ინფექციურმა საავადმყოფომ აივ/შიდსით და კოვიდ-ინფიცირებული პაციენტების მიღება შეაჩერა

თბილისის ინფექციურმა საავადმყოფომ, რომელიც საქართველოში ერთ-ერთი მთავარი კოვიდმიმღები კლინიკაა, „სასიცოცხლოდ მნიშვნელოვანი“ პირობების არარსებობის გამო 20 აგვისტოდან აივ/შიდსით და კოვიდ-ინფიცირებული ახალი პაციენტების სტაციონარში მიღება შეწყვიტა. 

საავადმყოფოში აღარ მიიღებენ არცერთ ისეთ პაციენტს, რომლის ჯანმრთელობის მდგომარეობაც კლინიკაში, ექიმების დაკვირვების ქვეშ ყოფნას და იქ მკურნალობას მოითხოვს. 

ცენტრი ისევ აგრძელებს აივ/შიდსით ინფიცირებული პაციენტების ამბულატორიულ მომსახურებას. 

„ამ კატეგორიის პაციენტების მომსახურების შეწყვეტა გამოიწვევდა ძალიან დიდ რყევებს, გაცილებით მეტს, ვიდრე სტაციონარული ავადმყოფების მიღების შეწყვეტა,“ – განმარტავს თბილისის ინფექციური საავადმყოფოს დირექტორი, თენგიზ ცერცვაძე. 

თბილისის ინფექციური საავადმყოფოს დირექტორის გადაწყვეტილება და განცხადება სრული მოულოდნელობა იყო საქართველოს ხელისუფლებისთვის. 

თენგიზ ცერცვაძე ახლა ერთ-ერთი ყველაზე პოპულარული ადამიანია ქვეყანაში – მას კარგად იცნობენ საქართველოში და მის ფარგლებს გარეთაც. 

ის მეცნიერთა იმ სამეულს მიეკუთვნება – დაავადებათა კონტროლის ეროვნული ცენტრის ხელმძღვანელთან, ამირან გამყრელიძესთან და მის მოადგილესთან, პაატა იმნაძესთან ერთად – რომელთაც პანდემიაზე წარმატებული რეაგირების მართვისთვის ხალხმა “სამი მუშკეტერი” შეარქვა. მათი წარმატების შესახებ წერდა არაერთი ცნობილი საერთაშორისო გამოცემა.

ის იყო (და დღემდე არის) ის ადამიანი, რომლის აზრსაც საქართველოს ხელისუფლება ითვალისწინებს. მას პატივს სცემენ და იწვევენ მნიშვნელოვან საჯარო ღონისძიებებზე – ის ესწრებოდა მმართველი პარტიის, “ქართული ოცნების” მაჟორიტარი დეპუტატობის კანდიდატების წარდგენას, რომელიც 20 ივლისს, კოჯორში გაიმართა. 

თავის მხრივ, არც თენგიზ ცერცვაძე გამოირჩეოდა არასოდეს საქართველოს მთავრობის კრიტიკით და მისდამი პრეტენზიებით. 

რა მოხდა ინფექციურ საავადმყოფოში?

თბილისის ინფექციური საავადმყოფო წლებია უკვე ამორტიზებულ შენობაში ფუნქციონირებს. შენობის განახლების საჭიროებაზე ცენტრის დირექტორი უკვე დიდი ხანია საუბრობს.  

ცენტრს რემონტის ჩატარების უფლებას კომპანია “ავერსი” არ აძლევს – სწორედ ეს კომპანიაა 2012 წლიდან იმ შენობის მფლობელი, სადაც საავადმყოფოა მოწყობილი. 

ინფექციური საავადმყოფოს შენობა ბოლოს დაახლოებით 2 წლის წინ გაარემონტეს, თუმცა კორპუსში, სადაც ბოქსირებული განყოფილებებია მოწყობილი, რემონტის ჩატარება ვერ მოესწრო. წვიმის დროს საავადმყოფოში წყალი ჩადის. ბოქსირებულ პალატებში არ არის ვენტილაცია, რაც ინფექციური საავადმყოფოს გამართული და უსაფრთხო მუშაობისთვის ერთ-ერთი მთავარი პირობაა. მოუწყობელია ტუალეტები. ავადმყოფებს არ აქვთ შხაპის მიღების საშუალება. შენობას არა აქვს საკმარისი ფართი – ხშირად ერთ ოთახში რამდენიმე ექიმი იღებს ერთდროულად პაციენტებს, რის გამოც აივ/შიდსის მქონე ადამიანების ანონიმურად დარჩენა ვერ ხერხდება. 

2020 წლის ივლისში, პრემიერ-მინისტრმა გიორგი გახარიამ განაცხადა, რომ ინფექციური საავადმყოფოს ახალი შენობის შეძენისთვის ან ახალი შენობის აშენებისთვის მთავრობა 40 მლნ ლარს გამოყოფს. 

ინფექციური საავადმყოფოსთვის ახალი შენობა მთავრობამ დიღომში, ლუბლიანას 21 ნომერში უკვე შეიძინა. მის გამართვას და გარემონტებას, ცერცვაძის თქმით, 1 წელზე მეტი დრო დასჭირდება. ახლა ის ითხოვს, რომ იმ ერთი წლის განმავლობაში, სანამ საავადმყოფო ძველ შენობაში დარჩება, კლინიკას იქ ნორმალური ფუნქციონირებისთვის საჭირო პირობები შეუქმნან. 

“რომ არაფერი ვთქვათ უკიდურესად ცუდ, პაციენტისთვის მიუღებელ კონდიციებზე, რა მდგომარეობაშიც არის კლინიკის ინფრასტრუქტურა, პალატები, დერეფნები, ტუალეტები და სხვა, ესეც არ არის ყველაზე მნიშვნელოვანი. მნიშვნელოვანია, გამართული იყოს სავალდებულო ვენტილაცია, ჟანგაბდის მიწოდების სისტემა, კომპიუტერული ტომოგრაფიის – რომელიც უკვე წელიწადნახევარია შეძენილი გვაქვს, დასაწყობებულია და ფუჭდება – განთავსებისთვის შესაბამისი ოთახის მომზადება. ეს ყველაფერი არის არა რაღაც ფუფუნება, არამედ სასიცოცხლოდ მნიშვნელოვანი, გადაუდებელი სამუშაოები, რომელიც ცენტრს დღესვე სჭირდება,” – ამბობს ცერცვაძე. 

მისი თქმით, გადაუდებელი და სასიცოცხლოდ აუცილებელი სამუშაოების შესრულებისთვის 300 000 ლარი საჭირო. ინფექციურმა საავადმყოფომ ამ თანხის გამოყოფის მიზნით ჯანდაცვის სამინისტროს რამდენიმე თვის წინაც მიმართა, თუმცა, იმ მიზეზით, რომ ჯანდაცვის სამინისტროს 2020 წლის ბიუჯეტში ინფექციური საავადმყოფოს რემონტისთვის თანხა გათვალისწინებული არ არის, სამინისტროსგან უარი მიიღო. 

დივიდენდი

თენგიზ ცერცვაძე ამბობს, რომ მინისტრმა მას სარემონტო სამუშაოების შესრულებისთვის დივიდენდის გამოყენება შესთავაზა. ამას არც ჯანდაცვის მინისტრი, ეკატერინე ტიკარაძე უარყოფს. 

“ჩვენ ვართ ბატონი თენგიზის უწყების პროგრამის შემსყიდველები. ის არის შპს, რომელიც ექვემდებარება ეკონომიკის სამინისტროს. ყველა სამინისტროს აქვს მზაობა გამოხატული, რომ მან შეძლოს და განკარგოს საკუთარი დივიდენდი იმ მიზნებისთვის, რაც მას დაუყოვნებლივ ესაჭიროება და ამასთან დაკავშირებით მას არც ჯანდაცვის და არც ეკონომიკის სამინისტროსგან შეფერხება არ ჰქონია“, – ამბობს მინისტრი.

 ცერცვაძე ამბობს, რომ მინისტრი ცრუობს – იმისთვის, რომ დაწესებულებამ დივიდენდის გამოყენების უფლება მიიღოს, საჭიროა ფინანსთა სამინისტროს სპეციალური კომიტეტის და ეკონომიკის სამინისტროს სპეციალური გადაწყვეტილება. 

მინისტრი ინფექციური საავადმყოფოს ხელმძღვანელობას შეპირდა, რომ შუამდგომლობას გაუწევდა ეკონომიკისა და ფინანსთა სამინისტროებთან, რათა დივიდენდის გამოყენების უფლება მიეღოთ, თუმცა, საავადმყოფომ არაერთი წერილობითი მოთხოვნის მიუხედავად, ნებართვა მაინც ვერ მიიღო. 

რა ელით პაციენტებს?

ჯანდაცვის მინისტრი, ეკატერინე ტიკარაძე ამბობს, რომ კორონავირუსით დაინფიცირებული პაციენტები სხვა კლინიკებში გადანაწილდებიან.

რაც შეეხება აივ ინფიცირებულებს, ტიკარაძის თქმით, ინფექციურის ხელმძღვანელობას საკუთარი გადაწყვეტილების თაობაზე სამინისტროსთვის 2 თვით ადრე უნდა ეცნობებინა.  

ახლა ის ინფექციურ საავადმყოფოს დაჯარიმებით ემუქრება. 

„რაც შეეხება აივ ინფექციას – კლინიკა, რომელიც ტოვებს ამ პროგრამას, ვალდებულია, სოციალურ სააგენტოს მიმართოს წერილობით 2 თვით ადრე, რომ ტოვებს პროგრამას, რაც ბატონ თენგიზს არ გაუკეთებია,“ – აცხადებს მინისტრი და დასძენს, რომ  სხვა შემთხვევაში, თუ კლინიკა ტოვებს პროგრამას, მას ჯარიმის გადახდა მოუწევს. ჯარიმა კი წინა წელს შესრულებული სამუშაოების ღირებულების 10% იქნება. 

აივ/შიდსი – ეპიდსიტუაცია საქართველოში

შიდსის ცენტრში ამ დროისთვის 8376 აივ ინფიცირებული ადამიანია რეგისტრირებული. მათგან 6252 მამაკაცია, ხოლო 2124 – ქალი. აივ-ინფიცირებულთა უმრავლესობა 29-დან 40 წლამდე ასაკისაა. შიდსი 4340 პაციენტს განუვითარდა, 1705 გარდაიცვალა.

აივ მკურნალობას იტარებს 5220 ადამიანი, აქედან  590 აფხაზეთიდანაა. მათ შორის 38 ბავშვია, აქედან 8 აფხაზეთიდან.

აივ/შიდსით დაავადებულთა მკურნალობას სახელმწიფო აფინანსებს. სად გადანაწილდებიან ის პაციენტები, რომლებსაც ინფექციური საავადმყოფოს შიდსის ცენტრი არ მიიღებს, ჯერჯერობით, უცნობია.