"ახალი რეგულაციები საშუალებას მოგვცემს უვიზო რეჟიმი ზოგიერთი ჯგუფისთვის გავაუქმოთ" - კაია კალასი
კაია კალასის განცხადება
ევროკავშირის უმაღლესმა წარმომადგენელმა კაია კალასმა საგარეო საქმეთა მინისტრების საბჭოს სხდომის შემდეგ განაცხადა, რომ საქართველოში მდგომარეობა კანონის უზენაესობის და ადამიანის უფლებების დაცვის მხრივ, გაუარესებულია.
მისივე თქმით, ვიზალიბერალიზაციის გაუქმების გამარტივებული მექანიზმი, ევროპულ საბჭოს საშუალებას მიცემს, “უვიზო რეჟიმი ზოგიერთი ჯგუფისთვის” გააუქმოს. კალასმა ასევე განმარტა, რომ მიუღებელია პერსონალური თავდასხმები ევროკავშირის წევრი ქვეყნების ელჩებზე.
რა თქვა კაია კალასმა
“მინისტრებმა მკაფიოდ დააფიქსირეს თავიანთი პოზიცია კანონის უზენაესობისა და ადამიანის უფლებების მდგომარეობასთან დაკავშირებით, რომელიც საქართველოში გაუარესებას განაგრძობს. ევროპელი ელჩების მიმართ პირადი თავდასხმები მიუღებელია და ამას დიპლომატიაში ადგილი არ აქვს.
ევროკომისია უვიზო რეჟიმის შეჩერების მექანიზმის შესახებ ანგარიშს მიმდინარე წლის ბოლომდე წარადგენს. ნოემბერში ძალაში შევა ახალი რეგულაციები ვიზებთან დაკავშირებით, რაც მოგვცემს შესაძლებლობას, გავაუქმოთ უვიზო რეჟიმი გარკვეული ჯგუფებისთვის”. – თქვა კაია კალასმა.
კალასმა “ქართული ოცნების” პოლიციის მიერ “ფორმულას” 2 ჟურნალისტის დაკავებასთან დაკავშირებით განაცხადა, რომ საქართველოში სამოქალაქო საზოგადოებისთვის და ჟურნალისტებისთვის სივრცე “ნამდვილად” სულ უფრო მცირდება.
მისი თქმით, საქართველოს მთავრობის მიერ მიღებული ზომები საზოგადოების კრიტიკულად განწყობილი ნაწილის მიმართ, სრულიად ეწინააღმდეგება ევროკავშირის კანონებსა და პრინციპებს.
“ეს არის ის საკითხები, რომელიც წამოჭრეს მინისტრებმა დღეს. სამოქალაქო საზოგადოებისთვის და ჟურნალისტებისთვის სივრცე ნამდვილად სულ უფრო მცირდება. ზომები, რომელსაც საქართველოს მთავრობა იღებს, თავისუფალი მედიის, სამოქალაქო საზოგადოებისა და დემონსტრანტების მიმართ, ეწინააღმდეგება ყველა კანონსა და პრინციპს, რომელსაც ვაფასებთ ევროკავშირში. საქართველო კანდიდატის სტატუსი აქვს, თუმცა ასეთი ზომებით შეუძლებელია, რომ ისინი გაერთიანების წევრები გახდნენ. რადგან რაც საქართველოში ხდება, სრულიად სხვა მიმართულებაა იმისგან, რასაც ევროკავშირი წარმოადგენს.” – განაცხადა კალასმა “ფორმულას” ჟურნალისტის კითხვის პასუხად.
ევროკავშირის უმაღლესმა წარმომადგნლელმა ასევე დასძინა, რომ საქართველოს წინააღმდეგ სანქციების მიღება ამ დრომდე ვერ შეძლეს, რადგანაც აღნიშნულ ნაბიჯს ევროკავშირის წევრი ყველა სახელმწიფო მხარს არ უჭერს.
“ჩვენ სანქციების სხვადასხვა რეჟიმის ფარგლებში რამდენიმე სახის ზომა წამოვაყენეთ. მიუხედავად ამისა, ამ სანქციების მიღება ვერ ხერხდება, რადგანაც ყველა წევრი სახელმწიფო მათ მხარს არ უჭერს. რაც შეეხება ვიზებს, კომისია ვიზების შეჩერების მექანიზმს წლის ბოლომდე წარადგენს, ისევე როგორც, რეგულაციებს გარკვეული ჯგუფებისთვის. ეს ჩემი კომპეტენციაში არ შედის, ამიტომ ამ საკითხზე დეტალურად ვერ ვისაუბრებ.” – თქვა მან.
კომენტარი
“რადიო თავისუფლების” ევროპის ბიუროს რედაქტორის, რიკარდ იოზვიაკის თქმით, კალასი მიანიშნებს, რომ უვიზოს შეჩერების ახალი წესები შესაძლოა საქართველოს შეეხოს.
“საგარეო პოლიტიკის ხელმძღვანელი [კაია] კალასი ამბობს, რომ ევროკომისია წარადგენს ვიზა ლიბერალიზაციის შეჩერების შესახებ ანგარიშს, სადაც ეწერება, რომ ახალი წესები [უვიზოს] შეჩერების გამარტივებაზე ძალაში ნოემბრიდან შევა. [კალასი] მიანიშნებს, რომ შეიძლება ეს საქართველოს ზოგიერთ სექტორს შეეხოს.” – განმარტავს იოზვიაკი.
რას გულისხმობს ახალი წესები
7 ოქტომბერს ევროპარლამენტმა მხარი დაუჭირა ახალ წესებს, რომელიც მესამე ქვეყნების მოქალაქეებისთვის ვიზალიბერალიზაციის შეჩერების პროცესს გაამარტივებს. ახალ მექანიზმს მხარი 518-მა ევროპარლამენტარმა დაუჭირა, მოწინააღმდეგე 96 იყო, ხოლო ხმის მიცემისგან თავი 24-მა დეპუტატმა შეიკავა.
საკანონმდებლო ცვლილებების ძალაში შესვლის შემდეგ, უვიზო რეჟიმის შეჩერების მიზეზებს დაემატება:
- ევროკავშირის საგარეო ურთიერთობების გაუარესება მესამე ქვეყანასთან, განსაკუთრებით მაშინ, როდესაც საქმე ეხება ადამიანის უფლებებსა და ფუნდამენტურ თავისუფლებებს ან გაეროს წესდების სერიოზულ დარღვევებს;
- ქვეყნის უვიზო რეჟიმის ევროკავშირის სავიზო პოლიტიკასთან შესაბამისობის ნაკლებობა.
გაუმჯობესებული მექანიზმი ასევე მოიცავს კიდევ ერთ ცვლილებას, რომელიც კონკრეტულად საქართველოს მიემართება და გულისხმობს უვიზო მიმოსვლის შეზღუდვას მხოლოდ იმ თანამდებობის პირებისთვის, რომლებიც პასუხისმგებელნი არიან ფუნდამენტური უფლებებისა და საგარეო ურთიერთობების ვალდებულებების დარღვევაზე.
“რადიო თავისუფლების” ინფორმაციით, ევროპელი დიპლომატები ამბობენ, რომ განახლებული წესების მიღება, ნაწილობრივ, საქართველოს გამო ხდება.
