დავით კეზერაშვილი თმობს "ფორმულას" საკონტროლო პაკეტს. მან წილის ნახევარი კოლექტივს გადასცა

კეზერაშვილი უარს ამბობს ფორმულას საკონტროლო პაკეტზე

ოპოზიციური ტელეკომპანიის, “ფორმულას” დამფუძნებელი დავით კეზერაშვილი უარს ამბობს ტელეკომპანიის საკონტროლო პაკეტზე და საკუთარი წილის ნახევარს “ფორმულას” კოლექტივს გადასცემს.

ამის შესახებ კეზერაშვილის განცხადებაშია ნათქვამი, რომელიც 18 აპრილს გავრცელდა.

კეზერაშვილის აღნიშნული გადაწყვეტილება პასუხია იმ ჟურნალისტურ გამოძიებაზე, რომელიც გასულ კვირას გავლენიანმა ბრიტანულმა მაუწყებელმა BBC-მ გამოაქვეყნა. გამოძიება ე.წ. ქოლცენტრების საერთაშორისო თაღლითურ ქსელს ეხებოდა, რომლის სათავეშიც, BBC-ის აზრით, შესაძლოა, საქართველოს თავდაცვის ყოფილი მინისტრი, დავით კეზერაშვილი იდგეს. თავად კეზერაშვილი ბრალდებებს უარყოფს და საკუთარი სიმართლის დამტკიცებას ბრიტანულ სასამართლოში აპირებს.

“მე უარს ვამბობ “ფორმულას” საკონტროლო პაკეტზე და არსებული წილის ნახევარს ახლავე გადავცემ ტელეკომპანიის კოლექტივს”, – წერს კეზერაშვილი.

მისი თქმით, მას შემდეგ, რაც დასრულდება ივანიშვილის ოლიგარქიული მმართველობა, იგი “ფორმულას” კოლექტივსვე სრულად გადასცემს დარჩენილი წილსაც.

“ივანიშვილის ფაქტორის გაქრობისა და დასავლურ სივრცეში საბოლოოდ შესვლის შემდეგ, დარწმუნებული ვარ თავისუფალ მედიას ჩემი მონაწილეობის გარეშეც გაუჩნდება ბევრი სხვა საარსებო წყარო და აქ დაესმება წერტილი ჩემს აქტივობას მედიის მხარდაჭერის მიმართულებით და ზოგადად, ყველა ტიპის ჩართულობას ქართული პოლიტიკაში”, – წერია დავით კეზერაშვილის განცხადებაში.

კეზერაშვილი ხაზს უსვამს, რომ მიუხედავად წილის დათმობისა, “ფორმულას” კვლავ დაეხმარება ფინანსურად:

“ვიღებ გადაწყვეტილებას ჩემი დახმარების პარალელურად ტელეკომპანია “ფორმულას” მივცე სრულიად ახალი და გამოცდილებით უნიკალური მედია-მოდელის შექმნის შესაძლებლობა, რომელიც კიდევ უფრო მაღლა აწევს მისი სარედაქციო დამოუკიდებლობის თამასას, მათ შორის ჩემგანაც (რისი დეფიციტიც არხს არც ამ დრომდე ჰქონია).”

ამასთან, იგი ამბობს, რომ “ყველაფრისგან მაინც ვერ დისტანცირდება” და თავის ირგვლივ შექმნილი “მძიმე გარემოს” მიუხედავად, “პროცესებიდან გასვლა არ განიხილება”.

“როგორ შეიძლება, ვდისტანცირდე ყველაფრისგან მაშინ, როდესაც შემიძლია თუნდაც ერთი აგური დავდო რუსული ოლიგარქიის წინააღმდეგ ბრძოლაში”, – აღნიშნავს ის.

რას ამბობს კეზერაშვილი ე.წ. ქოლცენტრების საქმეზე

წერილში კეზერაშვილი უშუალოდ ბი-ბი-სი-ს გამოძების დეტალებს და ე.წ. ქოლ-ცენტრების სქემასთან მის კავშირსაც ეხმიანება. კეზერაშვილის თქმით, მიუხედავად ბი-ბი-სის სტანდარტების მიმართ პატივისცემისა, გამოძიებაში ბევრი ტყუილი და უზუსტობა იყო.

თავდაცვის ყოფილი მინისტრი ამბობს, რომ საქართველოს ხელისუფლებამ, კერძოდ კი პროკურატურამ შეძლო ბი-ბი-სის ჟურნალისტური გამოძიების “სასურველი მიმართულებით” წარმართვა და შეცდომაში შეიყვანა გამოძიების ავტორები.

კეზერაშვილს უკვირს, რატომ არ გაუჩნდათ ამ გამოძიების ავტორ საერთაშორისო კვალიფიკაციის ჟურნალისტებს კითხვა, “თუ როგორ შეიძლება ქვეყანაში იყოს ტრანსნაციონალური დანაშაულის ჰაბი [ამ ქვეყნის] ხელისუფლების ჩართულობისა და მფარველობის გარეშე”.

“ყველაფერს ვიზამ იმისთვის, რომ სასამართლოს წესით დავამტკიცო საგამოძიებო ფილმში გამოთქმული ბრალდებების უსამართლობა. მაქვს ბრიტანეთის მართლმსაჯულების სისტემას სრული ნდობა და დარწმუნებული ვარ, ის გაიზიარებს ჩემი იურიდიული ჯგუფის არგუმენტებს, რომელიც უკვე ამზადებს ყველა საჭირო დოკუმენტს,” – აღნიშნულია წერილში.

წერილში ის ასევე აღნიშნავს, რომ აქვს ინფორმაცია ქოლ-ცენტრებთან ხელისუფლების მაღალჩინოსნების კავშირის შესახებ:

“მზად ვარ ვითანამშრომლო ევროპის ნებისმიერ საგამოძიებო უწყებასთან და მივაწოდო ჩემ ხელთ არსებული ინფორმაცია იმ მაღალჩინოსნებზე, რომლებიც რეალურად არიან ჩართულნი საქართველოში ე.წ. ქოლ-ცენტრების ჰაბის მფარველობაში”.

ის ასევე მიმართავს გარკვეულ ადამიანებს, რომლებიც ჩართული იყვნენ ამ ქსელში და დღეს “მორალს კითხულობენ”. თუ ვის გულისხმობს, კეზერაშვილი არ აკონკრეტებს:

“აქვე, ჩემთვის განსაკუთრებით იმ ადამიანების პოზიციაა გასაკვირი, ვინც უკვე დიდი ხანია, ზუსტად იცის ამ თაღლითური სქემის მუშაობაზე, მასში მეზობლების, ნათესავების ან შვილების ჩართულობაზე. გასაოცარია, რომ ეს ხალხი ახლა მორალს კითხულობს და მე მამუნათებს”.

● ფორმულას დამფუძნებლის საქმეზე სააპელაციომ პირველი ინსტანციის გადაწყვეტილება ძალაში დატოვა
● ქოლ ცენტრების საქმე: საქართველოში უცხო ქვეყნის მოქალაქე დააკავეს და ტრანსნაციონალური დანაშაული გამოავლინეს
●”ფორმულას” დამფუძნებელს უზენაესმა სასამართლომ ხუთწლიანი პატიმრობა მიუსაჯა

12 აპრილს BBC-მ გამოაქვეყნა ჟურნალისტური გამოძიება, რომლის თანახმად, საქართველოს ყოფილი თავდაცვის მინისტრი დავით კეზერაშვილი, შესაძლოა, დაკავშირებული იყოს გლობალურ თაღლითურ ქსელთან, რომელმაც ევროპელი მოქალაქეების მოტყუების გზით მილიარდზე მეტი დოლარი გამოიმუშავა.

საქმე ეხება ე.წ. ქოლ ცენტრების ფინანსური თაღლითობის სქემას, რომელსაც, ბი-ბი-სი წელიწადზე მეტ ხანს იძიებდა. ქსელი პოლიციისთვის ცნობილია როგორც მილტონის ჯგუფი. ბი-ბი-სი-ის ცნობით, მათ მოახდინეს 152-ზე მეტი ბრენდის იდენტიფიცირება, რომლებიც ამ ქსელში იყვნენ ჩართული.

როგორც ბი-ბი-სი აღნიშნავს, ისინი გავიდნენ კვალზე, თუ ვინ დგას ამ ქსელის უკან. დასახელებულია ხუთი ადამიანი, მათგან ოთხს ქართული გვარი აქვს და სავარაუდოდ, საქართველოს მოქალაქეები არიან. ესენი არიან: დავით თოდუა, რატი ჭელიძე, გურამ გოგეშვილი, ჯოზეფ მგელაძე და მაიკლ ბენიმინი. BBC წერს, რომ ეს სახელები და გვარები „პანამის დოკუმენტებში“ ფიგურირებდნენ და დავით კეზერაშვილთან არიან დაკავშირებულები.

• ე.წ. ქოლ-ცენტრების საქმე

  

  ე.წ. ქოლ ცენტრების საქმეზე ოპოზიცია და ხელისუფლება უკვე დიდი ხანია ერთმანეთს ადანაშაულებენ. საქართველოს პრემიერმინისტრი ირაკლი ღარიბაშვილი წინა ხელისუფლების მაღალჩინოსნის, დავით კეზერაშვილის ბრალეულობაზე საუბრობდა, ხოლო ყველაზე დიდი ოპოზიციური პარტიის, “ნაციონალური მოძრაობის” თავმჯდომარე ლევან ხაბეიშვილი – სახელმწიფო უსაფრთხოების სამსახურის უფროსის, გრიგოლ ლილუაშვილის.

  ქოლ ცენტრების თაღლითური საქმიანობის მსხვერპლი ევროპის სხვადასხვა ქვეყანაში მცხოვრები მოქალაქეები არიან. კერძოდ, ე.წ. ქოლ ცენტრის თანამშრომლები, წინასწარ შემუშავებული გეგმის შესაბამისად, ცრუ სატელეფონო ნომრების გამოყენებით უკავშირდებოდნენ გერმანიისა და სხვა ქვეყნების მოქალაქეებს, ეცნობოდნენ გამოგონილი სახელებით, მათი კომპანიის ადგილსამყოფლის შესახებ აწვდიდნენ ყალბ ინფორმაციას და სთავაზობდნენ ფასიანი ქაღალდების, აქციების, სასაქონლო აქტივების, ვალუტების და კრიპტოვალუტების ელექტრონულ ვაჭრობაში მონაწილეობის მიღებას გამოგონილი ელექტრონული პლატფორმების გამოყენებით.

  ოპერატორები მომხმარებლებს არწმუნებდნენ, რომ მათი დახმარებით ფასების ზრდა-შემცირებაზე ელექტრონული ვაჭრობის შემთხვევაში, შეძლებდნენ სოლიდური მოგების მიღებას. მომხმარებლისგან თანხმობის მიღების შემდგომ, მათგან ელექტრონული ვაჭრობისთვის გამოყოფილი თანხების განთავსება ხდებოდა დანაშაულებრივი ჯგუფის კონტროლის ქვეშ არსებულ საბანკო ანგარიშებზე.

  ამის შემდეგ ეს თანხები თავსდებოდა ორგანიზებული ჯგუფის მიერ უცხოეთში დაფუძნებული კომპანიების ანგარიშებზე, საიდანაც ფიქტიური დანიშნულებით, თითქოსდა გაწეული მომსახურების სანაცვლოდ, ირიცხებოდა საქართველოში, მათივე კომპანიების ანგარიშებზე.

  ამ სქემით, 2021 წელს, დამნაშავეებმა 9 490 991 ევროს, 716 642 დოლარისა და 218 000 ბრიტანული ფუნტი სტერლინგის უკანონო შემოსავლის ლეგალიზაცია მოახდინეს. მაშინ ტრანსნაციონალური დანაშაულის გახსნაზე პროკურატურამ ოფიციალური განცხადება გააკეთა. უწყების ინფორმაციით, საქართველოსა და ისრაელის მოქალაქეებმა ჩამოაყალიბეს შეთანხმებულად მოქმედი, სტრუქტურული ფორმის მქონე ორგანიზებული დანაშაულებრივი ჯგუფი, თაღლითურად დაეუფლნენ “გერმანიის მოქალაქეების კუთვნილ მილიონობით ევროს და დანაშაულებრივი გზით მიღებული უკანონო შემოსავლის ლეგალიზაცია მოახდინეს.”

ბი-ბი-სი წერს, რომ ისინი დოკუმენტირებულად ვერ ადასტურებენ კეზერაშვილის კავშირს ამ თაღლითურ ქსელთან. ასევე, საგამოძიებო ჟურნალისტებმა ვერ მოიპოვეს კონკრეტული მტკიცებულებები, რომ კეზერაშვილს ფინანსური ინტერესი აქვს „მილტონ გრუპის“ ბრენდებში.

თუმცა, ჟურნალისტები ასახელებენ სხვა მნიშვნელოვან დეტალებს, რომლებიც მათი აზრით, შესაძლოა მიანიშნებდეს კეზერაშვილის კავშირზე ამ საქმესთან.

“ბევრის კვალი მიდიოდა ერთ ფიგურამდე: დავით კეზერაშვილამდე, საქართველოს მთავრობის ყოფილი მაღალჩინოსანი, რომელიც 2 წლის განმავლობაში ქვეყნის თავდაცვის მინისტრი იყო.” – წერია გამოძიებაში.