კომენტარი: პროევროპელი ოპოზიციური ამომრჩევლების 55% მხარს უჭერს ადგილობრივ არჩევნებში ოპოზიციის მონაწილეობას
იაგო კაჭკაჭიშვილის კომენტარი
სოციოლოგი და “სოციალური კვლევისა და ანალიზის ინსტიტუტის” (ISSA) დირექტორი იაგო კაჭკაჭიშვილი ეხმაურება მათ მიერ ჩატარებულ ბოლო კვლევას და ამბობს, რომ პროევროპელი ოპოზიციური ამომრჩევლების 55% მხარს უჭერს ადგილობრივ არჩევნებში ოპოზიციის მონაწილეობას.
სოციალური კვლევისა და ანალიზის ინსტიტუტის (ISSA) მიერ ჩატარებული კვლევის მიხედვით, კითხვაზე, “ოპოზიციურმა პარტიებმა უნდა მიიღონ თუ არა მონაწილეობა 2025 წლის ოქტომბრის თვითმმართველობის არჩევნებში?”, 54.5% მიიჩნევს, რომ უნდა მიიღონ მონაწილეობა, 22.3% არ უნდა მიიღონ, 23.2% – არ ვიცი/უარი პასუხზე.
იაგო კაჭკაჭიშვილი: “აჟიოტაჟი გამოიწვია და ამიტომ შევეცდები მარტივად და შეძლებისდაგვარად მოკლედ დავწერო:
ამომრჩევლების უმრავლესობა (54%) მხარს უჭერს, რომ ოპოზიციურმა პარტიებმა მონაწილეობა მიიღონ ადგილობრივი თვითმმართველობის არჩევნებში. ეს გამოკითხვის ერთი ავტონომიური შედეგია.
თუმცა, შემდეგ, როდესაც რესპონდენტებს ალტერნატივას უყენებენ, ადგილობრივი არჩევნები ჩატარდეს ახალ საპარლამენტო არჩევნებთან ერთად, თუ ამის გარეშეც, ერთი ნაწილი ირჩევს ადგილობრივი არჩევნების ჩატარებას ახალ საპარლამენტო არჩევნებთან ერთად, ხოლო მეორე ნაწილი – ადგილობრივი არჩევნების ჩატარებას საპარლამენტო არჩევნების გარეშეც.
ყველა ეს მონაცემი შავით თეთრზე იყო ჩართული საპრეზენტაციო ფაილში, რომელიც პრეზენტაციაზეც ვაჩვენეთ და მედიაშიც გავრცელდა.
ზოგიერთი დაინტერესდა, რა ხდება ამ თვალსაზრისით პროევროპული ოპოზიციის ამომრჩევლებში. ეს შედეგიც ჩართული იყო საპრეზენტაციო ფაილში: პროევროპელი ოპოზიციური ამომრჩევლების 55% მხარს უჭერს ადგილობრივ არჩევნებში ოპოზიციის მონაწილეობას.
ის, რაც არ ყოფილა საპრეზენტაციო ფაილში, ეს არის ე.წ. ჯვარედინი მონაცემი: პროევროპელი ამომრჩევლების იმ ნაწილში (55%), ვინც მხარს უჭერს ადგილობრივ არჩევნებში ოპოზიციის მონაწილეობას, უმრავლესობა (54%) ემხრობა იმას, რომ ადგილობრივი არჩევნები ჩატარდეს ახალ საპარლამენტო არჩევნებთან ერთად.
არის ეს მნიშვნელოვანი შედეგი? რა თქმა უნდა!
დამეთანხმებით, ყველა შედეგს პრეზენტაციაზე ვერ გამოიტან. დაისვა შეკითხვა? გაიცა პასუხიც!”
