JWT Metro-ს თანამშრომლები ტოვებენ - მათი თქმით, "ოცნების" კლიპი კომპანიის დამფუძნებელმა გადაიღო
JWT Metro-ს თანამშრომლები ტოვებენ
კრეატიული სააგენტო JWT Metro-ს თანამშრომლები იმის გამო ტოვებენ, რომ 10 ოქტომბერს, JWT Metro-ს დამფუძნებელმა, ნიკა ბოჭორიშვილმა სოციალურ ქსელში საჯაროდ დაწერა, რომ მისი გადაღებულია “ქართული ოცნების“ წინასაარჩევნო კლიპი.
აღსანიშნავია, რომ “ქართული ოცნების” ფეისბუქ-გვერდზე საარჩევნო ვიდეოს აღწერაში კლიპის ავტორი მითითებული არ არის.
სააგენტოს დირექტორის, ეკა ყიფიანის განცხადებით, განვითარებული მოვლენებიდან გამომდინარე “სააგენტო ფაქტობრივად დაიშალა”. ყიფიანის თქმით, პროექტის შესახებ სააგენტოს თანამშრომლებმაც გუშინ გაიგეს.
“ეს ვიდეორგოლი არ გადაღებულა სააგენტოს ფარგლებში. შესაბამისად, არც არავის დაუძალებია ჩვენთვის არასდროს რომ რამე გაგვეკეთებინა ან არ გაგვეკეთებინა. ჩვენ ერთად ვნახეთ გუშინ. ახლა რომ ტყდება ყველაფერი ერთ ადამიანზე, რომელმაც ყველაფერი თავის თავზე აიღო, დანარჩენები იმალებიან.
ეს მეგობარი ჩვენი მეგობარია, მაგრამ ჩვენ ვთვლით, რომ არასწორად მოგვექცა და ვერ ვეთანხმებით მაგ გზაში და არ აქვს მნიშვნელობა, ვერ გავაგრძელებთ ასე მუშაობას, თუმცა არ მინდა, იფიქროთ, რომ ჩვენ მას ცეცხლში ვაგდებთ, ყოველ შემთხვევაში ის ერთადერთი მაინცაა, ვინც გამოვიდა და თავის თავზე აიღო, რომ მონაწილეობა აქვს მიღებული ამ პროექტში.
ამისთვის მადლობას ვუხდი მას. ვიდეო ხომ მარტო არ კეთდება, ერთი ადამიანის ჩართულობით. ამ ადამიანს არც კამერა აუღია და არც რეჟისორი ყოფილა… მადლობა მას, რომ ჩვენ არ შეგვეხო ეს პროექტი, მაგრამ მეორე მხრივ, არ გამოდის…
ჩვენი სააგენტო, ფაქტობრივად, დაიშალა… ყველაფერი ხანდახან უკეთესობისთვისაც ხდება.”- აცხადებს ყიფიანი.
მანამდე ნიკა ბოჭორიშვილმა დაწერა: „ეს რგოლი გადაღებულია ჩემი ხელმძღვანელობით მოწვეულ ფრილანსერ გუნდთან ერთად“. ამავე Facebook პოსტის კომენტარებში თანამშრომლებმა დაწერეს, რომ მიდიან სამსახურიდან.
ერთ-ერთი თანამშრომელი წერს, რომ არაფერი იცოდა მმართველი გუნდის მხარდამჭერ პროექტზე. ის ამბობს, რომ სააგენტოს თანამშრომლები ამ პროექტში მონაწილეობას არ იღებდნენ
„სამწუხაროა, რომ კომპანიაში სადაც 4 წელი გავატარე, კეთდება პროექტი, რომლის შესახებაც არაფერი ვიცოდით. ცოდნის შემთხვევაში ამ გადაწყვეტილებას უფრო მარტივად და სწრაფად მივიღებდი. შემიძლია დარწმუნებით ვთქვა, რომ სააგენტოს თანამშრომლები ამ პროექტში არ მონაწილეობდნენ, თუმცა ეს კომპანიაზე არაფერ კარგს მაინც არ ამბობს. P.S. ვეძებ სამსახურს“, – წერს ერთ-ერთი თანამშრომელი, სანდრო ჯავახიშვილი.
მის გარდა სამსახურიდან დატოვებაზე დაწერა კიდევ 4-მა თანამშრომელმა.
ამის პარალელურად, JWT METRO-მ ოფიციალურ ფეისბუქ გვერდზე დაპოსტა: “JWT METRO left job at JWT METRO”. გამოქვეყნებიდან რამდენიმე წუთში პოსტი წაიშალა.
შეგახსენებთ, რომ JWT Metro ერთ-ერთი იყო იმ კრეატიული სააგენტოებს შორის, რომლებმაც გაზაფხულზე, პროტესტის დროს ერთობლივი განცხადება გაავრცელეს და თქვეს, რომ არ ითანამშრომლებდნენ ბრენდებთან, რომლებიც მხარს უჭერენ რუსულ კანონს.
განცხადებას უერთდებიან: – ADHD – Betterfly – Enkeny Films – JWT Metro – Leavingstone – Maverik – Playmakers – Redberry – Socialsharks – Q&A – Quick – Watergunz – Windfor’s
