სომხეთში კორონავირუსით ინფიცირებულთა რიცხვი ზრდას აგრძელებს, ისინი უკვე 28 არიან

განახლება

22:15

კორონავირუსი სომხეთის კიდევ ორ მოქალაქეს დაუდასტურდა. ზუსტდება  მათი საკონტაქტო წრე, რათა სწრაფად მოხდეს აღნიშნული პირების იზოლირება. ამ მომენტისთვის, ქვეყანაში ინფიცირებულთა რაოდენობამ 28-ს მიაღწია.

ამავდროულად, ცნობილი გახდა, რომ კორონავირუსის მქონე პირველი პაციენტი, რომელიც სომხეთში 1 მარტს გამოავლინეს, უკვე ჯანმრთელია – განმეორებითმა ტესტმაც უარყოფითი პასუხი აჩვენა. მას უკვე შეუძლია სახლში წასვლა.

20:30

სომხეთში, კორონავირუსი კიდევ სამ ადამიანს დაუდასტურდა, მანამდე, დღის პირველ ნახევარში, კიდევ სამი შემთხვევის შესახებ გავრცელდა ინფორმაცია. ასე რომ, ამ დროისთვის, ქვეყანაში ინფიცირებულთა რაოდენობა 26-ს შეადგენს.

დღის პირველ ნახევარში გამოვლენილი შემთხვევებიდან ხუთი უკვე იზოლირებული იყო, რადგან მათ კონტაქტი ჰქონდათ ქალთან, რომელსაც, რამდენიმე დღის წინ გამოუვლინდა ვირუსი.

„მეექვსე შემთხვევა ქალაქ მეღრში დაუფიქსირდა ჩვენ მოქალაქეს, რომელიც ცოტა ხნის წინ დაბრუნდა იტალიიდან“, – დაწერა Facebook-ის საკუთარ გვერდზე, სომხეთის ჯანდაცვის მინისტრმა, არსენ ტოროსიანმა.  

ახლა მეღრის მცხოვრების საკონტაქტო წრე ზუსტდება. ყველას, ვისაც მასთან ჰქონდა ურთიერთობა, იზოლირებაში მოაქცევენ.

18:00

15 მარტს, სომხეთში, კორონავირუსით ინფიცირებულთა რაოდენობა 23-მდე გაიზარდა.

სამივე, ვისაც ახლა დაავადება დაუდასტურდა, იმ ადამიანთა შორის იყვნენ, რომელთაც კონტაქტი ჰქონდათ იტალიიდან ვირუსით ჩამოსულ ქალთან და ისინი უკვე იზოლირებულები იყვნენ.

საქმე ისაა, რომ თავად ეს ქალი, მიუხედავად ტემპერატურისა და ავადმყოფობის სხვა სიმპტომებისა, იზოლირებული არ იყო. 10 დღის განმავლობაში, ვირუსის გამოვლენამდე, ის მთელ რიგ ღონისძიებებს დაესწრო – მათ შორის, ნიშნობას. რამდენიმე ათეული ადამიანი, რომლებიც ამ საზეიმო ღონისძიებაზე იმყოფებოდნენ, კარანტინში გადაიყვანეს, რამდენიმე კი დაინფიცირებული აღმოჩნდა.

ინფიცირებულთა შორის, რომელთა შესახებაც 14 მარტს გახდა ცნობილი, ერთი სკოლის მოსწავლეა. ის უკვე საავადმყოფოში მკურნალობს, მისი თანაკლასელები და მასწავლებლები კი, რომლებთანაც კონტაქტი ჰქონდა – იზოლირებულები არიან.

• სომხეთში კორონავირუსით უკვე 20 ადამიანია ინფიცირებული. თვითიზოლაციაშია პრემიერ-მინისტრი და მისი მეუღლე

• ყველაფერი კორონავირუსის შესახებ

• კორონავირუსი: გამოცხადდა პანდემია. რას ნიშნავს ეს და რას უნდა ველოდოთ

ახალი შემთხვევების დეტალები

ახალი ინფიცირებულების საქმის დეტალების შესახებ, Facebook-ის საკუთარ გვერდზე, სომხეთის ჯანდაცვის მინისტრმა დაწერა.

არსენ ტოროსიანმა აღნიშნა, რომ კიდევ 52 ჩატარებული ტესტის პასუხი მიიღეს, მათგან 49 უარყოფითი, სამი კი დადებითი აღმოჩნდა. ინფიცირების ყველა ბოლო შემთხვევა, რომლებიც 14 და 15 მარტს გამოვლინდა – ისინია, ვისაც იტალიიდან ჩამოსულ ეჩმიაძინის მცხოვრებთან ჰქონდათ კონტაქტი და უკვე იზოლირებულები იყვნენ. აქედან გამომდინარე, მედიკოსები ფიქრობენ, რომ სიტუაცია ქვეყანაში ჯერ კიდევ კონტროლს ექვემდებარება.

მინისტრმა ასევე განაცხადა, რომ 15 მარტის საღამოს, ცნობილი გახდა სომხეთში კორონავირუსით ინფიცირებული პირველი პაციენტის განმეორებითი ტესტის პასუხები. თუკი ის უარყოფითი იქნება, მოქალაქეს საავადმყოფოდან გაწერენ.

„21 პაციენტის ჯანმრთელობის მდგომარეობა, მათ შორის, ბავშვის, დამაკმაყოფილებელია. ორ სხვა პაციენტს პნევმონია აქვს, თუმცა არც მათ სიცოცხლეს ემუქრება საფრთხე“, – იტყობინება არსენ ტოროსიანი.