საპარლამენტო ოპოზიცია ირაკლი ღარიბაშვილის ქონებასთან დაკავშირებით საგამოძიებო კომისიის შექმნას ითხოვს

ირაკლი ღარიბაშვილის კორუფცია

ქართული საპარლამენტო ოპოზიცია „ქართული ოცნების“ თავმჯდომარის და ყოფილი პრემიერმინისტრის, ირაკლი ღარიბაშვილის ქონებასთან დაკავშირებით საგამოძიებო კომისიის შექმნას ითხოვს. ამის შესახებ განცხადება დეპუტატებმა პარლამენტში გამართულ პრესკონფერენციაზე გააკეთეს.

ოპოზიციონერი დეპუტატის, თამარ კორძაიას თქმით, „ქართული ოცნების“ დეპუტატები დღეს ევროპის უსაფრთხოებისა და პოლიტიკის კომიტეტის ელჩებს ხვდებიან და ოპოზიცია სწორედ დღეს მოითხოვს საქართველოს პარლამენტში შეიქმნას საგამოძიებო კომისია ირაკლი ღარიბაშვილის ქონებასთან დაკავშირებით. მისივე განმარტებით, მათ საკმარისი ხელმოწერები უკვე შეგროვებული აქვთ.

“ჩვენ გვინდა მათ სწორედ ამ ელჩებს უპასუხონ, მზად არის თუ არა „ქართული ოცნება“ კორუფციის პრობლემებზე სასაუბროდ, რომლის აღმოფხვრის ვალდებულება ჩვენ ევროპის წინაშე გვაქვს აღებული. შეხვედრა დაგეგმილია უახლოეს საათებში. გვინდა, რომ უპასუხონ, მზად არიან თუ არა ოპოზიციის ინიციატივაზე სასაუბროდ, რათა დავიწყოთ ღარიბაშვილის ქონებასთან დაკავშირებით საკითხის განხილვა და საგამოძიებო კომისია შეიქმნას – დავაინიცირებთ და ჯერი არის „ქართულ ოცნებაზე“, რამდენად შეუძლიათ რეალურ პრობლემებს დაუთმონ თავიანთი დრო და საპარლამენტო სივრცე“, – განაცხადა კორძაიამ.

პარტია „მოქალაქეების“ ლიდერმა, ალეკო ელისაშვილმა დღევანდელ ბრიფინგზე აღნიშნა, რომ საჭიროა ყველაფერი გამჭვირვალე იყოს, რათა საზოგადოებამ გაიგოს, ირაკლი ღარიბაშვილი და მისი ოჯახი მართლა “მექრთამეები” არიან თუ არა. 

“გამჭვირვალობა, გამჭვირვალობა და მხოლოდ გამჭვირვალობა გვინდა ჩვენ. ყველგან უნდა იყოს ხარჯები გამჭვირვალე. არასამთავრობო სექტორში არის ზედმიწევნით გამჭვირვალე, როგორც არ უნდა თავს იტყუებდეს ახლა „ქართული ოცნება“, გაუმჭვირვალე თუ რამე არის, ეს არის მთავრობა და მთავრობის წევრების შემოსავლები.

ჩვენ არ გვინდა მხოლოდ ჭორებს, მითქმა-მოთქმას და მხოლოდ ვარაუდებს ვეყრდნობოდეთ, ჩვენ ვართ საქართველოს პარლამენტის წევრები და ახლა ვაინიცირებთ საგამოძიებო კომისიას ირაკლი ღარიბაშვილის და მისი ოჯახის შესაძლო დაუსაბუთებელ ქონებასთან დაკავშირებით.” – თქვა ელისაშვილმა.

● “ივანიშვილმა თამაშიდან გაიყვანა ღარიბაშვილი, მაგრამ პოლიტიკურ სიტუაციას არ მოწყვიტა” – რას ფიქრობენ ექსპერტები პრემიერის გადადგომაზე
● პენსიონერი მშობლების მორიგი საჩუქარი საქართველოს პრემიერს – 180 ათასი ლარი. ღარიბაშვილმა დეკლარაცია შეავსო
● ყოფილი პრემიერმინისტრი: მამაჩემი შეიძლება პენსიონერია, მაგრამ აქვს მრავალმილიონიანი ბიზნესსაქმიანობა

ბოლო სკანდალი, რომელიც ირაკლი ღარიბაშვილის ოჯახის კორუფციას ეხება, ყოფილი პრემიერის განცხადებას მოჰყვა, როდესაც ღარიბაშვილმა განაცხადა, რომ მამამისი შეიძლება პენსიონერია, თუმცა ოფიციალურ საკუთრებაში აქვს მრავალმილიონიანი ბიზნესსაქმიანობა და ქონება. 

მანამდე ირაკლი ღარიბაშვილმა ბოლო დეკლარაციაში მიუთითა, რომ მშობლებისგან საჩუქრად 2023 წელს 150 000 ლარი მიიღო.

ექსპრემიერის მამა, ტარიელ ღარიბაშვილი უმუშევარი პენსიონერია, რომელიც ოფიციალურად არანაირ ბიზნესს არ ფლობს, თუმცა მშობლიურ მუნიციპალიტეტში – დედოფლისწყაროში აქვს უზარმაზარი სახლი და ჯამში 4.5 ჰექტარი მიწის ფართობი.

რეესტრიდანვე ირკვევა, რომ ტარიელ ღარიბაშვილმა მიწების შესყიდვა 2014 წლიდან დაიწყო, მას შემდეგ, რაც მისი შვილი პრემიერი გახდა. მანამდე, 2012 წლამდე, ღარიბაშვილის მამა ერთ-ერთი სოფლის რწმუნებულის პოზიციას იკავებდა და მხოლოდ საგვარეულო სახლსა და მიწის ნაკვეთს ფლობდა, ნათქვამია ტელეკომპანია “მთავარის” გამოძიებაში.

ტარიელ ღარიბაშვილი შვილს დიდი თანხების გარდა სხვა ტიპის საჩუქრებითაც ანებივრებს. ყოველ შემთხვევაში, ასეთია ოფიციალური ვერსია. სექტემბრის დასაწყისში ჟურნალისტებმა გაარკვიეს, რომ პრემიერმა პირადი მიზნებისთვის გამოიყენა სამთავრობო ბორტი – საკუთარი ოჯახის ტრანსპორტირებისთვის.

ირაკლი ღარიბაშვილის მგზავრობა აგვისტოში, სახელმწიფოს კუთვნილი თვითმფრინავით თბილისიდან მიუნხენამდე და მიუნხენიდან თბილისამდე 34 ათასი ევრო დაჯდა. ოფიციალური ვერსიით, აღნიშნული თანხა პრემიერ-მინისტრის მამამ, ტარიელ ღარიბაშვილმა გადაიხადა.

მაშინ პრემიერმა ჟურნალისტებთან განმარტა, რომ ის შეძლებული ოჯახიდან იყო, რომელსაც არასოდეს უჭირდა.

თუმცა, ინტერნეტში იძებნება ტარიელ ღარიბაშვილის 2013 წლის ინტერვიუ, რომელიც მან საკუთარი შვილის გაპრემიერების შემდეგ ambebi.ge-ს მისცა. ამ ინტერვიუში ტარიელ ღარიბაშვილი იხსენებდა, რომ შვილი სასწავლებლად საფრანგეთში მეგობრების შეგროვებული ფულით გაუშვა, საფრანგეთში მყოფი ირაკლი ღარიბაშვილი კი მიმტანად მუშაობისას ოჯახს ფინანსურად ეხმარებოდა.