კერძო სადაზღვევო კომპანია "ჯიპიაი" ამბობს, რომ მარტის ბოლოს ასტრაზენეკას შემოიტანს და დაზღვეულებს აცრის
კერძო სადაზღვევო კომპანია “ჯიპიაიში” დაზღვეულებმა 13 მარტს მიიღეს მეილი, სადაც მათ სთავაზობენ რეგისტრაციის გავლას ასტრაზენეკას ვაქცინით ასაცრელად.
ვაქცინაციის პროცესისთვის მზადებას ოფიციალურად ადასტურებენ ჯიპიაშიც.
წერილში, რომელიც “ჯიპიაიმ” მათთან დაზღვეულ კომპანიებსა და ორგანიზაციებს გაუგზავნა, წერია, რომ გაკეთდება ვაქცინის ორი დოზა, რაშიც დაზღვეული 250 ლარს გადაიხდის.
საქართველოში კორონავირუსის აცრა ჯერ არ დაწყებულა. ქვეყანა პირველ დოზას მხოლოდ 13 მარტს მიიღებს.
როგორ მოიპოვა კერძო კომპანიამ ვაქცინა და რას სთავაზობს ჯიპიაი მომხმარებლებს?
________________________________________________________________________
“მოგესალმებით, გიზიარებთ ჯიპიაი ჰოლგინგის შეთავაზებას, რომელიც თავის დაზღვეულებს სთავაზობს კოვიდ ვაქცინაციას,” – ასეთი მეილი მიიღეს 11 მარტს იმ ორგანიზაციებმა, რომელთა თანამშრომლებიც ჯიპიაიში არიან დაზღვეულები.
წერილში წერია, რომ საუბარია ასტრაზენეკას მიერ წარმოებულ ვაქცინაზე, რომელსაც გავლილი აქვს ჯანმრთელობის მსოფლიო ორგანიზაციისა და ევროპისა და აშშ-ს მარეგულირებელი ორგანოების აკრედიტაცია.
აღნიშნულია სხვა კონკრეტული დეტალებიც: ვაქცინაციის პროცესი კლინიკა “კურაციოში” ჩატარდება. ყველა დაზღვეულს აცრა გაუკეთდება ორჯერ – 4-6 კვირიანი შუალედით.
წერილში წერია, რომ აცრა ფასიანია და ეღირება 240-250 ლარი. ამ სერვისით სარგებლობა შეეძლებათ ექსკლუზიურად ჯიპიაი-ს დაზღვეულებს და მათი ოჯახის წევრებს.
აცრა გაუკეთდება მხოლოდ 18 წლის და მეტი ასაკის დაზღვეულებს.
კომპანია წერილში აღნიშნავს, რომ ამ ეტაპზე სურს დაადგინოს, “თუ რა რაოდენობის ვაქცინაზეა მოთხოვნა ორგანიზაციაში”. წერილს თან ახლავს კითხვარი, რომელიც იმ დაზღვეულებმა და მათი ოჯახის წევრებმა უნდა შეავსონ, რომლებიც აცრის გაკეთებას აპირებენ. კითხვარი 19 მარტამდე უნდა შეივსოს.
მეილი მხოლოდ კორპორატიული წესით დაზღვეულებმა მიიღეს. ინდივიდუალურად დაზღვეულებისთვის ჯიპიაის მსგავსი შეთავაზება ჯერ არ გაუკეთებია.
სადაზღვევო კომპანია ჯიპიაი ჰოლდინგის კომუნიკაციების დირექტორი თინათინ სტამბოლიშვილი JAMnews-თან საუბარში ადასტურებს, რომ კომპანია ვაქცინაციისთვის ემზადება.
“ჩვენ მეილში გვიწერია, რომ შეიძლება გამოგვიჩნდეს ვაქცინა. ჯერ არ გვაქვს ასპროცენტიანი დასტური”.
სტამბოლიშვილი ამბობს, რომ ჯიპიაის ვაქცინაციის პროცესს არაფერი აქვს საერთო იმ 43 ათას 200 დოზა ასტრაზენეკას ვაქცინასთან, რომელსაც საქართველო კოვაქსის პლატფორმის ფარგლებში მიიღებს.
მისი თქმით, ჯიპიაი უშუალოდ მწარმოებლებს არ ელაპარაკება, არამედ “რამდენიმე ქართულ ბიზნეს-ჯგუფს, რომელთა დასახელება ჯერ არ გვინდა”.
კითხვაზე, არის თუ არა სახელმწიფო ჩართული ამ მოლაპარაკებებში, ის პასუხობს:
“ჩვენ კონკრეტულ ბიზნეს ჯგუფებს ველაპარაკებით, ხოლო ამ ბიზნეს ჯგუფების საქმიანობაში თუ არის ჩართული სახელმწიფო, მაგას ვერ გეტყვით”.
სტამბოლიშვილი ასევე არ პასუხობს კითხვას, არის თუ არა ეს ბიზნეს-კომპანია – “გეფა”.
საქართველოს ჯანდაცვის ჯგუფის შემავალმა კომპანიამ „გეფამ“, რომელსაც ამირან გამყრელიძის შვილი, ნიკოლოზ გამყრელიძე ხელმძღვანელობს, არაერთხელ დაადასტურა საჯაროდ, რომ ესაუბრება ვაქცინის მწარმოებელ ორ დიდ კომპანიას.
როგორც სტამბოლიშვილი ამბობს, “კურაციოს” კლინიკებში უკვე ამზადებენ სპეციალურ ოთახებს ვაქცინაციისთვის.
“ეს პროცესი ცოტა განსხვავებულია, ვიდრე მაგალითად, გრიპის აცრის შემთხვევაში. ამ შემთხვევაში, უფრო ინტენსიურად მოხდება პაციენტის ჯანმრთელობის მდგომარეობის შეფასება. თავად აცრის პროცესი მარტივია. ნემსის გაკეთების შემდეგ, პაციენტი 30 წუთის განმავლობაში კლინიკაში უნდა დარჩეს. ძალიან იშვიათია ალერგიული რეაქცია, თუმცა ის თუ განვითარდა, კლინიკა ამისთვის მზად იქნება,” – ამბობს სატმბოლიშვილი.
ვაქცინის თანხას დაზღვეულები წინასწარ იხდიან, ოღონდ მხოლოდ მას შემდეგ, რაც ჯიპიაის ექნება ასპროცენტიანი დასტური ვაქცინის ჩამოტანაზე.
ჯიპიაიში სულ 150 ათასი ადამიანია დაზღვეული ჯანმრთელობის დაზღვევით. როგორც სტამბოლიშვილი ამბობს, კომპანია ვარაუდობს, რომ 20-დან 50 ათასი ადამიანი მოისურვებს აცრის გაკეთებას.
როგორც სტამბოლიშვილი ამბობს, თავდაპირველად, აცრები მხოლოდ თბილისში, კლინიკა “კურაციოში” გაკეთდება, შემდეგ კი ყველა იმ რეგიონში, სადაც არის კლინიკა “კურაციო”.
“თავდაპირველად კორპორატიულ კლიენტებს შევეხმიანეთ, თუმცა როგორც კი დასტური გვექნება მწარმოებელი კომპანიისგან, აუცილებლად ინდივიდუალურად დაზღვეულებსაც შევეხმიანებით,” – ამბობს სტამბოლიშვილი.
თეონა მაზმიშვილი პრეოგრამული უზრუნველყოფისა კომპანია “ქარვა”-ში მუშაობს. ეს კომპანია სილქნეტს ემსახურება, ჯიპიაისგან შეთავაზებაც “სილქნეტის” ფარგლებში მიიღეს.
“მეილი ჩვენმა HR-მა გამოგვიგზავნა. რეგისტრაცია 19 მარტამდეა. მე ვაპირებ, რომ დავრეგისტრირდე და ავიცრა. მოგზაურობა მინდა და მინდა ნორმალურ ცხოვრებას დავუბრუნდე, ამიტომ მინდა, რომ ავიცრა. ჩემს განყოფილებაში 25 ადამიანია, ბევრს გადატანილი აქვს კორონა, თუმცა 80 პროცენტი ამბობს, რომ აიცრება. ზოგი ამბობს, იქნებ ფაიზერს დაველოდოთო. გვითხრეს, რომ მალე ონლაინ ქოლი გვექნება ჯიპიაისთან, სადაც დეტალურად გვეტყვიან, რა და როგორ. პირველ რიგში, ყველას გვაინტერესებს, ვაქცინის წარმომავლობა, ხომ არის ორიგინალური და სანდო”.
