ჯონ კერის ვიზიტი საქართველოში. მთავარი

ნატოს ვარშავის სამიტამდე ცოტა ხნით ადრე საქართველოს ოფიციალური ვიზიტით ეწვია აშშ-ს სახელმწიფო მდივანი, ჯონ კერი. კერი შეხვდა საქართველოს პრემიერ-მინისტრ გიორგი კვირიკაშვილს და საქართველოს პრეზიდენტს, გიორგი მარგველაშვილს

“ყველაზე მნიშვნელოვანი მემორანდუმი”

ვიზიტის მთავარი შედეგი იყო ორ ქვეყანას შორის თავდაცვისა და უსაფრთხოების სფეროში პატრნიორობის გაღრმავების შესახებ მემორანდუმის ხელმოწერა. ეს ნიშნავს, რომ აშშ ქვეყანას კვლავაც გაუწევს დახმარებას მთელი რიგი მიმართულებებით – თავდასაცავი შენაძენებით დაწყებული, ინფორმაციის ფართოდ გაცვლით დასრულებული.

მემორანდუმი ასევე ითვალისწინებს ტექნიკური პერსონალის მომზადებასა და სპეციალურ პროგრამებს, რომელთა მიზანია ამერიკულ მხარესთან ერთად ქვეყნის ტერიტორიული თავდაცვის უზრუნველყოფა.

“იქნება მეტი ერთობლივი წვრთნა, რაც ძალიან მნიშვნელოვანია საქართველოს თავდაცვისუნარიანობის გასაუმჯობესებლად. და, რასაკვირველია, ეს დოკუმენტი საქართველოსა და შშ-ს შორის უაღრესად მნიშვნელოვანი სტრატეგიული პარტნიორობის კიდევ ერთი დადსტურებაა,” – განაცხადა მემორანდუმის ხელმოწერის შემდეგ პრემიერმა კვირიკაშვილმა.

აშშ-ს სახელმწიფო მდივნის თქმით, მემორანდუმი მოიცავს თანამშრომლობას საზღვრების, ასევე საჰაერო და საზღვაო სივრცის უსაფრთხოების უზრუნველყოფის თვალსაზრისით, და მთლიანობაში ის დაეხმარება საქართველოს ნატოში გაწევრიანების გზაზე.

საქართველოს თავდაცვის მინისტრმა თინათინ ხიდაშელმა მემორანდუმს აშშ-სა და საქართველოს შორის დადებული “ყველაზე მნიშვნელოვანი” შეთანხმება უწოდა. 

“წლების განმავლობაში საქართველოს შეიარაღებული ძალებისთვის გაწეული დახმარება, ძირითადად, საერთაშორისო მისიებზე იყო დამოკიდებული და უშუალოდ უკავშირდებოდა საქართველოს ნატოში გაწევრიანების გეგმებს. დღეს მივიღეთ ახალი შეთანხმება, რომლის მიხედვითაც, ამერიკული მხარე ფუნდამენტურ და მნიშვნელოვან დახმარებას უწევს საქართველოს სახელმწიფოს საკუთარი ტერიტორიული თავდაცვითი მიზნების განსახორციელებლად,” – განაცხადა ხიდაშელმა. მისი თქმით, შედგება დაწვრილებითი გეგმა, ხოლო მემორანდუმის დანერგვა ამ წლის ბოლომდე უნდა დაიწყოს.

შეგხსენებთ, რომ აგვისტოს ომის შემდეგ შემოღებული იყო გარკვეული ემბარგო საქართველოს მიერ იარაღის შეძენასთან დაკავშირებით.

აშშ მხარს უჭერს საქართველოს სუვერენიტეტს

“ამერიკის შეერთებული შტატები მტკიცედ უჭერს მხარს საქართველოს სუვერენიტეტს, უსაფრთხოებას, განვითრებასა და მის ევროატლანტიკურ მისწრაფებებს,” – სწორედ ასეთი გზავნილი ჩამოიტანა ვაშინგტონიდან აშშ-ს სახელმწიფო მდივანმა.

მისი თქმით, აშშ რუსეთს კვლავ მოუწოდებს, შეასრულოს 2008 წელს ცეცხლის შეწყვეტის შესახებ დადებული შეთანხმება, მათ შორის, შიარაღებულ ძალთა იმ პოზიციებზე დაბრუნების მოთხოვნით, რაც მას კონფლიქტამდე ეკავა.

“აშშ საქართველოს სუვერენიტეტისა და ტერიტორიული მთლიანობის ერთგული რჩება. რუსეთის მიერ საქართველოს ნაწილის ოკუპაცია და მილიტარიზაცია მიუღებელია,” – განაცხადა მან.

მომავალი არჩევნები – დემოკრატიის ტესტი

თბილისში გამართული პრესკონფერენციის დროს კერიმ აღნიშნა, რომ 8 ოქტომბერს დანიშნული საპარლამენტო არჩევნები საქართველოსთვის მორიგი ტესტი იქნება.

“თავისუფალი და პატიოსანი არჩევნები მნიშვნელოვანი ნაბიჯი იქნება ამ ქვეყანაში მცხოვრები ყველა ადამიანის მეტი უსაფრთხოებისთვის, მეტი სტაბილურობისა და განვითარებისთვის,” – განაცხადა კერიმ.

კერიმ განსაკუთრებულად გაუსვა ხაზი დაშინებისგან თავისუფალი საარჩევნო გარემოს მნიშვნელობას.

“საქართველო რეგიონში მშვიდობიანი დემოკრატიული ცვლილებებისა და საარჩევნო პირობების გაუმჯობესების მაგალითს წარმოადგენს. თავისუფალი და სამართლიანი არჩევნები ქვეყნის მოსახლეობისთვის მეტი უსაფრთხოების, მეტი სტაბილურობისა და კეთილდღეობისკენ გადადგმული დიდი ნაბიჯი იქნება. შეხვედრების დროს ჩვენ ვილაპარაკეთ ისეთი საარჩევნო გარემოს აუცილებლობაზე, რომელიც თავისუფალი იქნება ყველანაირი დაშინების მცდელობისგან, ასევე – მასობრივი საინფორმაციო საშუალებების თავისუფლების დაცვის საქმეში შემდგომ პროგრესზე,” – აღნიშნა სახელმწიფო მდივანმა.

საქართველო და ნატო

ჯონ კერიმ ასევე დაადასტურა აშშ-ს მზადყოფნა საქართველოს ევროატლანტიკური მისწრაფებების მხარდაჭერის თვალსაზრისით, და აღნიშნა, რომ საქართველოს წვლილი ალიანსში ყველაზე დიდია იმ ქვეყნებს შორის, ვინც მისი წევრი არ არის; კერძოდ – “მნიშვნელოვანი მხარდაჭერა” ავღანეთში.

თუმცა, როგორც ჩანს, საქართველო ისევ ვერ მიიღებს ვარშავის სამტზე “მაპს” – დოკუმენტს, რომლის მიღებასაც ბოლო რამდენიმე წლის განმავლობაში უშედეგოდ ცდილობს თბილისი.

კერი ირწმუნება, რომ მართალია, საქართველოს ნატოში ინაგრაციის პროცესი საერთაშორისო გამოწვევების გამო ყოვნდება, მაგრამ ეს არ უნდა განიხილებოდეს როგორც უიმედო მდგომარეობა.

სახელმწიფო მდივანმა თქვა, რომ ვაშიგტონი მტკიცედ ემხრობა ნატოს ღია კარის პოლიტიკას და გაიმეორა, რომ აშშ მხარს უჭერს 2008 წლის ბუქარესტის სამიტის დეკლარაციას, რომლის მიხედვითაც, საქართველო ნატოს წევრი გახდება.

“ამ წინადადებას ჩვენ ვარშავაშიც მხარს დავუჭერთ,”- განაცხადა მან.

მისი თქმით, “პროცესის შენელებას თავისი მიზეზები აქვს”, რადგან არსებობს ბევრი საერთაშორისო გამოწვევა, მათ შორის – უკრაინასა და სირიასთან დაკავშირებით.

ღვინოსა და ხაჭაპურზე

თბილისში, პრემიერმინისტრ კვირიკაშვილთან ერთად გამართულ ბრიფინგზე კერი აუდიტორიას ქართულად მიესალმა. მან საქარველოში თავისი პირველი ვიზიტი გაიხსენა, როდესაც ჯერ კიდევ სენატორი ჯონ კერი იყო, და გულდაწყვეტით აღნიშნა: “მას შემდეგ, რაც წინა ჯერზე ხაჭაპურსა და დიდებულ ღვინოს გემო გავუსინჯე, ვერ ვხვდები, აქ უფრო ადრე რატომ არ ჩამოვედი.”

საქართველოში ვიზიტის შემდეგ აშშ-ს სახელმწიფო მდივანი კიევში გაემგზავრა, სადაც მას უკრაინის ხელისუფლებასთან აქვს დაგეგმილი შეხვედრები, რის შემდეგაც ის ვარშავაში, ჩრდილოატლანტიკური ალიანსის სამიტზე ჩავა, სადაც ის ამერიკის შეერთებული შტატების პრეზიდენტს, ბარაკ ობამას გაუწევს თანხლებას, – იუწყება შშ-ს სახელმწიფო დეპარტამენტი.

• ბოლოს ჯონ კერი თბილისში 2008 წელს იმყოფებოდა სენატორის სტატუსით.

•  2012 წელს კი საქართველოში ჩამოვიდა მაშინდელი სახელმწიფო მდივანი, ჰილარი კლინტონი.

•  2005 წელს საქართველოში ოფიციალური ვიზიტით იმყოფებოდა აშშ-ს პრეზიდენტი, ჯორჯ ბუში.

გამოქვეყნებულია:7.07.2016