ჯეიკ სალივანი: კვლავ შეშფოთებული ვართ დემოკრატიული ტრაექტორიისა და საარჩევნო პროცესის გამო
ჯეიკ სალივანის განცხადება
აშშ-ის პრეზიდენტის მრჩეველმა ეროვნული უსაფრთხოების საკითხებში, ჯეიკ სალივანმა Globalnew.ge-ს კითხვაზე უპასუხა, რომ თეთრი სახლი კვლავ შეშფოთებულია საქართველოს დემოკრატიული ტრაექტორიისა და საარჩევნო პროცესის გამო.
ჟურნალისტმა მას ჰკითხა: “როგორია თქვენი ხედვა ჩინეთის ინტერესთან დაკავშირებით სამხრეთ კავკასიაში, კერძოდ, ააშენოს პორტი შავ ზღვაზე და ასევე, ამავე კონტექსტში საქართველოში მიმდინარე პროცესებზე რას ფიქრობთ? 3 დღეში ქვეყნისთვის მნიშვნელოვანი არჩევნებია, წინასაარჩევნო პერიოდი კი, მძიმე ანტიდასავლური რიტორიკის ფონზე წარიმართა. როგორია თქვენი მოლოდინი?”
“ჩვენ ძალიან მკაფიოდ გამოვხატეთ ჩვენი შეშფოთება საქართველოში დემოკრატიული ინსტიტუტებისა და საარჩევნო პროცესის ტრაექტორიასთან დაკავშირებით და კვლავაც შეშფოთებულები ვართ ამის გამო.
საბოლოო ჯამში, საქართველოს მომავალი ქართველმა ხალხმა უნდა გადაწყვიტოს თავისუფალ და სამართლიან არჩევნებში. არა მგონია, საქართველოში ვინმეს სურდეს საკუთარი ქვეყანა ჩადოს სხვა ქვეყნის ინტერესებში, მათ შორის, ჩინეთის.”- უპასუხა ჯეიკ სალივანმა.
აღსანიშნავია, რომ 17 ოქტომბერს აშშ-ს ჰელსინკის კომისიამ განცხადებას გაავრცელა, რომელშიც ვკითხულობთ, რომ მთავრობის ავტორიტარული ტრაექტორია საფრთხის ქვეშ აყენებს საქართველოს დემოკრატიულ მომავალს. განცხადებას ხელს კომისიის თავმჯდომარე ჯო უილსონი, კონგრესმენი სტივ კოენი, ასევე კომისიის სხვა წევრები აწერენ.