ივანიშვილი პოლიტიკიდან მიდის. რა წერია მის გამოსამშვიდობებელ წერილში. მოკლედ
„ქართული ოცნების“ თავმჯდომარე და ქვეყნის არაფორმალური მმართველი ბიძინა ივანიშვილი აცხადებს, რომ ტოვებს მმართველი გუნდის თავმჯდომარის პოსტს და მიდის პოლიტიკიდან:
“მივიღე გადაწყვეტილება, საბოლოოდ დავტოვო პოლიტიკა და სრულად ჩამოვცილდე მართვის სადავეებს… ჩემს 2011 წლამდელ, კერძო ცხოვრების წესს ვუბრუნდები,” – წერს ბიძინა ივანიშვილი თავის ღია წერილში საზოგადოების მიმართ, რომელიც 11 იანვარს გამოქვეყნდა.
პოლიტიკიდან წასვლის მთავარი მიზეზი, მისი თქმით, არის ის, რომ “მის მიერ დეკლარირებული თითქმის ყველა მიზანი მიღწეულია”.
“პოლიტიკიდან მივდივარ ამაყი, გამარჯვებული და ხალხის მადლიერი,” – წერს ოლიგარქი.
ივანიშვილის ღია წერილში 4336 სიტყვაა, JAMnews-ი მოკლედ გიყვებათ, რა იყო ყველაზე მნიშვნელოვანი:
პოლიტიკიდან წასვლის კონკრეტული მიზეზები
პოლიტიკიდან წასვლის მთავარ მიზეზად ივანიშვილი ასახელებს იმას, რომ უკვე შეასრულა თავისი მთავარი მისია, რომლის შესრულებასაც დაპირდა ხალხს:
ასევე, ამბობს, რომ შექმნა ისეთი გუნდი, რომლის იმედიც აქვს მომავალში:
“დარწმუნებული ვარ, რომ ამ ადამიანებით დაკომპლექტებულ გუნდს შეუძლია ჩემი შრომის, ავტორიტეტისა და უნარების ღირსეულად ჩანაცვლება… ამიტომაც, ვთვლი, რომ ჩემი მისია შესრულებულია,” – წერს იგი.
წასვლის ერთ-ერთ მიზეზად ივანიშვილი თავის ასაკსაც ასახელებს:
“სულ რამდენიმე კვირაში სამოცდახუთი წელი შემისრულდება, ესეც ერთ-ერთი მნიშვნელოვანი ფაქტორია”.
და ასევე, იგი ამბობს, რომ გზა ახალგაზრდებს უნდა დაუთმოს:
“ახალგაზრდების წინ წამოწევით ნაკარნახევი ჩემი ეს ნაბიჯი არა მარტო არ შეასუსტებს, არამედ, მჯერა, კიდევ უფრო გააძლიერებს, მმართველ პარტიას, გაამხნევებს ჩვენს მომხრეებს და უფრო ენერგიულს გახდის ხელისუფლებას”.
_____________________________________________________________________________
● ოლიგარქის სოფელი. როგორ ცხოვრობენ ჭორვილაში დღეს? რეპორტაჟი
● რა თქვა ბიძინა ივანიშვილის უსაფრთხოების ყოფილმა უფროსმა “მთავარ არხთან” ინტერვიუში
● რა იმალება ვარდისფერი ფლამინგოს უკან? რეპორტაჟი დენდროლოგიური პარკიდან
● საფრანგეთმა ბიძინა ივანიშვილს საპატიო ლეგიონის ორდენი მიანიჭა
______________________________________________________________________________
ორი მთავარი მიზანი, რის გამოც პოლიტიკაში მოვიდა
ივანიშვილი წერს, რომ 2011 წელს, როდესაც პოლიტიკაში მოვიდა, ორი მთავარი მიზანი და ამოცანა ჰქონდა და ორივე წარმატებით შეასრულა:
პირველი ეს იყო სააკაშვილის არაჰუმანური რეჟიმის დასრულება.
ხოლო მეორე – ქვეყნის ევროატლანტიკური კურსის გადარჩენა. ივანიშვილის თქმით, სააკაშვილი, რომელიც არაპოპულარული იყო მოსახლეობაში, საკუთარ თავს აიგივებდა დასავლეთთან, რაც ხალხის მხრიდან “ავტომატურად განაპირობებდა მკვეთრ აგრესიას ქვეყნის დასავლური ორიენტაციისადმი”.
“სწორედ ამან შექმნა საქართველოს საპირისპირო ორბიტაზე გადანაცვლების საშიშროება” – აღნიშნულია წერილში.
ამავე დროს, ივანიშვილის თქმით, დასავლეთისთვის სულ უფრო ძნელი იყო “დემოკრატიის ფასადს ამოფარებული დიქტატურის მხარდაჭერა”.
“გადაუჭარბებლად შეიძლება ითქვას, რომ ეს ტვირთი ჩვენს დასავლელ პარტნიორებს „ქართული ოცნების“, როგორც პოლიტიკური სუბიექტის, დაბადებამ და გამარჯვებამ ჩამოხსნა”.
რას ფიქრობს 31 ოქტომბრის საპარლამენტო არჩევნებზე
ივანიშვილი “ქვეყნის ისტორიაში უპრეცედენტოს”. “ისტორიული მნიშვნელობის” მოვლენას უწოდებს 31 ოქტომბრის არჩევნებს.
უპრეცედენტო იმიტომ, რომ “სამართლიანი და თანასწორი არჩევნების პირობებში მმართველმა პარტიამ ხალხისგან მესამე ვადით მართვის მანდატის მიღება შეძლო”.
ხოლო ისტორიული იმიტომ, რომ ამ არჩევნებმა აჩვენა, რომ საქართველოში ახალი პოლიტიკური კულტურა ჩამოყალიბდა: “დასრულდა ადამიანების გრძნობებით მანიპულირებისა და ხალხის ნების სხვადასხვა გზით შეცვლის მრავალწლიანი პრაქტიკა”.
რატომ აირჩია ქართული ოცნება ხალხმა მესამედ?
ივანიშვილის თქმით, “ქართული ოცნების” გამარჯვების მთავარი მიზეზი არის ის, რომ ხალხმა შედარება გააკეთა “ქართულ ოცნების” მმართველობის რვა წელსა და წინამორბედი ხელისუფლების ცხრაწლიანი მმართველობას შორის და სწორი დასკვნა გამოიტანა.
” დღეს ეს ბოროტება [ნაციონალური მოძრაობა] მნიშვნელოვნად შესუსტებულია, თუმცა მისი მავნე ზემოქმედება, სამწუხაროდ, ჯერ კიდევ იგრძნობა და მის მთავარ შემაკავებელ ძალად კვლავ „ქართული ოცნება“ რჩება. ეს ის რეალობაა, რომლის გაუთვალისწინებლად შეუძლებელია სრულფასოვანი პოლიტიკური შეფასება,” – წერს ივანიშვილი.
რას ფიქრობს ივანიშვილი ხალხზე?
ივანიშვილი ფიქრობს, რომ “ქართული ოცნების” მმართველობის პირობებში, “ხალხი გაიზარდა, ის არ შეეგუება დიქტატურას”.
მისი თქმით, საქართველოში აღდგენილია კონსტიტუციით გარანტირებული, რეალური სახალხო სუვერენიტეტი.
“ახლა, მთელი ხელისუფლება საზოგადოების ხელშია თავმოყრილი. თითოეული ადამიანის ხმას აქვს სათანადო ფასი და მნიშვნელობა,” – წერს ივანიშვილი.
მას იმედი მაქვს, მომავალში ადამიანები აღარასდროს აირჩევენ “ხელისუფლებას, რომელიც მათზე იბატონებს”.
“ნაციონალური მოძრაობის” და “ქართული ოცნების” შედარება ორ აბზაცში:
ივანიშვილი მიმოიხილავს, რა იყო მისი აზრით, “ნაციონალური მოძრაობის“ ცხრაწლიანი „მოღვაწეობის“ შედეგი:
“ავტორიტარიზმი, საკუთარი თავის გაფეტიშება, შიშსა და წამებაზე დაფუძნებული დიქტატურა, მიტაცებული საჯარო სივრცე და ცრუ პროპაგანდა, პირადი ძალაუფლების გამყარების და უვადოდ გახანგრძლივების მცდელობა, რის გამოც შეიცვალა კონსტიტუცია და ქვეყანა ფსევდოსაპარლამენტო მმართველობაზე გადავიდა. აღარაფერს ვამბობ ომის ტრაგედიასა და დევნილებზე, დაკარგულ ტერიტორიებსა და რუსულ ოკუპაციაზე, რაც კიდევ უფრო დამძიმებულ მემკვიდრეობად დაგვრჩა” – წერს ივანიშვილი.
შემდეგ აბზაცში წერს რა არის „ქართული ოცნების“ მმართველობის რვა წლის შედეგი:
“ეს გახლავთ მშვიდობა, ღია და პლურალისტული დემოკრატია გახსნილი საჯარო და საინფორმაციო სივრცით, საკონსტიტუციო რეფორმით განმტკიცებული საპარლამენტო მმართველობა, ხელისუფალის გაფეტიშების მიუღებლობა, ინსტიტუციურად დაბალანსებული ხელისუფლება, პოლიტიკისაგან გამიჯნული მართლმსაჯულება და საჯარო ინსტიტუტები, კანონის უზენაესობა და მის წინაშე თანასწორობა, სამართლიანი არჩევნების პრაქტიკის დამყარება, დაბოლოს, პოლიტიკიდან დროული წასვლა”
რა შეიცვალა ბოლო რვა წელიწადში:
მედია
რა იყო “ნაციონალური მოძრაობის დროს: “სახელისუფლებო პარტიას მიტაცებული ჰქონდა და სრულად აკონტროლებდა სამივე ეროვნულ მაუწყებელს (იმედს, რუსთავი 2-ს და საზოგადოებრივ მაუწყებელს);
პარტიის ლიდერები საკუთარი დღის წესრიგით მართავდნენ საინფორმაციო ველს, ისინი ადგენდნენ ახალი ამბების თანმიმდევრობას და ხშირად პირადად წერდნენ ახალი ამბების ტექსტებსაც კი;
ჩართული იყო ერთიანი პროპაგანდის მანქანა, რომელიც ყველა საშუალებით ცდილობდა ადამიანთა შეხედულებებზე გავლენის მოხდენას”
რა გააკეთა “ქართულმა ოცნებამ” : ივანიშვილის თქმით, “ქართულმა ოცნებამ” მიტაცებულ არხებზე სამართლიანობა აღდგენა, რასაც წლები დასჭირდა, “თუმცა, სამწუხაროდ, სიცრუის მანქანა დღესაც მუშაობს, რადგან არსად გამქრალან არც პოლიტიკური შემკვეთი, სააკაშვილის სახით, და არც ამ შეკვეთის შემსრულებლები, მედიამენეჯერებად გადაკვალიფიცირებული პარტიული ფუნქციონერებისა და ჟურნალისტების სახით”, წერს ივანიშვილი.
მისი თქმით, “ქართულმა ოცნებამ” უარი თქვა პროპაგანდაზე:
“სახელმწიფოს სწორი მართვითა და პროპაგანდაზე უარის თქმით, ჩვენ შევძელით ადამიანებისთვის თავისუფალი და პლურალისტური გარემოს შექმნა”.
ეკონომიკა
რა იყო “ნაციონალური მოძრაობის დროს: ივანიშვილის თქმით, წინა ხელისუფლების დროს “გაკონტროლებული იყო ქვეყანაში ყველა ბიზნესაქტივობა, ბიზნესზე მომსხდარი იყო პროკურატურა და ფინანსური პოლიცია”.
“ხელისუფლებას მთლიანად მძევლად ჰყავდა აყვანილი მსხვილი ბიზნესი… ბიზნესმა დაკარგა თავისი უმთავრესი მახასიათებელი, – გადაწყვეტილების თავისუფლად მიღების შესაძლებლობა“.
ივანიშვილის თქმით, “ფინანსური ტრანზაქციები გენერალური პროკურორის ყოველდღიურ, პირად კონტროლს ექვემდებარებოდა” , ხოლო ეკონომიკა და ლარის კურსი ხელოვნურად ეჭირათ:
“ლარის კურსის დაჭერა ხდებოდა 2008 წლის წაგებული ომის სანაცვლოდ მიღებული დასავლეთის ფინანსური ინექციით.
ეს იყო რამდენიმემილიარდიანი სესხი, რომელიც დღემდე ვალად აწევს ქვეყანას და ხალხს,” – წერს ივანიშვილი.
რა გააკეთა “ქართულმა ოცნებამ” : მისი თქმით, “დღეს ბიზნესი არათუ თავისუფალია, არამედ ბიზნესმენები უკვე აღარც პოლიტიკურ განცხადებებს ერიდებიან და არც პოლიტიკაში მოსვლას”.
“ქართული ეკონომიკა დღეს სწორი და ოპტიმისტური მიმართულებით მოძრაობს,” – წერს ივანიშვილი.
“ჩვენ საბოლოოდ დავუსვით წერტილი ბიზნესში მთავრობის ფავორიტიზმს და ხელისუფლების გამდიდრებისათვის შექმნილ მონოპოლიებს… სამეწარმეო საქმიანობისთვის ჩამოყალიბებულია მაქსიმალურად თავისუფალი და ტოლერანტული გარემო”.
ბალანსი ხელისუფლების შტოებს შორის
“ქართულმა ოცნების“ მთავარ მიღწევებს შორის ბიძინა ივანიშვილი გამოყოფს ბალანსს ხელისუფლების შტოებს შორის:
“დღეს საქართველოს ხელისუფლება გაწონასწორებული და დაბალანსებულია, არავის აქვს ზომაზე მეტი, ჭარბი და გადამეტებული ძალაუფლება. თითოეულ სახელისუფლებო შტოს აქვს მკაცრად განსაზღვრული და შემოფარგლული უფლებამოსილებები. დღეს ჩვენ გვყავს მოამაგე, მეგობრული და ხალხზე მზრუნველი ხელისუფლება”.
ასევე, მისი თქმით, “ქართულმა ოცნებამ” შექმნა კონსტიტუციურ-სამართლებრივი სისტემა, რომელიც შეკავებისა და კონტროლის გარანტირებულ და საიმედო მექანიზმად იქცა.
“სამუდამოდ დავასრულეთ პოლიტიკის ფორმირებაში სამართალდამცავი ორგანოებისა და უსაფრთხოების სამსახურების არაპროპორციული მონაწილეობის პრაქტიკა, რომელზეც ძირითადად დაფუძნებული იყო წინა ხელისუფლების დანაშაულებრივი საქმიანობა.”
ყველაფერი ასე კარგადაა? არა, არის პრობლემებიც
ივანიშვილი ამბობს, რომ ქვეყნის მთავარ გამოწვევად და პრობლემად ჯერ კიდევ დაუძლეველი სიღარიბე რჩება.
“დიახ, სიღარიბე ობიექტური რეალობაა, რომელსაც მე გულისტკივილით ვუსწორებ თვალს,” – წერს ივანიშვილი.
თუმცა, იქვე აგრძელებს, რომ არ იღებს პასუხისმგებლობას ამ მდგომარეობაზე:
“ვერ მივიღებს იმ ბრალდებას, რომ სიღარიბე, რომელიც მემკვიდრეობით გვერგო, „ქართული ოცნების“ მმართველობის შედეგია,” – წერს ივანიშვილი.
მისი თქმით, დღევანდელი სიღარიბე ათწლეულობით დაგროვებული პრობლემაა:
“ჩვენ [ქართულმა ოცნებამ] მოვახერხეთ და შევაჩერეთ ვარდნა, დასაბამი მივეცით პროგრესს და შევამცირეთ სიღარიბე, რომლის საბოლოო დაძლევას ხელისუფლების თავდაუზოგავი შრომა, მშვიდობა, სტაბილურობა, დემოკრატია და გარკვეული დრო კიდევ დასჭირდება,” – აღნიშნულია წერილში.
რა მიყვება ივანიშვილს მთავარ დარდად? სპოილერი: ოპოზიცია და ოპოზიციური მედია
ივანიშვილი ამბობს, რომ მიუხედავად იმისა, რომ “ქართულმა ოცნების” ხელისუფლებამ “შესაძლებლობების თითქმის მაქსიმუმი გააკეთა”, შესაძლოა, “ყველაფერი ისე ან იმ ხარისხით არ გამოგვივიდა, როგორც ჩავიფიქრეთ”.
აქ ივანიშვილი მიანიშნებს, რომ ქართველ ხალხს არარეალისტური მოლოდინები ჰქონდა, რადგან “ქართველები, ძირითადად, ემოციური, მეოცნებე ხალხი ვართ”.
ის ბოდიშს უხდის მათ, “ვინც მეტს ელოდა ჩვენგან, ეკონომიკური მდგომარეობის უფრო სწრაფ გაუმჯობესებას ელოდა და იმედი გაუცრუვდა”.
“ქართული ოცნების” დამფუძნებელს, რომელიც პოლიტიკიდან მიდის, ერთ-ერთ მთავარ დარდად მიყვება ის, რომ ქვეყანაში, მისი თქმით, არაკონსტრუქციული ოპოზიციაა:
“გული მწყდება, რომ ვერ შეიქმნა კონსტრუქციული ოპოზიცია, არ დავმალავ და გულწრფელად ვიტყვი, რომ ჩემი პოლიტიკური საქმიანობის დასასრულს, ერთ-ერთი, რაც საფიქრებლად და დარდად მიმყვება, არის ის, რომ ქვეყანაში ჯერ კიდევ ვერ ჩამოყალიბდა სახელმწიფოებრივად მოაზროვნე და პასუხისმგებლობის მქონე ოპოზიცია, რომელიც მინიმალურად მაინც დააკმაყოფილებდა ევროპული საპარლამენტო დემოკრატიისთვის დამახასიათებელ სტანდარტებს”.
“ქართული ოცნების” ვერმოგვარებულ პრობლემებს შორის ივანიშვილი გამოყოფს იმას, რომ საინფორმაციო ველზე დარჩნენ მედიები, რომლებიც სიცრუეს ავრცელებენ.
“ჩვენ ბევრი რამ შევცვალეთ ამ ქვეყანაში, ბევრ გამოწვევას გავუძელით, ბევრი პრობლემა გადავლახეთ, მაგრამ სიცრუის დამარცხება და გაქრობა საინფორმაციო ველიდან ვერ შევძელით,” – წერს ივანიშვილი.
მისი თქმით, „ქართული ოცნების“ მმართველობის დროს “პრობლემად დარჩა სიცრუე და ტყუილზე დაფუძნებული პროპაგანდა”, რომელიც ოპოზიციაში გადასული ყოფილი სახელისუფლებო გუნდის მთავარ პოლიტიკურ ინსტრუმენტად დარჩა.
“მიუხედავად იმისა, რომ ფეიკნიუსის პრობლემა მთელ ცივილიზებულ სამყაროს აწუხებს, საქართველოს შემთხვევაში მისმა მასშტაბმა წარმოუდგენელ უფსკრულს მიაღწია. აღვირახსნილმა პროპაგანდამ რიგითი მაყურებელი მთლიანად გააუცხოვა სატელევიზიო სივრცეს. ფაქტებით მანიპულაცია, ტყუილი და ცილისწამება ზოგიერთი მედიასაშუალების სარედაქციო პოლიტიკის ამოსავალ წერტილად გადაიქცა,” – აღნიშნავს ივანიშვილი.
მისი თქმით, სიცრუეს “ჟურნალისტებთან ერთად, ექსპერტებად წოდებული პერსონებიც განსაკუთრებული ენთუზიაზმით” ავრცელებენ და ამას ანგარების მოტივით აკეთებენ.
ოპოზიციაზე, რომელიც პარლამენტში არ შედის
ზოგადად, წერილის დიდი ნაწილი ივანიშვილმა სწორედ ოპოზიციაზე ლაპარაკს დაუთმო.
ძირითადად იგი “ნაციონალურ მოძრაობაზე” საუბრობდა, თუმცა ასევე მიმართა სხვა პარტიებს, რომლებმაც ბოიკოტის ნიშნად უარი თქვეს საპარლამენტო მანდატებზე, რადგან მიაჩნიათ, რომ 31 ოქტომბრის არჩევნები გაყალბდა.
ივანიშვილის თქმით, იგი ტოვებს პოლიტიკას იმ იმედით, რომ ოპოზიციის ნაწილი, რომელიც “პოლიტიკური ნების უქონლობით, გამოუცდელობით თუ უხერხემლობით” “ერთი კაცის [სააკაშვილის] მიერ ხელისუფლების ხელში ჩაგდების მოუთოკავ სურვილს” აჰყვა, გააცნობიერებს, რომ მათი პოზიცია უპერსპექტივობაა.
მას იმედი აქვს, რომ “პარტიები საკუთარ თავში იპოვიან ძალას, გაარღვიონ მათსა და ხალხს შორის ხელოვნურად შექმნილი ჯებირები და გათავისუფლდებიან რამდენიმე დესტრუქციული პოლიტიკოსის [სააკაშვილი] მავნე გავლენისგან”.
ვის უხდის მადლობას ყოფილი პრემიერი
წერილის ბოლოს ივანიშვილმა მადლობა გადაუხადა მათ, ვინც მასთან ერთად შრომობდა ეს წლები.
მადლობა ქართველ ხალხს: “მინდა ქედი მოვიხარო ქართველი ხალხის წინაშე. მე ისინი არასოდეს დამიყვია ჩემს მომხრეებად და მოწინააღმდეგეებად, რადგან მჯერა, რომ ჩვენი სამშობლო გაცილებით დიდი ღირებულებაა, ვიდრე თუნდაც დიამეტრალურად განსხვავებული პოლიტიკური შეხედულებები” – წერს ივანიშვილი.
მადლობა ეკლესიას, “რომელიც ყოველთვის განსაკუთრებულ როლს ასრულებდა საქართველოს ისტორიაში”.
მადლობა პოლიტიკურ გუნდს, თანამოაზრეებსა და თანამებრძოლებს, “ვინც მენდო, ბრძოლაში გამომყვა და დღემდე ერთგულად ემსახურება საქართველოს”.
მადლობა საქართველოს მთავარ სტრატეგიულ მოკავშირეს – ამერიკის შეერთებულ შტატებს, ევროკავშირის ქვეყნებს და “უკლებლივ ყველა ჩვენს მეგობარსა და პარტნიორს, ვინც ურყევად მხარში უდგას ქართულ სახელმწიფოს და ქართველ ხალხს” .
ყოფილმა პრემიერმა ასევე მადლობა გადაუხადა თავის ოჯახს, “რომელმაც მთელი ამ ხნის განმავლობაში გაუგონარი შეურაცხყოფა და ცილისწამება აიტანა, სალი კლდესავით მედგა გვერდში და ერთი წუთითაც არ დაუყენებია ეჭვქვეშ ჩემი არჩევანის სისწორე”.
