პოლიციის რეიდები, აგრესია და დეპრესია - როგორ ჩაიარა „საკარანტინო უქმეებმა“ აზერბაიჯანში
ბაქოს ერთ-ერთ საცხოვრებელ კომპლექსში 8 ივნისის დილა პოლიციის რეიდით დაიწყო. ადამიანებს პირდაპირ ბინებში აკავებდნენ და მიჰყავდათ, ხელების გადაგრეხვით და ტანსაცმლის გამოცვლის საშუალებასაც კი არ აძლევდნენ. მანამდე ერთი დღით ადრე აივნებიდან ნაგავი და პლასტიკური ბოთლები დაუშინეს პოლიციელებს, რომლებმაც კარანტინის დარღვევის გამო ერთ-ერთი აქაური მაცხოვრებელი დააკავეს.
ასეთია აზერბაიჯანში „საკარანტინო უქმეების“ შედეგი. შაბათსა და კვირას (6-7 ივნისს) დიდი ქალაქების მცხოვრებლებს ნებისმიერი მიზეზით სახლებიდან გასვლა აეკრძალათ, ყველა მაღაზია და აფთიაქებიც კი დაკეტილი იყო. ხელისუფლება ამ გზით COVID-19-ით დაინფიცირების შემთხვევების ზრდის შეჩერებას შეეცადა. ექსპერიმენტმა არ გაამართლა. პოლიციელების მხრიდან განუკითხაობის ფონზე, სახლებში ჩაკეტვამ ადამიანებში აგრესიის, დეპრესიისა და პანიკის პროვოცირება გამოიწვია.
ოფიციალური მონაცემებით, მოცემულ მომენტში აზერბაიჯანში კორონავირუსით დაინფიცირების 7 553 ფაქტია დაფიქსირებული. 4 149 ადამიანი გამოჯანმრთელდა, 88 გარდაიცვალა, 3 316 – მკურნალობას აგრძელებს.
რამდენიმე დიდი ქალაქის და აფშერონის მთელი კუნძულის მცხოვრებლებს ორი დღის განმავლობაში ნაგვის გადასაყრელად, ძაღლის გასასეირნებლად, და თავის ტკივილის ან გულძმარვის საწინააღმდეგო წამლის საყიდლადაც კი არ შეეძლოთ სახლიდან გასვლა. ცარიელ ეზოებში პოლიციის მანქანები პატრულირებდნენ და აკავებდნენ დამრღვევებს, რა დროსაც მათ ხშირად საშიში დამნაშავეებივით ეპყრობოდნენ. დამატებით, სასწრაფო დახმარება რაღაც მიზეზებით გამოძახებაზე მისვლაზე უარს ამბობდა.
- როგორ გამოიყურება ბაქო ფანჯრიდან – სხვანაირად მისი დანახვა ახლა შეუძლებელია
- კორონავირუსი და კანონი: აზერბაიჯანული კარანტინის იურიდიული მხარე
- ეკლესია, რომელმაც ტრანსგენდერი ადამიანები შეიფარა. ვიდეო საქართველოდან
მთელი ამ ორი დღის განმავლობაში სოციალური ქსელების მომხმარებლები აქვეყნებდნენ ვიდეორგოლებს, რომლებშიც ჩანს, თუ როგორ დასდევენ პოლიციელები სხვადასხვა ადამიანს. ღამისკენ ზოგიერთი საკუთარი სახლების სახურავებზე ადიოდა, რათა ჰაერი მაინც ჩაესუნთქათ, ან ეზოში გასვლასაც რისკავდნენ. ამ ორმა დღემ ძალიან დაძაბულად ჩაიარა.
ორშაბათს, 8 ივნისს თითქოს ყველაფერი ჩვეულ კალაპოტში დაბრუნდა – ისევ ამუშავდა ტრანსპორტი, ყველა მაღაზია, კაფეები, რესტორნები, ადამიანები სამსახურებში წავიდნენ.
შინაგან საქმეთა სამინისტრომ „გაგებისა და მოთხოვნების დაცვისთვის“ მოქალქეებს მადლიერებით მიმართა.
მაგრამ, სოციალური ქსელების მიხედვით თუ ვიმსჯელებთ, თავად მოქალაქეები გასული დღეების მოვლენების შემდეგ ჯერ გონს ვერ მოსულან. ხოლო ამბოხებული სახლის მაცხოვრებელთა დაკავების კადრებმა ბევრს შოკი მოჰგვარა.
საბოლოოდ დაკავებულია 11 ადამიანი. მათთვის რაიმე განსაზღვრული ბრალდება ჯერ არ წაუყენებიათ.
„ისინი, ვინც საცხოვრებელ კომპლექსში უკანონო დაკავებების ორგანიზება მოახდინა დაუყოვნებლივ უნდა დაისაჯონ. დიდი ხნის განმავლობაში არსებული სოციალური კონტრაქტი (ადამიანების უფლებების შეზღუდვა ნავთობის შემოსავლების ვაივაგლახით განაწილების სანაცვლოდ) უკვე აღარ მუშაობს, და ქვეყანა აბსოლუტურად პოლიციურ სახელმწიფოდ ქცევის რისკის წინაშეა“, – ამბობს ოპოზიციური პარტიის „რესპუბლიკური ალტერნატივას“ ლიდერი ილგარ მამედოვი.
თუმცა, დამცველები პოლიციელებსაც გამოუჩნდათ:
„ვინც წესებს იცავდა, პოლიციას არავინ დაუკავებია, სახლიდან არავინ გამოუყვანია. გეგონება, პოლიციელებს ეხალისებათ კვირა დღეს 35-გრადუსიან სიცხეში მუშაობა. ისინი თავიანთ მოვალეობას ასრულებენ. და მთთვის თავზე ნაგვის დაყრა, მინიმუმ, გაუზრდელობაა“, – წერს ჟურნალისტი საბუჰი მამედლი.
ჯერჯერობით უცნობია, განმეორდება თუ არა „საკვირაო ლოქდაუნი“ ამ კვირის ბოლოსაც. ასევე გაუგებარია, გაითვალისწინებს თუ არა ხელისუფლება შეცდომებსა და ხარვეზებს.
