ივანიშვილის თქმით, "ფინანსურ შანტაჟში" არა აშშ-სა და ევროკავშირს, არამედ "გლობალურ ომის პარტიას" ადანაშაულებს
ივანიშვილი გლობალური ომის პარტია
“ქართული ოცნების” საპატიო თავმჯდომარე, ბიძინა ივანიშვილი აცხადებს, რომ “ფინანსურ შანტაჟში” არც აშშ-სა და არც ევროკავშირს არ ადანაშაულებს, არამედ ამაში დამნაშავე ე.წ. გლობალურ ომის პარტიაა. ამის შესახებ მის განცხადებაშია ნათქვამი, რომელიც მან აშშ-ის საელჩოს ფეისბუქპოსტის საპასუხოდ გაავრცელა.
საქართველოში აშშ-ს საელჩო “ქართული ოცნების” ლიდერების განცხადებებს “Credit Suisse”-ის საქმესთან დაკავშირებით ილუსტრაციით ეხმაურება და ქართველებს რუკაზე უხსნის, სად უნდა მოიკითხოს ივანიშვილმა მისი მილიონები. როგორც აშშ-ს საელჩო მის მიერ გამოქვეყნებულ პოსტში აღნიშნავს, “ივანიშვილმა იცის, რომ კრედიტ სუისთან დაკავშირებული ფული ბერმუდისა და სინგაპურის სასამართლოს ხელშია და არა – ამერიკის”.
გუშინ, 30 სექტემბერს, თბილისის მერმა, კახა კალაძემ, ჟურნალისტის მიერ დასმულ კითხვას მოსალოდნელი ფინანსური სანქციების შესახებ უპასუხა, რომ “დღევანდელ მსოფლიოში არანაირი სამართლიანობა არ არსებობს”.
კალაძემ ამის მაგალითად ბიძინა ივანიშვილის საქმე მოიყვანა Credit Suisse-თან.
რას ამბობს ბიძინა ივანიშვილი
“პირველ რიგში, უნდა აღინიშნოს, რომ საელჩო ვერ დაასახელებს ვერც პირადად ჩემი და ვერც „ქართული ოცნების“ რომელიმე სხვა ლიდერის განცხადებას, სადაც ჩვენ ფინანსურ შანტაჟში აშშ-ს ან ევროკავშირს ვადანაშაულებთ.
როდესაც საბანკო ანგარიშის ძარცვაზე და ფინანსურ შანტაჟზე ვსაუბრობდით, ყოველთვის ვაკონკრეტებდით, რომ ამ შანტაჟის უკან არა აშშ ან ევროკავშირი, არამედ ის ძალები დგანან, რომლებსაც გლობალურ ომის პარტიად მოვიხსენიებთ”, – ვკითხულობთ განცხადებაში.
როგორც ივანიშვილი ამბობს, ე.წ. გლობალური ომის პარტიას, რომლის არსებობას მხოლოდ ქართული ოცნება და მისი ლიდერები ამტკიცებენ და დღემდე უცნობია, რას წარმოადგენს ის, გავლენა აქვს პოლიტიკოსებსა და ბიუროკრატებზე როგორც აშშ-ში, ისე ევროკავშირში:
სწორედ ეს არის მთავარი მიზეზი, რატომაც ფინანსური შანტაჟის დასრულებამდე, უარს ვაცხადებ ამერიკელ პოლიტიკოსებთან და ბიუროკრატებთან შეხვედრებზე, რადგან გლობალური ომის პარტიის გავლენის ალბათობა თითოეულ მათგანთან მიმართებით ძალზე მაღალია
ივანიშვილის თქმით, თავისი პოზიცია მან ამერიკელ კოლეგებს წერილობითაც აცნობა და საელჩოს მოწოდების შემთხვევაში, მზად არის წერილის შინაარსზე საჯაროდაც ისაუბროს.
“გარდა ამისა, ჩემმა ადვოკატებმა საზოგადოებისთვის არაერთგზის გაასაჯაროვეს დეტალური ინფორმაცია უკრაინაში ომის დაწყების შემდეგ ჩემთვის დაწესებული ფინანსური შეზღუდვების შესახებ და საჭიროების შემთხვევაში, მზად ვარ, ამ ყველაფრის შესახებ ჩემს ადვოკატებს განახლებული ინფორმაციაც გამოვაქვეყნებინო.
იმასაც შეგახსენებთ, რომ აშშ-ში ოლიგარქიული გავლენების, არაფორმალური მმართველობის, „დიფ სთეითისა“ და ომის პარტიის თემა ჩვენ მიერ არ არის წამოწეული და ეს საკითხი ამერიკაში მიმდინარე საპრეზიდენტო კამპანიის ერთ-ერთ მთავარ ხაზად გვევლინება.
ამ თემაზე აქტიურად საუბრობენ თავად საპრეზიდენტო კანდიდატი დონალდ ტრამპი, საპრეზიდენტო პრაიმერიზის კანდიდატები რობერტ კენედი უმცროსი და ვივეკ რამასვამი და სხვები. სწორედ გლობალური ომის პარტიაა ის ძალა, რომელიც ცდილობს, საქართველოს ეროვნული ინტერესების წინააღმდეგ მოქმედებისას, აშშ და ევროკავშირი აიფაროს და მოვლენები ისე წარმოაჩინოს, თითქოს, საქართველოს დაპირისპირება არა მასთან, არამედ აშშ-სთან და ევროკავშირთან აქვს.” – ნათქვამია ივანიშვილის განცხადებაში.
ივანიშვილსა და Credit Suisse-ს შორის დავა
ივანიშვილსა და Credit Suisse-ს შორის დავა ჯერ კიდევ 2011 წელს დაიწყო, როდესაც ივანიშვილი ამ ბანკის კლიენტი იყო კერძო საბანკო მომსახურების სფეროში.
სწორედ პერიოდში ცნობილი გახდა, რომ ბანკის ერთ-ერთი მენეჯერის, პატრის ლესკოდრონის თაღლითობის შესახებ – ლესკორდონი ბანკის კონფიდენციალური ანგარიშიდან ფულს იპარავდა. მათ შორის, ივანიშვილის ანგარიშიდანაც და ასევე რუსი ოლიგარქის, ივანიშვილის ბიზნეს-პარტნიორის, ვიტალი მალკინის ანგარიშიდან.
შვეიცარიის მარეგულირებელმა ფირმამ, Finma-მ გამოაქვეყნა ანგარიში, სადაც იკვეთება, რომ Credit Suisse-მა არაერთი გაფრთხილებისა და საეჭვო გარემოების მიუხედავად, არ მიიღო შესაბამისი ზომები.
ივანიშვილმა Credit Suisse-ს ბრალი დასდო იმაში, რომ მან ვერ შეძლო მისი ინვესტიციების დაცვა. ივანიშვილი ბანკისგან 800 მლნ დოლარს ითხოვდა და აცხადებდა, რომ ეს ის თანხაა, რომელიც მან ბანკის ყოფილი მენეჯერის, პატრის ლესკოდრონის მოქმედებების გამო დაკარგა.
Credit Suisse-ის სატრასტო განყოფილებამ განაცხადა, რომ ივანიშვილის მოთხოვნა გადაჭარბებულია და სასამართლოს მოსთხოვა მისი უარყოფა.
ლესკოდრონი 2018 წელს ის თაღლითობაში გაასამართლეს. სასამართლო პროცესამდე ორი წელი მან წინასწარ პატიმრობაში გაატარა. 2019 წელს გაათავისუფლეს, 2020 წლის ივლისში კი ლესკოდრონმა თავი მოიკლა. მანამდე ლესკადრონმა აღიარა, რომ 2008 წლის ფინანსური კრიზისის დროს, მისი მცდარი საინვესტიციო გადაწყვეტილებების შედეგად დაზარალებული კლიენტების ზარალს იგი ფარულად ფარავდა სხვა კლიენტების ანგარიშებიდან მოპარული თანხებით.
2022 წლის მარტში გამოცემა The Financial Times-მა გაავრცელა ინფორმაცია, რომ ბერმუდის სასამართლოს გადაწყვეტილებით, ბიძინა ივანიშვილმა შვეიცარიულ ბანკს, Credit Suisse-ს, სასამართლო დავა მოუგო და მისგან 500 მლნ დოლარზე მეტი მიიღო (Bloomberg-ი 607 მლნ დოლარს ასახელებს).
Credit Suisse-სთან ივანიშვილის დაპირისპირების მორიგი ეტაპი რუსეთის უკრაინაში შეჭრის შემდეგ დაიწყო. ივანიშვილს Credit Suisse-თან სხვა რამდენიმე სასამართლო დავაც ჰქონდა. ერთი შეეხებოდა შვეიცარიული ბანკის მიერ ოპერაციების შეფერხებას, რის გამოც ივანიშვილს ფინანსური ზარალი მიადგა. გავრცელდა ინფორმაცია, რომ ბანკმა ბიზნესმენის კუთვნილი 2.7 მილიარდი გირვანქა სტერლინგის ოდენობის ანგარიში გაყინა, საფუძვლით, რომ თანხები შესაძლოა, რუსული წარმოშობისა ყოფილიყო.
2022 წლის სექტემბერში ივანიშვილმა სინგაპურში სასამართლოზე განაცხადა, რომ Credit Suisse-მა არ მიმართა შესაბამის ზომებს, რის გამოც ივანიშვილმა 1,27 მილიარდი დოლარი დაკარგა.
2023 წლის თებერვალში Bloomberg-მა გაავრცელა ინფორმაცია, რომ Credit Suisse Group AG -მ მილიარდერ ბიზნესმენ ბიძინა ივანიშვილს ხანგრძლივი სასამართლო დავის ფარგლებში 210 მლნ დოლარი გადაუხადა.
