ცხინვალის იზოლატორში 28 წლის ახალგაზრდა, სავარაუდოდ, წამებით მოკლეს
28 წლის ინალ ჯაბიევი ოსი სამართალდამცავების მიერ დაკავების შემდეგ, სავარაუდოდ, წამების შედეგად გარდაიცვალა. იგი 2020 წლის 18 აგვისტოს შს მინისტრ იგორ ნანიევზე თავდასხმაში მონაწილეობისთვის დააკავეს. მაშინ მინისტრის მანქანის მიმართულებით სროლის შედეგად არავინ დაშავებულა.
ე.წ. ხელისუფლებას წამების ვერსია ჯერ არ დაუდასტურებია, თუმცა მინისტრი თანამდებობიდან უკვე გაათავისუფლეს. პრეზიდენტმა კი პირობა დადო, რომ გამოძიებას პირადად გააკონტროლებს.
თავდასხმის საქმეზე ჯამში ასამდე ადამიანი დააკავეს, მათ შორის ინალ ჯაბიევი და მისი ტყუპისცალი ძმა აცამაზი, რომელიც ახლაც დაკავებულია.
ქალაქის საავადმყოფოში, სადაც ჯაბიევი გადაიყვანეს, მისი ახლობლები, მეზობლები და მეგობრები შეიკრიბნენ. ცხედარი ნათესავებს არ გადასცეს, წამების და სისხლჩაქცევების კვალის ამსახველი ფოტოები კი სოციალურ ქსელებში გამოქვეყნდა.
ინალ ჯაბიევს სამი შვილი დარჩა.
ფეისბუქზე ოპოზიციური ჯგუფების ადმინისტრატორებმა მოუწოდეს მოსახლეობას თეატრალურ მოედანზე შეიკრიბონ და ანატოლი ბიბილოვის მთავრობის გადადგომა მოითხოვონ. საღამოსთვის იქ რამდემეინე ათასი ადამიანი შეიკრიბა.
შს მინისტრის, იგორ ნანიევის საქმიანობა ცხინვალში საზოგადოების აღშფოთების მიზეზი არაერთხელ გამხდარა. ბევრი საუბრობდა, რომ მისი მანქანის მისამართით სროლა იყო შურისძიება პატიმრების მიმართ ძალადობის გამო.
2020 წლის ივნისის ცხინვალის ციხეში აღმაშფოთებელი ინციდენტი მოხდა – მორიგი დარბევის შემდეგ, დაახლოებით 20 პატიმარმა პროტესტის ნიშნად აგრესიული მოპყრობის წინააღმდეგ ვენები გადაიჭრა. მაშინ არავინ დაღუპულა.
რამდენიმე დღის შემდეგ, როდესაც პარლამენტი მომხდარის განსახილველად საგანგებო სხდომაზე შეიკრიბა, შენობაში 200-მდე ძალოვანი, მათ შორის შეიარაღებული და ეკიპირებული სპეცრაზმელები გამოჩნდა.
ოპოზიციონერმა დეპუტატებმა, რომლებსაც საზოგადოების დიდი ნაწილი უჭერდა მხარს, განაცხადეს, რომ ხელისუფლება ძალოვნებს იყენებდა, რათა ისინი აიძულოს, უარი თქვან ადგილობრივ საპყრობილეში პატიმართა მიმართ უკანონო ძალადობის მრავალი შემთხვევის გამოძიებაზე.
მაშინ ანატოლი ბიბილოვმა უარი თქვა მინისტრ ნანიევის გადაყენებაზე. თუმცა, ამჯერად ბიბილოვი ხალხთან გამოვიდა და განაცხადა, რომ მინისტრი გადააყენა.
პრეზიდენტმა აღნიშნა, რომ აღძრულია სისხლის სამართლის საქმე, მიმდინარეობს გამოძიება და ამ შემთხვევაზე პასუხისმგებელი ყველა პირი დაისჯება.
”ეს საქმე ბოლომდე იქნება მიყვანილი, დამნაშავეები დაისჯებიან, მე ამას ჩემი პირადი კონტროლზე ავიყვან”, – თქვა ბიბილოვმა.
საქმის მასალები რუსეთის ქალაქ როსტოვში ექსპერტიზაზე გადაეგზავნა – “ისე, რომ მის საიმედოობაში ეჭვი არავინ შეიტანოს და ვერავინ მოახდინოს ზეწოლა გამოძიებაზე”, – თქვა პრეზიდენტმა.
ცენტრალურ მოედანზე, მომიტინგეებს შორის არიან დეპუტატები და სხვადასხვა უწყებების ხელმძღვანელები. შეკრებილები მომხდარის გამოძიებას, მთავრობის მთელი შემადგენლობის გადადგომას და პარლამენტის საგანგებო სესიის მოწვევას ითხოვდა.
გენერალურმა პროკურორმა ურუზმაგ ძაგაევმა განაცხადა, რომ დაპატიმრებული ჯაბიევი სხეულის დაზიანებით საავადმყოფოში უგონო მდგომარეობაში გადაიყვანეს და ის ისე გარდაიცვალა, რომ გონზე არ მოსულა.
პროკურორის თქმით, “დასკვნების შესახებ, სამედიცინო გამოკვლევის შედეგების გათვალისწინებით, უახლოეს მომავალში გახდება ცნობილი”.
28 აგვისტოს საღამოს ცხინვალში პარლამენტი რიგგარეშე სხდომაზე შეიკრიბა.
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
