"მოვუწოდებთ, არჩევნებში არ შევიდნენ" - ოპოზიცია და ხელისუფლება ხაზარაძე-ჯაფარიძის გათავისუფლებას ეხმაურება
ხაზარაძე-ჯაფარიძის გათავისუფლება
პარტია “ლელო – ძლიერი საქართველოს” ლიდერების მამუკა ხაზარაძისა და ბადრი ჯაფარიძის შეწყალებას, ოპოზიციური პოლიტიკური პარტიები და ხელისუფლება აფასებენ. ოპოზიციის ნაწილი მიიჩნევს, რომ ეს არის “ქართული ოცნების” ლიდერების მცდელობა ლეგიტიმაცია მიანიჭონ 4 ოქტომბერს დანიშნულ თვითმმართველობის არჩევნებს და პარტიის ლიდერებს მოუწოდებენ, უარი თქვან წინასწარ გაცხადებულ პოზიციაზე და არ მიიღონ მონაწილეობა არჩევნებში.
ყაველაშვილის შეყწალების აქტი მედიასთან შეაფასეს “ქართული ოცნების” წარმომადგენლებმაც. პარტიის მერობის კანტიდატისა და მოქმედი მერის, კახა კალაძის თქმით, ეს “ჰუმანური აქტია.” ხოლო გურამ მაჭარაშვილი ამბობს, რომ შეწყალება იმიტომ მოხდა, მერე არ თქვან, “ციხეში ვიყავით და აბა, როგორ მოვიგებდით არჩევნებსო.”
“ქართული ოცნების“ პრეზიდენტის, მიხეილ ყაველაშვილის თქმით, “ლელო – ძლიერი საქართველოს” ლიდერების, მამუკა ხაზარაძისა და ბადრი ჯაფარიძის შეწყალების გადაწყვეტილება მიიღო. როგორც ყაველაშვილი განმარტავს, აღნიშნული გადაწყვეტილება იმიტომ მიიღო, რომ “არავის დარჩეს იმის თქმის საბაბიც კი”, რომ ადგილობრივი თვითმმართველობის არჩევნები შეზღუდული კონკურენტუნარიანობის პირობებში ტარდება.
კომენტარები
ელენე ხოშტარია, “კოალიცია ცვლილებებისთვის”: “არ აქვს მნიშვნელობა რა ჩაიფიქრა “ქართულმა ოცნებამ“, ყველაზე მნიშვნელოვანია, როგორ პასუხობს ამას ნამდვილი ოპოზიცია. მინდა მთელი გულით და პატივისცემით მივმართო მამუკას და ბადრის, მივმართო დღეს, ზუსტად გათავისუფლების დღეს, მიიღეთ არა კოალიციისთვის, არა ჩემთვის, არამედ ქვეყნისთვის ერთადერთი სწორი გადაწყვეტილება – გამოდით არასწორი, არარსებული რუსული სპეცოპერაციიდან, გამოდით და დაუბრუნდით საერთო, პრინციპულ, ართანამშრომლობის, არშეგუების, არდამორჩილების, წინააღმდეგობის ბრძოლას. ეს იქნება ამ ბრძოლის გაძლიერება. ეს იქნება ერთადერთი სწორი გადაწყვეტილება “ლელოსთვის“, მთლიანად ოპოზიციისთვის, ყველა აქტივისტისთვის და რაც მთავარია, ჩვენი ქვეყნისთვის. სულმოუთქმელად ველი ამ სწორ გადაწყვეტილებას “ლელოსგან.“
პეტრე ცისკარიშვილი, “ერთიანი ნაციონალური მოძრაობა”: “არჩევნები თურმე კონკურენტულ გარემოში უნდა ტარდებოდეს, ჯერ ერთი ეს არანაირი არჩევნები არ არის, დამაჯერებელი იქნებოდა მხოლოდ იმ შემთხვევაში, თუ შარშან ამ დროს საპარლამენტო არჩევნების წინა პერიოდში ისინი შეიწყალებდნენ მიხეილ სააკაშვილს რომელსაც ექნებოდა საშუალება სრულფასოვნად ჩართულიყო საპარლამენტო არჩევნების პროცესში. მაშინ ნამდვილად ვირწმუნებდი, რომ მათი პოლიტიკური ნება, მიდგომა და სურვილი არის ის, რომ საარჩევნო პროცესი, ნებისმიერ დონეზე ჩატარებული არჩევნები მიმდინარეობდეს კონკურენტულ გარემოში და არცერთი პოლიტიკური მოძრაობის ხელმძღვანელი თუ ლიდერი პირი არ იყოს ციხის საკანში გამოკეტილი.”
თამარ ჩერგოლეიშვილი, “ფედერალისტები”: “მიუხედავად იმ უდიდესი განსხვავებებისა, რაც ფედერალისტებს და ლელოს შორის არის, მიუხედავად იმ უამრავი დაპირისპირებისა, რაც ჩვენ შორის ყოფილა, ჩვენ მოვუწოდებთ ლელოს, დაუბრუნდეს ერთობის რაციონალურ გზას, გამოუსვას ცელი ბიძინა ივანიშვილს იქ, სადაც მას სტკივა და ცხადია, რომ მას სჭირდება თვითმმართველობის არჩევნებადწოდებული ფარსის ლეგიტიმაცია, ხელი აიღოს ქართველი ხალხი მოტყუებაზე და რეჟიმის თანამზრახველობაზე ხალხის მოტყუებაში და დაუბრუნოს ღირსეული პასუხი იმით, რომ არჩევნებში არ შევა, გააერთიანებს ამით ოპოზიციურ საზოგადოებას და ძალიან დიდ სიკეთეს მოიტანს.
მზად ვარ, თუ ამას გააკეთებს, 4 ოქტომბრამდე თავს არ დავესხა. თავდაუსხმელობას ხომ ითხოვენ და მზად ვარ, 4 ოქტომბრამდე ეს ყველაფერი ავიტანო.
ამ ჟესტით ბიძინა ივანიშვილმა თავისი თავი გაყიდა – მას ყველაზე ძალიან უნდა, 4 ოქტომბერს თუნდაც ლეგიტიმაციის მსგავსი მიიღოს, ამიტომ გაათავისუფლა, ეს არ არის ხაზარაძის და ჯაფარიძის წინააღმდეგ გადადგმული ნაბიჯი, ეს არის ივანიშვილის თვითინტერესში გადადგმული ნაბიჯი, რომ ძალაუფლება შეინარჩუნოს და 4 ოქტომბერს კიდევ ერთხელ გაიფორმოს რაღაც ვადით მიტაცებული ქვეყანა.
ხაზარაძეს და ჯაფარიძეს ახლა აქვთ შანსი, რომ ძალიან დიდი ნაბიჯი გადადგან ოპოზიციური ერთობისკენ და იმისკენ, რომ ჩვენ, რეჟიმის დელეგიტიმაციას მოვახდენთ ყველა დონეზე.”
გიორგი ბუტიკაშვილი, “კოალიცია ცვლილებებისთვის”: “არ მგონია, რომ პირდაპირი გარიგება შედგა, მაგრამ არასიტყვიერი გარიგება მოხდა, როცა ერთმა მხარემ აირჩია, რომ პარლამენტისთვის და ადგილობრივი არჩევნებისთვის ლეგიტიმაცია მიენიჭებინა. ეს აჩენს კითხვას, რა ხდება – არის პირდაპირი გარიგება თუ ივანიშვილის მიერ დაწესებულ თამაშის წესებზე აყოლა? ჩვენი პარტიის ლიდერები ციხეში იმიტომ აღმოჩნდნენ, რომ ამ თამაშის წესებს არ აყვნენ და მათ არავინ შეიწყალებს. ჩვენი მთავარი პოზიციაა, მორალური სიცხადე და თანმიმდევრული პოლიტიკის გაძლიერება.
როგორი გროტესკული კადრია, როდესაც ერთი მხრივ, ახალგაზრდა გოგოებს და ბიჭებს 2 წლით ციხეში უშვებენ და პარალელურად „ლელო“ აწარმოებს კამპანიას, სადაც წყალგაყვანილობაზე საუბრობს, რაც საზოგადოებრივ განწყობებთან და იმ დრამასთან, რაც ”ქართულმა ოცნებამ“ გამოიწვია, დისონანსში მოდის.”
