საქართველოში ისლამური სახელმწიფოს მხარდამჭერის ბრალდებით 6 მოქალაქე დააკავეს

ისლამური სახელმწიფოს მხარდამჭერის ბრალდებით 6 მოქალაქე დააკავეს

სახელმწიფო უსაფრთხოების სამსახურის ცნობით, ტერორისტული ორგანიზაცია ისლამური სახელმწიფო მხარდამჭერის ბრალდებით ქვეყანაში 6 ადამიანი დააკავეს, რომლებიც საქართველოს მოქალაქეები არიან. უწყებაში აღნიშნავენ, რომ კონტრტერორისტული ოპერაცია ერთდროულად ოთხ ადგილზე ჩატარდა.

“კონტრტერორისტული ცენტრის, საქართველოს გენერალური პროკურატურისა და შინაგან საქმეთა სამინისტროს ერთობლივი ღონისძიებების შედეგად მოპოვებული მტკიცებულებებით დადგინდა, რომ აღნიშნულ პიროვნებებს კავშირი ჰქონდათ ტერორისტული ორგანიზაცია ისლამური სახელმწიფოს ერთ-ერთ გავლენიან ლიდერთან და მისი მეთაურობით გეგმავდნენ სხვადასხვა სახის ტერორისტულ აქტივობას რამდენიმე ქვეყანაში.

საგამოძიებო მოქმედებების შედეგად ამოღებულია ტერორისტული ორგანიზაციის სიმბოლიკა, ელექტრონული ინფორმაციის მატარებელი მოწყობილობები, საბრძოლო მასალა, ფეთქებადი ნივთიერებები და გამოძიებისათვის მნიშვნელოვანი სხვადასხვა მტკიცებულება”, – აცხადებენ უწყებაში.

მათივე ინფორმაციით, საქმეზე გამოძიება საქართველოს სისხლის სამართლის კოდექსის 328-ე და 236-ე მუხლებით მიმდინარეობს, რაც გულისხმობს უცხო ქვეყნის ტერორისტულ ორგანიზაციაში გაერთიანებას, ტერორისტულ საქმიანობაში დახმარებას, ცეცხლსასროლი იარაღის, საბრძოლო მასალის და ფეთქებადი ნივთიერების მართლსაწინააღმდეგო შეძენა-შენახვას.

აღსანიშნავია, რომ მიმდინარე წლის 22 აპრილს საქართველოს კონტრტერორისტულმა ცენტრმა ე.წ. ისლამური სახელმწიფოს ერთ-ერთი დაჯგუფების მეთაური, საქართველოს მოქალაქე მალხაზ პაქსაშვილი დააკავა.

როგორც უწყებაში განმარტავენ, მოპოვებული მტკიცებულებებით დადგინდა, რომ აღნიშნულმა პირმა საქართველო 2013 წელს დატოვა, სირიაში გაემგზავრა და ტერორისტულ ორგანიზაცია “ისლამურ სახელმწიფოს” შეუერთდა.

მათივე ცნობით, დაკავებულს მჭიდრო კავშირი ჰქონდა ე.წ. ისლამური სახელმწიფოს მაღალი რანგის სამხედრო მეთაურებთან და ტერორისტული ორგანიზაციის ერთ-ერთი დაჯგუფების, ე.წ. ნაიბის პოზიციას იკავებდა.

● შემოწმებულია: ტერორისტები არ არიან. რეპორტაჟი პანკისის ხეობიდან
● Crisis Group: 2023 წლის სახიფათო კონფლიქტებს შორისაა უკრაინა, სომხეთი-აზერბაიჯანი და ირანი
● ავღანეთი დაეცა. როგორი იქნება ახალი ისლამური ხალიფატი

2014 წელს ისლამური სახელმწიფოს ლიდერმა აბუ ბაქრ ალ-ბაღდადიმ მსოფლიო ჯიჰადი და სახალიფოს დაარსება გამოაცხადა. ისლამური სახელმწიფო აკონტროლებდა ერაყის, სირიისა და ლიბანის ნაწილს, ასევე მცირე ტერიტორიებს ლიბიაში, ნიგერიაში, ავღანეთსა და ჩრდილოეთ აფრიკაში.

2015 წელს რამდენიმე ათეული ახალგაზრდა წავიდა ჩეჩნეთიდან სირიაში საბრძოლველად; პანკისიდანაა ისლამური სახელმწიფოს ერთ-ერთი ოდიოზური ემირი აბუ უმარ ალ-შიშანიც, იგივე თარხან ბათირაშვილი. ამის გამო, ტერორიზმის კერის რეპუტაციამ მტკიცედ დაიმკვიდრა პანკისში სახელი და ეს რეპუტაცია დღემდე რჩება – მიუხედავად იმისა, რომ რამდენიმე წელია ხეობიდან ხალხი თითქმის აღარ ხვდებოდა ტერორისტულ ორგანიზაცია ISIS-თან დაკავშირებულ ისტორიებში.

2017 წლის 12 დეკემბერს, ამერიკის პრეზიდენტმა დონალდ ტრამპმა ქვეყნის სამხედრო ბიუჯეტის ხელმოწერისას განაცხადა, რომ აშშ-მ სირიასა და ერაყში “ისლამური სახელმწიფო” საბოლოოდ დაამარცხა. 

მოგვიანებით პენტაგონმა ასევე განმარტა, რომ სირიასა და ერაყში “ისლამური სახელმწიფოს” 3 ათასამდე წევრია დარჩენილი, რაც დაახლოებით ათჯერ ნაკლებია 2015 წლის მონაცემებზე, როდესაც “ისლამური სახელმწიფო” ვითარდებოდა და ახალ-ახალ ტერიტორიებს იპყრობდა. მათივე ცნობით, მოკლულია 60-70 ათასი ტერორისტი, უფრო მეტი კი თავის სამშობლოში დაბრუნდა.