"შეკრებებზე სახის დაფარვა აიკრძალება" - რა თქვა ირაკლი კობახიძემ ბრიფინგზე
ირაკლი კობახიძის ბრიფინგი
“ქართული ოცნების” პრემიერმინისტრმა ირაკლი კობახიძემ სპეციალურ ბრიფინგზე განაცხადა, რომ შეკრებებზე სახის დაფარვა აიკრძალება და კანონი თვის ბოლომდე ამოქმედდება. მისივე თქმით, მედიაზე თავდასხმა პროვოკაციაა, რისი მიზანიც ვითარების ხელოვნურად დაძაბვაა.
რუსთაველის გამზირზე 7-8 დეკემბრის ღამეს წყლის ჭავლისა და ცრემლსადენი გაზის ნაცვლად მშვიდობიან დემონსტრანტებს მოძალადე ჯგუფები, ე.წ. “ტიტუშკები” არბევდნენ.
შავებში ჩაცმული ნიღბიანი პირები აქციის მშვიდობიან მონაწილეებსა და ჟურნალისტებს თავს ესხმოდნენ, დაარბიეს ოპოზიციური პარტიის ოფისი. რამდენიმე ასეთ შემთხვევას პოლიციაც შეესწრო, თუმცა მათ რეაგირება არ ჰქონიათ და თვითმხილველები ამბობენ, რომ პოლიციამ მშვიდობიანად გააცილა მოძალადეები.
რა თქვა ირაკლი კობახიძემ
“შეკრებებზე სახის დაფარვა აიკრძალება, კანონი თვის ბოლომდე ამოქმედდება”
“ცოტა რთულია ამ ვითარებაში რეაგირება, ნიღბებით დადის ყველა, ვისაც არ ეზარება და ადგილი აქვს ასეთი ტიპის ძალადობას.
გამომდინარე იქიდან, რომ არის ძალიან ბევრი ნიღბიანი, შსს-ს უჭირს რეაგირება ასეთ ფაქტებთან დაკავშირებით, ვეღარ ხდება იმის გარჩევა, ვინ არის მომიტინგე, ვინ არ არის მომიტინგე და ა.შ.
ამასთან დაკავშირებით, გუშინ ერთგვარი ანონსი გაკეთდა და მინდა, კიდევ ერთხელ განვაცხადო – ჩვენ მივიღებთ კანონს, რომლითაც აიკრძალება შეკრებაზე შეკრების მონაწილეების მიერ, მათ შორის კონტრშეკრების მონაწილეების მიერ, სხვადასხვა საშუალებით სახის დაფარვა. ეს არის ძალიან მნიშვნელოვანი კანონი, რომელიც ხელს შეუწყობს პრევენციას ძალადობის წარმართვის დროს.
ასეთი კანონები მოქმედებს ევროკავშირის არაერთ წევრ ქვეყანაში და მნიშვნელოვანია, ჩვენთანაც ძალადობის პრევენციისთვის ასეთი კანონის მიღება
ჩვენ ტექნიკურად მოვახერხებთ ისე ყველაფრის ორგანიზებას, რომ უკვე მომავალი კვირის ბოლომდე იქნეს მიღებული შესაბამისი კანონი, ისე, რომ ეს კანონი თვის ბოლომდე სრულად ამოქმედდება.”
“მედიაზე თავდასხმა პროვოკაციაა, რისი მიზანიც ვითარების ხელოვნურად დაძაბვაა”
“პირველ რიგში, მინდა გავაკეთო განცხადება მედიის წარმომადგენლებზე თავდასხმასთან დაკავშირებით.
ერთმნიშვნელოვნად, ეს არის პროვოკაცია, რომლის ერთადერთი მიზანიც ვითარების ხელოვნურად დაძაბვა შეიძლება იყოს.
ამ დანაშაულის გამოძიება არის დაწყებული და მე დიდი იმედი მაქვს, რომ დამნაშავე რაც შეიძლება მალე გამოვლინდება. მოგვიანებით შინაგან საქმეთა სამინისტრო გამართავს ბრიფინგს, სადაც დეტალური ინფორმაცია იქნება წარმოდგენილი გამოძიების მიმდინარეობის თაობაზე.
განსაკუთრებით შემაშფოთებელია თავდასხმა ოპერატორზე, რომელსაც თავდასხმის შედეგად ფიზიკური დაზიანება მიადგა. ასეთი ფაქტები ხელს აძლევს მხოლოდ რადიკალებს, რომელთა მთავარი მიზანი არის ვითარების ხელოვნურად დაძაბვა ჩვენს ქვეყანაში და დედაქალაქში.”
“რუსთაველის გამზირზე ევროპელები სწორედ პოლიციელები არიან“
“განსაკუთრებით მნიშვნელოვანია გმირი პოლიციელების წინააღმდეგ მიმართული უხეში და სისტემური ძალადობის და მათი შეურაცხყოფის დაგმობა. მე მინდა შეგახსენოთ, რომ თუ ვინმე ამტკიცებს ევროპელობას რუსთაველის გამზირზე, ყველაზე მეტად ეს სწორედ გმირი პოლიციელები არიან. მე მინდა მათ მადლობა გადავუხადო მოთმინებისთვის.”
“თუ სახედაფარული მიდიხარ შეკრებაზე, ე.ი. წინასწარვე ემზადები ძალადობისთვის”
“იმისთვის გამოიყენება წყლის ჭავლი, აირი და ა.შ. რომ შეკრება დაიშალოს. ამისთვის გამოიყენება.
არავინ არ მოკვდება. გერმანიაში მაგალითად აკრძალულია სახის დაფარვა შეკრების მონაწილეების მიერ. რატომ? იმიტომ, რომ აპრიორი, როდესაც მიდიხარ ნიღბებით შეკრებაზე, ერთი, რომ სერიოზულ რისკებს აჩენ ამით, რადგან ძალიან უჭირს მერე შინაგან საქმეთა სამინისტროს რეაგირება და მოძალადეების იფენტიფიცირება, ანუ აპრიორი ითვლება ის, რომ თუ სახე გაქვს დაფარული და ისე მიდიხარ შეკრებაზე, ე.ი, წინასწარვე ემზადები ძალადობისთვის, ამიტომ არ არის დაშვებული…
თუ არ დაესხმებით თავს პარლამენტის შენობას, თუ არ დაესხმებით თავს შსს-ს, არაფერი არ იქნება, შეიკრიბებით მშვიდობიანად და შესაბამისად, ამ კანონს ექნება პრევენციული ეფექტი და არა რეპრესიული. ვეღარ გაბედავთ ძალადობას, როცა ეს კანონი იმოქმედებს.”
