კახა გოგოლაშვილის მოსაზრება: „ქართული ოცნება“ დამოუკიდებლად გადაწყვეტილებებს ვერ იღებს

კახა გოგოლაშვილის მოსაზრება

„რონდელის ფონდის” ევროპული კვლევების ცენტრის დირექტორი, კახა გოგოლაშვილი მიიჩნევს, რომ „ქართული ოცნება“ გადაწყვეტილებებს ხშირად რუსეთის ზეწოლის შედეგად იღებს.

მან გადაცემა „ნიუსრუმში“ რუსეთის საგარეო საქმეთა მინისტრის, სერგეი ლავროვის ოჯახის წევრების საქართველოში ჩამოსვლა გააკრიტიკა და აღნიშნა, რომ ხელისუფლების ასეთი პოზიცია ხელისშემშლელია ევროკავშირის კანდიდატის სტატუსის მისაღებად.

კახა გოგოლაშვილი: „ფაქტია, რომ „ქართული ოცნება“ დამოუკიდებლად გადაწყვეტილებებს ვერ იღებს. ხშირია გადაწყვეტილებები, რომელიც რუსეთის ზეწოლის შედეგად არის მიღებული. ეს თავიდან დაიწყო პატარ-პატარა რაღაცებით და ახლა ხშირად ხდება. მაგალითად, ლავროვის აპარატიდან დაურეკეს ვიღაცას და უთხრეს, ჩამოდის ვიღაც და მიხედეთ, რომ უსაფრთხოება დაცული იყოსო.

როდესაც საქმე ეხება საკუთარ ინტერესებს და შენს პრესტიჟს, შენს ურთიერთობებს დასავლელ პარტნიორებთან, შენს ევროატლანტიკურ მომავალს, აქ ის ვერ უნდა შემოვიდეს საკუთარი დღის წესრიგით. ჩვენ მათ უკვე ვუშვებთ რუსული დღის წესრიგით. ეს არის ყველაზე უფრო დამთრგუნველი და ყველაზე მეტად სარისკო.

ჩვენ ვნახეთ, რომ საკმაოდ დიდი მიტინგი იყო, ხვალ შეიძლება უფრო დიდი მიტინგი იყოს, თუ ამისთვის ხალხს სპეციალურად დაუძახებენ, რომ დაამტკიცონ რამდენი ადამიანია იმის წინააღმდეგი, ასეთი ვიზიტები არ ხორციელდებოდეს საქართველოში, სანამ რუსეთი ომს ახორციელებს უკრაინაში და საქართველოს ტერიტორიების ოკუპაციას აგრძელებს.

როდესაც ასიათასობით მოქალაქეები ჩამოდიან, ერთი წელი რჩებიან აქ, თან მუშაობის უფლების გარეშე მუშაობენ, ე.ი. ადგილობრივ მოქალაქეს ართმევენ სამუშაო ადგილს და ასევე, ადგილობრივ ბიზნესებში შედიან კონკურენციაში. ეს ჩვენთვის დიდი პრობლემა არის.

სერგეი ლავროვთან დაკავშირებული ნებისმიერი ადამიანი სასურველი არ არის და ამას მხოლოდ პერსონალური დატვირთვა არ აქვს. შეიძლება ამან პოლიტიკური დატვირთვაც მიიღოს, რადგან ამას შემდგომ კომენტირებას უკეთებენ პრესაში, ტელევიზიაში რუსეთში, რომ აი, ლავროვის ოჯახის წევრები თავისუფლად ჩადიან საქართველოში, მათ არ უშვებენ დიდ ბრიტანეთში, ევროპაში, აშშ-ში, კანადაში, მაგრამ საქართველო უშლის მას გულს, ხელებს და ლავროვის ოჯახს იხუტებს.”

● “თქვენ აქ არავინ გელოდებათ!” – როგორ დახვდნენ თბილისში პირველ რეისს მოსკოვიდან. ფოტორეპორტაჟი და კომენტარები
● ლავროვის შვილი საქართველოშია? პროტესტი ყვარლის ტბასთან რუსული ქორწილის გამო
● “განხილულ უნდა იქნას სამთვიანი ვიზების დაწესება” – საქართველოს პრეზიდენტი უსაფრთხოების საბჭოს შეკრებას ითხოვს

19 მაისს “მთავარმა არხმა” გაავრცელა ინფორმაცია, რომ რუსეთის საგარეო საქმეთა მინისტრის, სერგეი ლავროვის შვილი, ეკატერინა ლავროვა და მისი ოჯახის წევრები საქართველოში ქორწილისთვის ჩამოვიდნენ. უკრაინაში ომის დაწყების შემდეგ ლავროვი და მისი ოჯახი, მათ შორის შვილი დასავლური სანქციების ქვეშ იმყოფება. 

ლავროვის შვილის საქართველოში ყოფნას ოფიციალური უწყებები არ ადასტურებდნენ, თუმცა როგორც პრეზიდენტმა, სალომე ზურაბიშვილმა ბრიფინგზე განაცხადა, შს მინისტრისგან “მიიღო პირობა”, რომ იმ რუსმა ოჯახმა, რომელიც ყვარელში ქორწილის გადახდას გეგმავდა, ტერიტორია დატოვა.

ამასთან, 10 მაისს საქართველომ პრეზიდენტმა უსაფრთხოების საბჭოს შეკრება მოითხოვა. პრეზიდენტის ადმინისტრაციაში გამართულ ბრიფინგზე ზურაბიშვილმა განაცხადა, რომ განხილულ უნდა იქნას სამთვიანი ვიზების დაწესება.

10 მაისს რუსეთის პრეზიდენტმა ვლადიმერ პუტინმა ხელი მოაწერა საქართველოს მოქალაქეებისთვის სავიზო რეჟიმის გაუქმების შესახებ დოკუმენტს 2023 წლის 15 მაისიდან. მეორე განკარგულებით კი, პუტინმა გააუქმა რუსეთიდან საქართველოში საჰაერო მიმოსვლის აკრძალვა.

დოკუმენტის მიხედვით, გამონაკლისს წარმოადგენენ „მოქალაქეები, რომლებიც შედიან რუსეთის ფედერაციაში შრომითი საქმიანობის განსახორციელებლად ან 90 დღეზე მეტი ვადით, მათ შორის განათლების მიღების მიზნით“.

პუტინმა კიდევ ერთი განკარგულებით რუსეთის პრეზიდენტმა რუსული ავიაკომპანიებისთვის საქართველოში ფრენებზე აკრძალვა მოიხსნა.

დოკუმენტის თანახმად, რუსეთის ფედერაციის პრეზიდენტის 2019 წლის 21 ივნისის ბრძანება ძალადაკარგულად გამოცხადდა, რომელიც რუსულ ავიაკომპანიებს საქართველოსა და რუსეთს შორის ფრენას უკრძალავდა.

ამ დრომდე რუსეთთან სავიზო რეჟიმი ცალმხრივად იყო გაუქმებული. ე.წ. გავრილოვის ღამის შემდეგ კი რუსეთმა 2019 წლის ივლისიდან საქართველოსთან პირდაპირი ფრენებიც შეწყვიტა.