ჰერჩინსკი ევროკომისიის ანგარიშზე და ფრენების აღდგენაზე
ევროკავშირის ელჩმა საქართველოში, პაველ ჰერჩინსკიმ “ინტერპრესნიუსთან” ინტერვიუში განაცხადა, რომ რუსეთთან ფრენების აღდგენით საქართველო თანხვედრაში უნდა მოდიოდეს ევროკავშირის პოზიციასთან. მისივე თქმით, “უკრაინაში რუსეთის არაპროვოცირებული, გაუმართლებელი და უკიდურესად სასტიკი შეჭრის” შემდეგ, ევროკავშირის 27-მა წევრმა ქვეყანამ რუსეთში და რუსეთიდან პირდაპირი ფრენების აკრძალვა ერთსულოვნად გადაწყვიტა.
ჰერჩინსკიმ უპასუხა “ქართული ოცნების” თავმჯდომარის, ირაკლი კობახიძის განცხადებასაც, რომლის მიხედვითაც “დეკემბერში საქართველოსთვის კანდიდატის სტატუსის მინიჭებას არ აქვს ალტერნატივა, თუ ისევ არ იქნება მიღებული პოლიტიკური გადაწყვეტილება”.
ელჩის განმარტებით, ეს იქნება დამსახურებაზე დაფუძნებული და ძალიან “არაპოლიტიკური ანგარიში.” როგორც ჰერჩინსკი ამბობს, რამდენიმე კვირის შემდეგ, ევროკავშირის 27 წევრი ქვეყანა ევროკავშირის პრეზიდენტებისა და პრემიერმინისტრების დონეზე შეხვდებიან და შეაფასებენ საქართველოს მიერ მიღწეულ პროგრესს:
“ნება მომეცით კიდევ ერთხელ ავხსნა, თუ რა მოხდება მიმდინარე წელს. ჩვენ ძალიან მალე დავიწყებთ მუშაობას მოსაზრებაზე, რომელიც შეეხება 12 პრიორიტეტის იმპლემენტაციის მდგომარეობას. ეს იქნება რამდენიმე თვის განმავლობაში მიმდინარე პროცესი, ეს იქნება ძალიან ინკლუზიური პროცესი. საქართველოს ხელისუფლება იქნება მოწვეული საკუთარი მოსაზრების წარმოსადგენად. ჩვენ ასევე გავივლით კონსულტაციას სხვა დაინტერესებულ მხარეებთან, მათ შორის, სამოქალაქო საზოგადოებასთან და ეს აისახება ევროკომისიის მოსაზრებაში, რომელიც მიმდინარე წლის ოქტომბერში გამოქვეყნდება.” – ამბობს ელჩი.
მისივე თქმით, ეს შეფასება, პირველ რიგში, გაკეთდება ევროკომისიის მიერ წარმოდგენილი ანგარიშის საფუძველზე, რომელსაც ის მიმდინარე წლის ოქტომბერში გამოაქვეყნებს. ელჩის განმარტებით, ევროკავშირის 27-ვე სახელმწიფოს პრეზიდენტები და პრემიერმინისტრები ერთსულოვნად მიიღებენ გადაწყვეტილებას საქართველოს ევროკავშირში გაწევრიანების სურვილთან დაკავშირებით.
რუსეთის საგარეო უწყების ხელმძღვანელმა სერგეი ლავროვმა 18 იანვარს საქართველოსთან პირდაპირი ავიამიმოსვლის მალე აღდგენის იმედი გამოთქვა და განაცხადა, რომ საქართველოს ეკონომიკის 10 პროცენტით ზრდა დიდწილად რუსეთთან კავშირის დამსახურებაა.
სერგეი ლავროვმა განაცხადა, რომ საქართველოს, აფხაზეთსა და ცხინვალს შორის დიალოგისთვის საჭირო მექანიზმები არსებობს, რომელშიც “რუსეთიც მონაწილეობს”. მისივე განმარტებით, მოსკოვი საქართველოსა და ოკუპირებულ ტერიტორიებს შორის ურთიერთობების აშენების მომხრეა. ამის შესახებ ლავროვმა 2022 წლის შემაჯამებელ პრესკონფერენციაზე ისაუბრა.
ლავროვი ასევე აღნიშნავს, რომ დასავლური ქვეყნები და ინსტიტუტები ჟენევის ფორმატის უკრაინაში მიმდინარე მოვლენების “მძევლად ქცევას” ცდილობენ, რაც მისი აზრით, “პოლიტიკური წყენებითა და კაპრიზებითაა განპირობებული”.
2022 წლის შემაჯამებელ პრესკონფერენციაზე სერგეი ლავორვმა შეაქო საქართველოს მთავრობა და თქვა, რომ ქვეყანა “დასავლეთის ზეწოლას წინააღმდეგობას უწევს.”
საქართველოს პრეზიდენტი სალომე ზურაბიშვილი არ მიესალმება რუსეთთან ფრენების აღდგენას. ამის შესახებ პრეზიდენტმა საკუთარ ფეისბუქზე დაწერა.
“იმ დროს, როცა ყველა ჩვენი პარტნიორი ქვეყანა, სიტყვით თუ საქმით, მაქსიმალურ სოლიდარობას უცხადებს უკრაინის თავდადებულ ბრძოლას, ჩემთვის და დარწმუნებული ვარ, საზოგადოების უდიდესი ნაწილისათვის, მთავრობის და მმართველი პარტიის პოზიცია, რბილად რომ ვთქვათ, გაუგებარია.” – წერს ზურაბიშვილი.
ეს არ არის პირველი შემთხვევა, როცა რუსეთის ფედერაციის მაღალი რანგის ჩინოვნიკები საქართველოს ხელისუფლებას უკრაინასთან და დასავლეთთან მიმართებაში აქებენ.
გასული წლის 25 მარტს რუსეთის ფედერაციის საბჭოს საერთაშორისო საქმეთა კომიტეტის თავმჯდომარემ, გრიგორი კარასინმა ასევე შეაქო საქართველოს ხელისუფლება უკრაინის საკითხზე პოზიციის გამო. საქართველოს რეაქციას დასავლეთის ანტირუსულ სანქციებზე კარასინმა “გაწონასწორებული” უწოდა და ხაზგასმით აღნიშნა, რომ რუსეთში „ეს ფაქტი შეუმჩნეველი არ დარჩება“.
კარასინმა რუსეთ-საქართველოს ურთიერთობის ისტორია გააანალიზა. მან თქვა, რომ 2012 წლიდან, მას შემდეგ, რაც ხელისუფლებაში “ქართული ოცნება” მოვიდა და აბაშიძე-კარასინის ფორმატი ამოქმედდა, რუსეთი საქართველოს მეორე ყველაზე მნიშვნელოვანი სავაჭრო პარტნიორი გახდა. მისი თქმით, მოიხსნა ქართულ საქონელზე დაწესებული ყველა შეზღუდვა და რუსეთში ქართული ექსპორტი 14-ჯერ გაიზარდა.
