტუციით განმტკიცებული პროდასავლური საგარეო პოლიტიკური კურსისა და ევროინტეგრაციის უალტერნატივობა, რითაც საზოგადოებაში არსებული პროევროპული კონსენსუსის გადასინჯვა სცადა;
● ევროკავშირთან დაახლოების პარალელურად, ქვეყანაში მომძლავრდა ანტიდასავლური, მათ შორის, ევროსკეპტიკური გზავნილები.
● ანგარიშში წერია, რომ “აგენტების კანონი”, რომელიც ხელისუფლებამ ქართული საზოგადოების, საქართველოს პრეზიდენტის, ევროკავშირის, აშშ-ის და სხვა საერთაშორისო მეგობრების პროტესტის და უმკაცრესი კრიტიკის მიუხედავად მიიღო, მნიშვნელოვნად გაართულებს იმ ადგილობრივი სადამკვირვებლო ორგანიზაციების მუშაობას, რომლებიც 2024 წლის 26 ოქტომბრის არჩევნების მონიტორინგს გეგმავენ. მეტიც, ზოგი ორგანიზაცია, შესაძლოა, მუშაობის შეწყვეტის საფრთხის წინაშეც დადგეს.
● ანგარიშის ავტორები მიიჩნევენ, რომ არჩევნებზე მნიშვნელოვან გავლენას მოახდენს ის ფაქტიც, რომ საქართველოს საკანონმდებლო და აღმასრულებელი ხელისუფლების წარმომადგენლები, ქვეყნის ისტორიაში პირველად, აშშ-ის ხელისუფლების მიერ დასანქცირდნენ.
● ანგარიშში ასევე ნათქვამია, რომ ხელისუფლების მიერ გადადგმულ ადამიანის უფლებათა შემლახავ და ევროინტეგრაციის პროცესის დამაზიანებელ ნაბიჯებს შორისაა ლგბტქი თემის საწინააღმდეგო საკონსტიტუციო ცვლილებებისა და საკანონმდებლო ცვლილებათა პაკეტის ინიციირებაც.
● საპარლამენტო არჩევნების წინა პერიოდში მედიაგარემო მკვეთრად გაუარესებულია. მკვეთრად პოლარიზებულია სოციალური მედიაც“, – ნათქვამია ანგარიშში.
